Mukuhita chalwola malunga vaze vapwile naYopa valitwaminyinyine kuhanjika. Chivumo chalitulileko, chapwile kaha chivumo chapeho yize yapwile nakufuma mulikundu lyaAlavya. Yopa kapwile namazu eka akuhanjikako, kaha nawa azeyele mwomwo yakulipula jipami halwola lwalusuku. Achishinganyekenu muli nakumona Yopa nasulakanyina Elifwaze, naMbilitate naZofwale vaze vapwile masepa jenyi, kaha hanga navatalila kwijiva nge ali nakuvalweza ngwenyi, vatwaleho lika kuhanjika. Oloze vakiko hanga vanatalila hamavu, mwomwo yakwivwa kupihya ngwavo pami javo, namazu avo “amokomoko” navyuma vyeka vyavipi vahanjikile kavyazachileko. (Yopa 16:3) Chamokomoko navyuma ahichilemo, Yopa afwililile kulama kulonga chenyi.

Pamo Yopa ashinganyekele ngwenyi kupwa wakulonga chikiko chuma chapwile chachilemu chikuma. Atokesele luheto lwenyi lwosena, nakufwisa vana venyi vosena 10, kaha masepa jenyi navatu muchitungilo kavamuvumbikilengako. Kutwala muze nawa avijile musongo waunene chikuma. Chikova chenyi chelavile chikuma mwomwo yamisongo, kaha chapwile namavanda namavunu. Kaha nawa apwilenga nakunuka. (Yopa 7:5; 19:17; 30:30) Shikaho mazu amapi vahanjikile vaze malunga vatatu alingishile Yopa evwenga kupihya chikuma. Afwililile kusolola hatoma ngwenyi kapwile muka-shili ngana muze vamulwezele vaze malungako. Mazu amakumishilo ahanjikile Yopa avalingishile valitwamine kuhanjika, ngocho kavapwile namazu eka akuhanjikako. Chipwe ngocho, Yopa apwile lika muvikola. Apwile nakusakiwa lika mutu wakumuvendejeka.

Tunatachikiza chikupu vyuma vyalingishile Yopa amone vyuma mujila yakuhenga. Shikaho asakwile kumukafwa nakumwolola. Kaha nawa asakiwile kuvendejeka chamwenemwene chize vahonene kulinga vaze masepa jenyi vatatu. Uno mwasakiwaho lyehi kumikafwa nakumivendejeka tahi? Uno vamivwisaho lyehi kupihya kuvatu vaze mwashinganyekele ngwenu vapwa masepa vamwenemwene tahi? Kutachikiza omu Yehova akafwile ngamba yenyi Yopa najila amukumbulwililemo chinahase kumikafwa chikuma.

Tutalenu jino vyuma vyeka vyakulipwila natuwana mumujimbu waYopa. Kwapwile mukweze umwe walunga walijina lyaElihu uze apwile kwakamwihi naYopa. Elihu apwile nakwivwilila halwola lwosena luze vaze malunga vavakulwane vapwile nakulipula jipami. Kevwile kuwaha havyuma vahanjikileko.

Elihu apihililile chikuma naYopa. Evwile chikuma kupihya hakumona sepa lyenyi Yopa mwalimona “kupwa wakwoloka kuhambakana Kalunga.” Chipwe ngocho Elihu evwililile keke Yopa hakumumona ali mumisongo chikuma nakutachikiza nawa ngwenyi asakiwile kumukafwa nakumuvendejeka. Echi chikiko chalingishile Elihu ahone kutalilila chikoki vaze vaka-kuvendejeka vamakuli. Elihu evwileko omu vaze malunga vapwile nakulweze Yopa vyuma vize vyamwivwishile kupihya kutalisa kulufwelelo lwenyi, naulemu wenyi nakulonga chenyi. Evwile nawa chikuma kupihya hakwivwa mazu akwamba ngwavo Kalunga apwile navilinga vyakuhenga. Halwola kana Elihu afwililile jino kuhanjika.—Yopa 32:2-4, 18.

