Joshua wamuUnited States uze ayile nakuzachila muGuyana, ambile ngwenyi: “Kangweshi kuhasa kulumbununa kuwaha cheji kufumanga hakuya nakuzachila kuze kuli nakusakiwa kukafwako.” Kuwaha evwile chikiko vanevunga navandumbwetu vaze vanayinga nakuzachila mulifuchi lyamuSouth America. a Vyuma muka tunahase kulinangula kuli ava vandumbwetu vayile nakuzachila kuze kwapwile nakusakiwa kukafwa? Uno mijimbu kana yinahase kumikafwa ngachilihi muliwahise kachi nge munakusaka kuya nakuzachila mulifuchi lyeka?

 Shimbu kanda ndumbwetu Linel ayenga kuGuyana, avangililile kuya nakuzachila mungalila yamuUnited States yize kavavula kuzachilako. Ou ndumbwetu ambile ngwenyi: “Ami navakwetu 19 vatutumine kuya nakuzachila kuchihela chakumembo muWest Virginia. Mulimo wakwambulula nakulikata navakwetu muvyalumingo vivali kungalila kana, vyangukafwile ngwalumuneko chiyoyelo chami. Shikaho, ngwafwililile jino kuzachila chikuma Yehova mukuyoya chami chosena.”

 Garth napuwenyi Erica vaputukile kushinganyeka vyakuya nakuzachila kulifuchi lyeka, ngocho vasakwile kuya nakuzachila muGuyana. Mwomwo ika? Erica ambile ngwenyi: “Ami nalunga lyami twatachikijileko valunga napwevo vamwe vaze vayile nakuzachila kulifuchi kana. Twima vapwile nayo nakuzanga mulimo vapwile nakuzata vyatulingishile nayetu tufwile kuya nakuzachila kuchihela kana.” VaGarth naErica vazachilile myaka yitatu mulifuchi kana, kaha valivwishile chikuma kuwaha kuzata mulimo wavo. Garth ambile ngwenyi: “Twamakilile kuya nakuzachila mulifuchi lyeka, kaha twamwene ngwetu chapwa chamwaza.” Kutwala muze ou ndumbwetu napuwenyi vayile kuShikola yaNgileyate, kaha oholyapwa vali nakuzachila muBolivia.

 Jindongi jamuMbimbiliya jeji kutukafwanga twashiwise chiyoyelo chetu. (WavaHepeleu 13:5) Jatukolezeza nawa tukekesenga omu vili vyuma shimbu kanda tusakule vyakulinga. (Luka 14:26-33) Kahomu mukiko atela kulinga mutu shimbu kanda ayenga nakuzachila mulifuchi lyeka. Garth asonekele ngwenyi: “Ami napuwami Erica twashiwishileko chiyoyelo chetu, shimbu kanda tuyenga nakuzachila muGuyana. Twalingile ngocho hakwecha kusekasana twapwile nacho, nakulanjisa zuvo yetu navikumba vize katwapwile nakuzachisako. Kulinga ngocho chambachile myaka yayindende. Kaha twafwililile kuzachilanga muGuyana hakuyangako mwaka himwaka.”

 Chuma chikwavo chasakiwa shina mwakuwanyina jimbongo jakulikafwa najo. Mumafuchi amwe, vaze veji kuyanga nakuzachila kuze kuli nakusakiwa kukafwa veji kuwananga milimo yakuzata mulifuchi kana. Vatu vamwe vanatwaleho lika kuzachila hembo milimo yize vazachilenga kwimbo lyavo kuzachisa jikopyuta. Kaha veka veji kukindulukanga kulifuchi lyavo hakatando kakandende nakuzatako milimo yimwe. VaPaul naSinead vayilenga kulifuchi lyavo muIreland kamwe mumwaka nakuzatako milimo. Echi chavakafwile vazachile muGuyana hamyaka 18, kaha namyaka yikwavo 7 kufuma haze vapwile namwana wapwevo.

 Hali Samu 37:5 ngwavo: “Itavila Yehova akutwaminyine mujila yove. Pendamina hali ikiye, kaha mwakukafwa.” Christopher naLorissa vamuUnited States valombelenga lika mangana vayenga nakuzachila kulifuchi lyeka. Kaha nawa, hakulemesa Kalunga mwatanga vashimutwililenga havyuma vize vatelele kulinga nakusoneka vyuma vize navifuma muvyuma navasakula kulinga. Hakuwana nge kavasakile kulinangula lilimi lyekako, ngocho vayile nakuzachila muGuyana muze vavula kuzachisa chikuma lilimi lyaChingeleshi.

