Maliya Mangatala andwile mutwe nakutala mwilu oku ali nakuhunda masoji mumeso. Kaha Mwata wenyi uze azangile chikuma vamusukikile hachitondo. Lwola kana lwapwile lwamusana kuchivatuko chavula, “oloze milima yafwikile lifuchi lize lyosena.” (Luka 23:44, 45) Ahakile chikuto chenyi hamahye nakusachila hali pwevo uze apwile hakamwihi naikiye. Milima kana kayapwile yaufuku wachonga ulambako, mwomwo ufuku wachonga ulamba wapwa waminyutu yayindende, oloze milima kana yambachile jiola jitatu. Maliya namapwevo veka vaze vemanyine kwakamwihi naYesu, vaputukile kwivwa tunyama vaze veji kuhanjikanga naufuku. Vosena vaze vapwile nakumona vyuma vyapwile nakusoloka, “vevwile woma mateli nakwamba ngwavo: ‘Pundu vene ou apwanga MwanaKalunga.’” (Mateu 27:54) Vaka-kukavangiza Yesu navatu veka pamo vashinganyekele ngwavo, Yehova ikiye alingishile vyuma kana visoloke mangana asolole ngwenyi, evwile kupihya mujila vatu vayanjishililemo Mwanenyi.

Maliya Mangatala evwile kupihya chikuma hakumona Yesu vali nakumuyanjisa, oloze kasakile kumusezako. (Yowano 19:25, 26) Yesu pamo apwile nakwivwa kukola chikuma. Kaha nawa naye yaYesu asakiwile kumuvendejeka.

Hakuwana nge Yesu akafwile chikuma Maliya, ngocho Maliya afwililile kulinga kala vyuma vize vyasolwele nge asakwililile Yesu. Maliya vamumwenenga kupwa mutu wamokomoko, oloze Yesu amuvumbikile chikuma. Maliya apwile jino nalufwelelo chikuma. Mujila muka? Kaha vyuma muka tunahase kulinangula kuli Maliya makumbi ano?

MuMbimbiliya, mujimbu waMaliya Mangatala waputuka nachihande chakusolola omu Yesu akafwile kuli Maliya. Yesu amukafwile apwenga wakulihehwa kuvyuma vyavipi vyapwile nakumuyanjisa. Halwola kana, vandemone vayanjishilenga chikuma vatu vavavulu, kaha vandemone vamwe vatwaminyinyinenga kuyoya chavatu. Katwatachikiza omu vandemone valingile Maliya Mangatala, oloze twatachikiza kaha ngwetu apwile navandemone 7 vavapi. Chipwe ngocho, Yesu Kulishitu amufumishile vaze vandemone vosena.—Luka 8:2.

Maliya apwile jino wakulihehwa, kaha apwile wakuwahilila chikuma mukuyoya. Uno asolwele ngachilihi ngwenyi asakwililile Yesu? Alingile ngocho hakupwa muka-kukavangiza Yesu wakushishika. Kaha nawa amulingilile vyuma vize asakiwilenga. Chakutalilaho, Yesu navaposetolo jenyi vasakiwilenga vyakulya, nauvwalo, nachihela chakusavala. Yesu navaposetolo jenyi kavapwile naluhetoko, kaha nawa kavazachilenga milimo numba yimwe yakukayeko. Shikaho, hakusaka mangana vazate kanawa mulimo wakwambulula nakunangula vasakiwile kuvakafwa muvyuma vyamukuyoya.

Maliya namapwevo veka valisuwile kuvakafwa. Ava mapwevo “vazachishilenga vyuma vyavo hakuvazachila.” (Luka 8:1, 3) Pamo mapwevo vamwe hali ava vapwile naluheto. Mbimbiliya kayahanjika numba nge vavawahishililenga vyakulya, chipwe kuvakosela uvwalo, chipwe kuvawahishila chihela chakutwama mujinganda vayilengako. Oloze valisuwile kuzata milimo kana nakukundwiza lizavu lyosena lize pamo lyapwile navatu kafwe 20. Milimo vakilikichile ava mapwevo yakafwilenga Yesu navaposetolo jenyi vahake muchima kumulimo wakwambulula. Maliya atachikijile ngwenyi kapwile navyuma vyakutamo vyakufweta Yesu havyuma vize amulingilileko, oloze alisuwile kumulingila vyuma kweseka noho hakuminyine ngolo jenyi.