Elihu ambile ngwenyi: “Ami ngukanyike oloze enu muvakulwane. Ngocho ngwaholanga kulu kangwasakanga kumilweza vyuma ngwatachikizako.” Kalitwaminyinyine kuhanjikako, oloze atwalileho lika ngwenyi: “Ukulwane ukawawo kawalingisa mutu apwenga namanganako, vakulwane keshi vakiko kaha vatachikiza vyuma vyakwolokako.” (Yopa 32:6, 9) Ngocho Elihu ahanjikile halwola lwalusuku mangana asolole ngwenyi mazu enyi apwile amuchano. Mazu ahanjikile alihandunwine namazu aze ahanjikile Elifwaze, naMbilitate naZofwale. Elihu afwelelesele Yopa ngwenyi, keshi kuhanjika mazu aze nawamwivwisa kupihya nakuwezela kuukalu wenyiko. Avumbikile chikuma Yopa, hakumuvuluka lijina nakwitavila ngwenyi, vaze malunga vatatu kavamuhanyine kalemesako. * Elihu Alwezele Yopa mujila yakalemesa ngwenyi: “Shikaho ove Yopa, ivwa mazu ami.”—Yopa 33:1, 7; 34:7.

Elihu ahuhumwine Yopa hakwamba ngwenyi: “Ngwakwivwanga omu wahanjikanga, . . . ‘Ngunatomo, kangwazombokele jishimbiko. Nguwalambwe, kangweshi namulongako. Oloze Kalunga nawane kanyinyilo kakunguhungilaho.’” Kaha Elihu amuhulishile ngwenyi: “Uno unalimono vene ngwove unoloka hakwamba ngwove, ‘Ami nguwakwoloka kuhambakana Kalunga’ nyi?” Elihu kasakile kwechelela Yopa apwenga navishinganyeka kanako, ngocho amulwezele hatoma ngwenyi, “kawolokele hakuhanjika mazu kanako.” (Yopa 33:8-12; 35:2) Elihu atachikijile ngwenyi Yopa apwile namatoto chikuma mwomwo yakujimbalisa vikumba vyenyi vyosena nakumuyanjisa kuli vaze vakwavo vamakuli. Ngocho Elihu ahuhumwine Yopa ngwenyi: “Zangama, kuchina matoto nawakutwala kukulinga vyuma vyavipi.”—Yopa 36:18.

Elihu ahakwilile chikuma Yehova Kalunga. Akukulwile namazu amwaza ngwenyi: “Nachipwa chakuhenga kuli Kalunga wamuchano kulinga vyuma vyavipi . . . Ou Wangolo Josena kulinga vyuma vyakuhenga.” (Yopa 34:10, 12) Elihu akafwile Yopa atachikize ngwenyi Yehova apwa wakeke nachiyulo, ngocho echi chikiko chamulingishile ahone kumuzangamisa hamazu amapi aze ahanjikileko. (Yopa 35:13-15) Hakusaka mangana ahone kulisolola ngwenyi atachikijile vyosena, Elihu alinyishile nakwamba ngwenyi: “Kalunga apwa wamunene kuhambakana omu twamutachikijila.”—Yopa 36:26.

Numba tuhu Elihu ahuhumwine Yopa hatoma, oloze alingile ngocho mujila yalikoji. Amufwelelesele ngwenyi likumbi lize Yehova mwakamuhindula kumusongo wenyi. Kalunga ahanjikile kutalisa kuli ngamba yenyi wakushishika ngwenyi: “Nyama yenyi yipwenga yayivwovu kuhambakana muze apwile haukweze wenyi.” Elihu nawa ahanjikile mujila yalikoji hakulweza Yopa alihanjikile ivene. Muchishishisa chakutenukila Yopa, amulwezele ngwenyi: “Hanjika, mwomwo nangusaka ngwami ngukusambise.” (Yopa 33:25, 32) Oloze Yopa aholele kaha kulu. Pamo ashinganyekele ngwenyi katelele kulihakwila iveneko mwomwo Elihu amuhuhumwine mujila yalikoji nakumukolezeza. Kaha nawa pamo alilile hakutachikiza ngwenyi Elihu amuzakamine.