 Kufumaho, vakavangijile lundongi luze lwatwama hali Vishimo 15:22 lwakwamba ngwavo: “Kachi nge vatu kavatwamine pungako, vyuma vanajinyi kulinga vyeji kukuminamo, oloze vyuma vyeji kutesangamo nge vaka-kulweza mangana vanavulu.” Vasonekelele mutango uze weji kutwaminyinanga mulimo wakwambulula muGuyana, b nakuhanjika havyuma vafwilile kulinga nomwo chapwa chiyoyelo chavo. Kaha nawa, vahulishile numba nge kwapwile vipatela kwakamwihi, nomwo japwa jingonde navyakulya veji kulyanga mulifuchi kana. Ofesi yamutanga yakumbulwila vihula vyaPaul napuwenyi, nakulingisa vakulwane vakungalila yize vapwile nakusaka kuya vashimutwile navo.

 Linel uze twavulukanga hakavanga apwa jino kalama wakujinguluka muGuyana. Ou ndumbwetu naikiye akavangijile lundongi luze lwatwama hali Vishimo 15:22. Ambile ngwenyi: “Shimbu kanda nguyenga, ngwahulishileko vandumbwetu vaze vazachilile kumafuchi eka. Kaha kufumaho ngwashimutwilile natanga yami, navakulwane vamuchikungulwilo chami nakalama wakujinguluka hachihande kana. Ngwatangilenga nawa vihande vyamumikanda yetu vize vyapwile nakuhanjika hakuzachila kuze kuli nakusakiwa kukafwa.”

 Vandumbwetu vavavulu vaze veji kuyanga nakuzachila kumafuchi eka, veji kuvangila kuya kulifuchi kana shimbu kanda valukileko. Joseph napuwenyi Christina vambile ngwavo: “Lwola lwatete luze twayile kuGuyana, twatwamineko kaha tukweji vatatu. Echi chatulingishile tutachikize kanawa omu navikapwa vyuma. Kahomu twakindulukile kwimbo twawahishile vyuma mangana twaluke jino.”

 Vaka-kuzachila kuze kuli nakusakiwa kukafwa vatela kupwa namuchima wakulisuula nakwalumunako vyuma mangana vazachile kanawa Kalunga. Chakutalilaho, vaze veji kuyanga nakuzachila kujingalila kuze kuzuma chikuma, veji kuwananga nge kwatwama tututu vakulisezaseza. Joshua uze twavulukanga hakavanga, ambile ngwenyi: “Mulifuchi lyaGuyana, mwatwama chikuma tututu, oloze kutwala muze ngwejililile jino. Kaha nawa ngwatachikijile ngwami, kachi nge nangulama limbo lyami kupwa lyaunyoji kaha tututu kana kaveshi kuvula chikuma hemboko. Mwaliwezele nawa nakukosanga malonga, nakumbila swali nakukomba muzuvo lwola lwosena.”

 Kwalumunako chiyoyelo mulifuchi lyeka chasakiwa nawa kwijilila kulyanga vyakulya vyamulifuchi kana nakutachikiza mwakuvitelekela. Joshua ambile ngwenyi: “Ami namukwetu ngwayile nenyi, twahulishilenga vandumbwetu vatunangule mwakutelekela vyakulya vyamungalila kana. Omu twatachikijile mwakuvitelekela, twasanyikilenga navandumbwetu muchikungulwilo twapwile mangana tulile navo hamwe. Echi chatukafwile chikuma tutachikize vandumbwetu vavavulu nakulikata navo.”

 Paul napuwenyi Kathleen vahanjikile kutalisa kuvisemwa ngwavo: “Twavangilile kutachikiza vilinga nauvwalo vize vetavila mungalila muze twapwile nakusaka kuya nakuzachila. Ngocho twalinyishile nakwalumunako vyuma vimwe, oloze katwahokwele jindongi jamuMbimbiliyako. Kutachikiza chisemwa chamungalila muze twapwile nakutwama chatukafwile tukalikate navandumbwetu muchikungulwilo nakuzata kanawa mulimo wakwambulula.”

 Joseph napuwenyi Christina vahanjikile omwo veji kwivwanga vakiko navaze veji kuyanga nakuzachila kumafuchi eka ngwavo: “Vyuma vyamwaza vize vyeji kufumangamo vyapwa vyavivulu kuhambakana ukalu twamwene. Kulisuula kuseza chiyoyelo chetu chauhando chatukafwile tuhake vyuma vyavilemu kulutwe. Twechele kuhaka muchima kuvyuma vimwe vize twamwenenga hakavanga ngwetu vyavilemu. Vyuma vyosena vize twahichilengamo vyatukafwile mangana tuzachile chikuma Yehova. Ngocho twapwile vakuwahilila nakusuuluka navyuma twapwile navyo.”

 Erica uze twavulukanga hakavanga ambile ngwenyi: “Kuzachila kuze kuli nakusakiwa kukafwa, chakafwile ami nalunga lyami tutachikize omwo chalumbununa kufwelela Yehova. Kaha Yehova natukafwenga chikuma mujijila jakulisezaseza. Omu twashimutwililenga havyuma vize twahichilengamo halwola luze twapwile kuchihela kana chatukafwile tuzamise ulo wetu.”