Makumbi ano, vatu vavavulu veji kumonanga vatu vaze veji kulisuulanga kukafwa vakwavo kupwa vamokomoko. Oloze omu keshi mukiko Kalunga avamonako. Yesu evwile kuwaha chikuma hakumona Maliya ali nakuzata nangolo jenyi josena mangana amukundwize navaposetolo jenyi. Makumbi ano, vaka-Kulishitu vakushishika navakiko veji kuzatanga milimo yimwe mangana vakafwe vakwavo. Shimbu jimwe, kulingilako vandumbwetu vyuma vyavindende chipwe kuhanjika navo mujila yalikoji, chinahase kusolola nge twavamona kupwa vavalemu chikuma. Chikupu vene, Yehova amona vyuma tweji kulinganga kupwa vyavilemu.—Vishimo 19:17; WavaHepeleu 13:16.

Maliya Mangatala apwile hamapwevo vaze vayile hamwe naYesu kuYelusalema kuPaseka mu 33 C.E. (Mateu 27:55, 56) Maliya evwile kupihya chikuma, omu vevwile ngwavo Yesu vanamukwate mangana vamwihwojole. Chihande chenyi chatohwele chikuma. Nguvulu Pondeu Pilatu uze vahungumwishile kuli vatwamina vamukwitava chavaYuleya navatu veka, ahanjikile ngwenyi Yesu vatelele kumujiha mujila yayipi hakumusukika hachitondo. Maliya amwene Mwata wenyi ali namanyinga kaha nawa nazeye, ali nakuyanjiwa hakutambuka oku nambate chitondo chakumusukilaho chachisuku kaha nawa chachilemu chikuma.—Yowano 19:6, 12, 15-17.

Omu yalingile yize milima yinafwiki, Maliya Mangatala namapwevo veka “vemanyine kwakamwihi nachitondo chaYesu chakuyanjishila.” (Yowano 19:25) Maliya evwile omu Yesu ahanyine kaposetolo Yowano uze azangile chikuma mulimo wakuzakama naye. Kaha evwile omu Yesu alyonyingile nakulila kuli Ise. Evwile nawa mazu amakumishilo aze ahanjikile shimbu kanda afwenga ngwenyi: “Vyuma vyosena vinatesamo jino.” Maliya alyonyingile chikuma. Chipwe ngocho, Maliya apwile lika kuze nahanyima yakufwa chaYesu. Kufumaho, apwile cheka kuchimbumbe kuze vatwalile mujimba waYesu kuli Yosefwe wakuAlimateya uze apwile muka-luheto.—Yowano 19:30; Mateu 27:45, 46, 57-61.

Chakutalilaho chaMaliya chatukafwa tutachikize ngwetu, twatela kukafwanga vakwetu vaze vali muukalu. Numba tuhu katweshi kuhasa kupwa nangolo jakukumisa ukalu kanako, oloze tunahase kuvakolezeza hakupwa vakumika nakuvatetela. Kaha nawa kupwa hamwe navakiko omu vali mulwola lwalukalu chinahase kuvakafwa chikuma. Kukafwa vakwetu vali muukalu nachisolola nge tukwechi lufwelelo lwakukola, kaha nachivavendejeka chikuma.—Vishimo 17:17.

Omu valingile mujimba waYesu vanauhake lyehi muchimbumbe, Maliya apwile hamukana wamapwevo vaze valanjile vyuma vyalivumba lyamwaza mangana vakakwite mujimba wenyi. (Mako 16:1, 2; Luka 23:54-56) Omu yalingile Sambata yinahichi, ahindukile muze pulundundu nakuya. Achishinganyekenu muli nakumona Maliya namapwevo veka vali nakutambuka mumilima hakuya kuchimbumbe chaYesu. Omu vapwile nakuya vapwile nakushinganyeka mwakushindumwina lilolwa lize lyapwile kuchikolo chachimbumbe. (Mateu 28:1; Mako 16:1-3) Chipwe ngocho, kavakindulukileko. Lufwelelo lwavo lwavakafwile valinge vyuma vize vahashile kulinga, nakuseza vyuma vyosena mumavoko aYehova.