Tunahase kulinangula vyuma vyavilemu kuli ava malunga vavali vakushishika. Chakutalilaho chaElihu chatunangula omu tunahase kuhuhumuna vakwetu nakuvendejeka vaze vali nakusakiwa kukafwa. Sepa wamwenemwene keshi kwivwa woma kutuhuhumuna havyuma vyavipi vize tunalingiko. (Vishimo 27:6) Shikaho twatela kufwila kupwa masepa vamwenemwene vaze veji kusololanga likoji nakukolezeza vatu vaze vali muukalu, numba tuhu shimbu jimwe vatu kana navalusuka kuhanjika mazu amapi. Chakutalilaho chaYopa chinahase kutukafwa nayetu twivwililenga vyuma navatukafwa vakwetu nge tuli muukalu, muchishishisa chakulelesa vyuma kana. Tuvosena twasakiwa kutuhuhumuna nakutwolola. Ngocho kwitavila vyuma kana nachikatuyovola.—Vishimo 4:13.

Omu Elihu apwile nakuhanjika, avulukile peho, namavwi, namikalateta namiveso. Ahanjikile hali Yehova ngwenyi: “Ivwililenu kanawa chungumo chalizu lyenyi.” Kufumaho Elihu ahanjikile ‘hapeho yanyamanganda.’ (Yopa 37:2, 9) Halwola Elihu apwile nakuhanjika, chasoloka nge peho yanyamanganda yapwile nakuhuhwa chikuma. Kutwala muze, peho kana yahuhwile nangolo chikuma. Kaha kwasolokele vyuma vimwe vyakukomwesa. Yehova aputukile kuhanjika.—Yopa 38:1.

Omu tweji kutanganga mukanda waYopa, tweji kulivwisanga kuwaha kutanga chikumanyi tupetulu vaze Yehova apwile nakuhanjika kuli Yopa. Chapwile kwijiva nge mazu ahanjikile Yehova apekumwine mazu amakuli ahanjikile Elifwaze, naMbilitate, naZofwale ngana muze peho yeji kupekumunanga vyuma vyavilelu. Yehova kahanjikile navaze malunga halwola kanako. Oloze olwele kaha vishinganyeka vyaYopa, ngana muze chisemi eji kwololanga mwanenyi.

Yehova atachikijile kukola apwile nakwivwa Yopa. Yehova evwilile Yopa keke, ngana muze eji kwivwanga kachi nge vana venyi vali nakuyanda. (Isaya 63:9; Zekaliya 2:8) Kaha nawa atachikijile ngwenyi, Yopa apwile “nakuhanjika chakuzeneka chinyingi,” ngocho vyuma vyapwile nakuya nakupihilako lika. Shikaho, Yehova olwele vishinganyeka vyaYopa hakumuhulisa vihula vyavivulu. Amuhulishile ngwenyi: “Wapwile kulihi omu ngwalile chihela chamavu? Ngulweze, kachi nge unatachikiza.” Kumaputukilo akutenga “vatanganyika vachimene,” kulumbununa vangelo jaKalunga vaputukile kulikuwa hakumona vyuma vyakutenga. (Yopa 38:2, 4, 7) Yopa katachikijile vyuma kanako.

Yehova atwalilileho lika kuhanjika havyuma atengele. Kaha nawa alwezele Yopa vyuma vize vatu makumbi ano vamona kupwa vyasayasi. Vyuma kana shina vyuma vyamumelu, navyuma vyakuyoya, navyuma vyeka vyakutenga. Yehova avulukile tunyama natujila vamwe vaze vapwile mungalila yize atwaminenga Yopa. Avulukile vandumba, namakololo, navapembe vakujipili, navimbulu vamuchipapa, navangombe vamuchipapa, navanyamalanda, natuvalu, natumbembe, navangonga, navambehemote (vaze vavuluka nawa ngwavo vanguvu), navaLevyatane (vaze vavuluka nawa ngwavo vangandu). Chikupu vene, Yopa evwile kuwaha hakwivwa vyuma kanevi vyakukomwesa vize vamulwezele kuli Yehova. *

