Madián naMarcela valivwishilenga kuwaha chiyoyelo chauhando munganda yaMedellín, mulifuchi lyaColombia. Madián apwilenga nakuzata milimo yize atambwilenga jimbongo jajivulu, kaha vatwaminenga muzuvo yayinene yaulangaji. Hakuwana nge ava valunga napwevo vapwile vangamba jaYehova Kalunga, ngocho kwapwile chuma chimwe chize chavalingishile valumuneko kuyoya chavo. Madián naMarcela vambile ngwavo: “Mumwaka wa 2006, twayile kukukunguluka chakulipwila chalikumbi limwe chakwamba ngwavo, ‘Talisa Liso Lyove Mumwe Kaha.’ Vihande vyavivulu vyapwileko, vyakolezezele yetu vosena twapwile mulizavu twashiwiseko chiyoyelo mangana tuzachile chikuma Kalunga. Kahomu kukunguluka kana chakumine, twamwene ngwetu keshi mukiko twalingilengako, mwomwo twazangilenga kulanda vyuma chamulanjila kaha twapwile namukuli waunene chikuma.”

 Hanyima yakukunguluka kana, Madián naMarcela vaputukile kwashiwisako chiyoyelo chavo. Kaha vambile ngwavo: “Twaputukile kukehesako vyakulandalanda, kaha nawa twalukilile muzuvo yayindende, kufumaho twalanjishile minyau yetu, nakulanda mutukutuku.” Kutwala muze, ava valunga napwevo valitwaminyine kuyanga kuvitanda vyavinene mangana chivakafwe kulihenda kukulandanga vyuma chamulanjila. Vaputukile kuzachisa lwola lwavo lwaluvulu hakushimutwila navatu Mbimbiliya. Chuma chikwavo valingile shina kulikata chikuma namasepa vaze vapwile vapayiniya vakulipwila, vaze nawa vazachililenga Yehova Kalunga natwima. a

 Nakushimbula chiku, Madián naMarcela vafwililile kutohwesako mulimo wavo hakwalukila kuchikungulwilo chakumembo chize chapwile nakusakiwa kukafwa. Hakusaka mangana vatesemo chuma kana, Madián echele milimo. Kaha mukulwane wenyi wamilimo ashinganyekele ngwenyi pamo Madián nazaluka. Ngocho Madián ashimutwilile namukulwane wenyi wamilimo nakumuhulisa ngwenyi: “Yove watwama najimbongo jajivulu, kutala wapwa wakuwahilila tahi?” Mukulwane wenyi wamilimo amukumbulwile ngwenyi, kapwile wakuwahililako mwomwo apwile naukalu wauvulu uze ahonenenga kukumisa. Kaha Madián amulwezele ngwenyi: “Jimbongo keshi jikiko jeji kulingisanga mutu awahilileko, chuma chachilemu shina kulinga vyuma vyamwenemwene vize navineha kuwahilila. Chuma cheji kulingisanga ami napuwami tuwahilile shina kunangula vatu vyaKalunga. Shikaho, tuli nakusaka kupwa vakuwahilila hakuzachisa chikuma lwola lwetu kuzata mulimo kana.”

 Madián naMarcela vapwa vakuwahilila chikuma nakusuuluka mukuyoya chavo mwomwo yakuzachila Yehova. Hamyaka 13 yinahichi kunyima, ava valunga napwevo vanazachilanga kuchikungulwilo chize chili nakusakiwa kukafwa chakunote yalifuchi lyaColombia. Oholyapwa jino veji kulivwisanga kuwaha kuzata upayiniya wakulipwila.