Mwomwo ika Yehova alwezele Yopa vyuma vyosenevi. Mwomwo Yopa asakiwile kupwa wakulinyisa chikuma. Hakuwana nge Yopa ahanyine Yehova mulonga ngwenyi ikiye apwile nakumunehela ukalu, ngocho echi chamulingishile evwenga kupihya chikuma nakumulingisa nawa asosoloke kuli Ise wazangi. Yehova ahulishile lika Yopa mangana amulwezele okwo apwile ikiye hakutenga vyuma kana, nakumona numba nge Yopa nahase kulisa nakutwaminyina vyuma vyosena vize atengele Kalunga. Kachi nge Yopa katachikijile vyuma vyosena atengele Yehovako, kutala kachi chapwile chakutamo kuhana mulonga Tengi yenyi tahi? Uno kumana jijila jaYehova navishinganyeka vyenyi kavyahambakanyine vishinganyeka vyaYopako tahi?

Vyuma vyosena vize Yehova ahanjikile, vyasolwele nge azangile chikuma Yopa. Chapwile kwijiva nge Yehova anakulweza Yopa ngwenyi: ‘Ove mwanami, kachi nge ngwatengele nakuzakama vyuma vyosena, kutala nanguhona kukuzakama nayove tahi?’ Kutala ngunahase kukuseza nakujiha vana vove, nakuhona kukukinga, nakukuveta namusongo tahi? Uno keshi Yami kaha ngunahase kukuhana vyuma unajimbalisa, nakukuhindula kumusongo woveko tahi?’

Yopa akumbulwile kaha kavali havihula amuhulishile Yehova. Kalipulile jipami naYehova chipwe kulihakwilako. Alinyishile nakwitavila ngwenyi katachikijile vyuma vyavivuluko, ngocho alikonekele hakulusuka kuhanjika. (Yopa 40:4, 5; 42:1-6) Chikupu vene, Yopa apwile nalufwelelo lwakukola. Atwalilileho kupwa nalufwelelo kana chamokomoko naukalu ahichilemo. Etavilile vyuma amuhuhumwine Yehova nakuzachilaho. Echi chatela kutulingisa nayetu tulihulise ngwetu: ‘Kutala ngweji kulinyisanga nakwitavila nge vananguhuhumuna nakungwolola tahi?’ Tuvosena twasakiwa kutukafwa. Kachi nge natulinga ngocho, kaha natulondezeza Yopa uze apwile nalufwelelo lwakukola.

Yehova jino afwililile kuvendejeka Yopa uze apwile nakuhita muukalu. Yehova ahanjikile kuli Elifwaze uze apwile mukulwane hali vaze vaka-kuvendejeka vamakuli vatatu ngwenyi: “Ngunapihilila nayove namasepa jove vavali, mwomwo kamwahanjikile muchano hali ami nganomu nahanjika ngamba yami Yopako.” (Yopa 42:7) Achishinganyekenu hamazu kana. Kutala Yehova apwile nakwamba ngwenyi vyuma vyosena vize vahanjikile vaze malunga vatatu vyapwile vyamakuli, chipwe ngwenyi mazu osena aze ahanjikile Yopa apwile amuchano tahi? Nduma. * Hapwile chihandwa havyuma vize ahanjikile Yopa navize vahanjikile vaze malunga vatatu. Yopa ahombele chikuma nakulishona kaha nawa mazu aze vahanjikile vaze malunga amwivwishile chikuma kupihya kumuchima. Shikaho echi chikiko chamulingishile alusuke kuhanjika mazu akuhenga shimbu jimwe. Oloze chaluvinda Elifwaze namasepa jenyi vavali kavapwile nakwivwa ngana muze apwile nakwivwa Yopako. Hakuwana nge kavapwile nalufwelelo lwakukolako, ngocho echi chavalingishile vahanjike vyuma chamuhanjikila, kaha nawa mujila yaukenya. Ava malunga kavahanjikile kaha mazu amapi hali ou lunga wakuzeneka mulongako, oloze vahanjikile namazu amapi hali Kalunga aze asolwele nge apwa Kalunga waukenya wakuzeneka keke.

Shikaho, chapwile chakutamo Yehova kulweza vaze malunga vahane wana wauvulu. Vahanyine vangombe vavakuji 7, navizamba jamikoko nawa 7. Wana kana wapwile wandando yayinene chikuma, mwomwo ngombe wakuji ikiye ahanyinenga kapilishitu kweseka naJishimbi jize vahanyine Mose mangana afwike hashili alingile yize yahakile muyachi wosena mumulonga. (VyavaLevi 4:3) Tunyama vaze vahanyinenga kupwa wana vapwile vandando yayinene chikuma kweseka naJishimbi. Chachinenenyi Yehova ambile ngwenyi, hakusaka etavile wana vahanyine vaze malunga, Yopa atelele chatete kuvalombela kuli ikiye. * (Yopa 42:8) Chikupu vene, Yopa evwile chikuma kuwaha hakumumona kupwa wamulemu kuli Kalunga nahakumona omu ayulililemo kanawa chihande chenyi.

Yehova afwelele chikupu ngwenyi Yopa mwalinga vyuma vyosena vize amulwezele kulinga nakukonekela vaze malunga namuchima wenyi wosena. Yopa alingile vyuma vyosena vamulwezele. (Yopa 42:9) Kwononoka chenyi chasolwele hatoma ngwavo apwile lika wakulonga muvyuma vyosena. Kaha nawa kwononoka chenyi chalingishile Yehova amukisule.

Yehova asolwelele Yopa ‘zangi chikuma, nakumutetela.’ (WaYakova 5:11) Mujila muka? Yehova alingishile Yopa apwenga cheka wakulikangula kumujimba. Achishinganyekenu omu Yopa evwile hakumona jino nyama yenyi yinapu cheka “yayivwovu kuhambakana muze apwile haukweze wenyi” ngana muze ahanjikile Elihu. Vatanga jenyi namasepa jenyi vamukundwijile jino kumakumishilo nakumutetela nakumuhana mawana. Yehova akindulwishilile Yopa vikumba vyenyi nakumuhakilaho vikwavo kuhambakana vize apwile navyo. Nyi ngachilihi kutalisa kuvana venyi vaze vafwile? Yopa napuwenyi vevwile chikuma kuwaha hakupwa cheka navana veka 10. Kaha nawa Yehova ahakilileko Yopa myaka yakuyoya. Ngocho vamuhakililileko myaka yeka 140, kaha amwene vazukulu jenyi natukwatambuli. Mbimbiliya yamba ngwayo: “Yopa afwile wakusuuluka, omu alingile hanayoyo lyehi myaka yayivulu.” (Yopa 42:10-17) Shikaho, muPalachise Yopa napuwenyi navakapwa hamwe navaze vana vavo 10 ajihile Satana.—Yowano 5:28, 29.

Mwomwo ika Yehova akiswilile Yopa mujila kana? Mbimbiliya yamba ngwayo: “Enu mwevwa lyehi lukakachila lwaYopa.” (WaYakova 5:11) Yopa apwile lika nalukakachila chamokomoko naukalu waunene uze amwene. Lizu “lukakachila” lyasolola hatoma nge Yopa alingile vyuma vyavivulu omu apwile nakuhita muukalu. Atwalilileho kupwa nalufwelelo nakuzanga lika Yehova Kalunga kenyi. Muchishishisa chakupwa namatoto nakulama koko, oloze Yopa akonekelele vatu vaze vamwivwishilenga kupihya. Kaha nawa atwalileho lika kulama kulonga chenyi.—Yopa 27:5.

Tuvosena twatela kupwa nalukakachila. Twatela kutachikiza ngwetu Satana nahase kutuhombesa ngana muze alingile kuli Yopa. Kachi nge natupwa nalukakachila, nalufwelelo, nakupwa vakulinyisa, nakukonekelanga vakwetu nakufwila kulama kulonga chetu, kaha nayetu natukalivwisa kuyoya chize vatushika kulutwe. (WavaHepeleu 10:36) Kachi nge natulondezeza lufwelelo lwaYopa, kaha natwivwisa Yehova kuwaha chikuma nakwivwisa Satana kupihya.