Maliya pamo ikiye alivangile kuheta kuchimbumbe kuhambakana vakwavo. Omu ahetele alikomokelele chikuma. Awanyine lilolwa lyapwile kuchimbumbe vanalishindumunako, kaha mujimba wauchimo. Hahaze vene alahile kuya nakulweza Petulu naYowano vyuma amwene. Maliya apwile nakuhwimasana hakuhanjika ngwenyi: “Mwata vanamufumisamo muchimbumbe, kaha katwatachikijile okwo vanamusavalikako.” Kaha Petulu naYowano valahile mbushi nakuya kuchimbumbe, oloze vawanyine mwamupolongwa, ngocho vakindulukile kumembo avo. *—Yowano 20:1-10.

Omu Maliya akindulukile cheka kuze kuchimbumbe nachimene, kawanyineko mutuko. Kahomu amwene muchimbumbe mwamupolongwa aputukile kulila chikuma. Maliya anonokelemo, oloze chochimwe kamwenemo Mwata wenyiko. Kufumaho kwasolokele chuma chakukomwesa. Amwene vangelo vavali vanatwame muchimbumbe, kaha vamuhulishile ngwavo: “Uli nakulila ika?” Kaha ahanjikile mazu aze alwezele vaposetolo ngwenyi: “Mwata wami vanamufumisamo, kaha kangwatachikijile okwo vanamusavalikako.”—Yowano 20:11-13.

Omu alumukile amwene lunga nemana kunyima yenyi. Kamutachikijileko, ngocho ashinganyekele ngwenyi pamo apwile muka-kulima mumilemba. Uze lunga amuhulishile ngwenyi: “Ove pwevo, uli nakulila ika? Uli nakutonda iya?” Maliya amukumbulwile ngwenyi: “Ove mwata, kachi nge yove unamumbate, ngulweze okwo unamusavalika, kahami nangumufumisako.” (Yowano 20:14, 15) Achishinganyekenu hamazu ahanjikile Maliya. Kutala ou pwevo ukawenyi kachi ahashile kumbata mujimba waYesu Kulishitu uze apwile lunga wangolo wakutakama tahi? Maliya kashinganyekele havyuma kanako. Ashinganyekele kaha havyuma vize amwene ngwenyi nahase kulinga.

Kachi nge tunakumona ukalu waunene uze katweshi kuhasa kukumisa mungolo jetuko, kaha twatela kulondezeza Maliya Mangatala. Nge natushinganyekanga kaha hakuhehela chetu, kaha tunahase kuhomba chikuma. Oloze nge natushinganyekanga havyuma vize tunahase kulinga nakuseza vyuma vyosena mumavoko aKalunga, kaha tunahase kulinga navyuma vize twamona ngwetu katweshi kuhasa kulingako. (Wavaka-Kolinde 2, 12:10; Wavaka-Fwilipi 4:13) Chachinenenyi, natwivwisa Yehova kuwaha. Omu mukiko alingile Maliya, kaha Yehova amukiswile chikuma.

Uze lunga apwile kunyima yaMaliya kapwile muka-kulima mumilembako. Oloze mutu kana hakavanga apwile muka-kusonga maliva, muka-kunangula, kufumaho jino apwile Mwata yaMaliya uze azangile chikuma. Hakuwana nge kamutachikijileko, ngocho aputukile kumusosoloka. Maliya katachikijile ngwenyi Yesu vanamusangula kuvafu nakuyoya mwamutu wakushipilituko. Numba tuhu apwile namujimba wautu, oloze kapwile namujimba ngana uze apwile nawo hakavangako. Omu mwahichile makumbi kufuma haze vamusangwile, vatu kavamutachikijileko, kuhakilako vene navaze vamumwene hakavanga.—Luka 24:13-16; Yowano 21:4.

Uno Maliya atachikijile ngachilihi Yesu? Amutachikijile omu amusanyikile halijina ngwenyi: “Ove Maliya!” Maliya alumukile nakutambakana kuzachisa lizu lyamuchiHepeleu lize azachishilenga mapapa kakavulu ngwenyi: “Ove Laponyi!” Lunga kana apwile Muka-Kunangula uze azangile chikuma. Maliya awahililile chikuma, kaha amukwachililile nakuhona kumwechelela ayenga.—Yowano 20:16.

Yesu atachikijile vishinganyeka vyaMaliya, kaha ambile ngwenyi: “Kanda kungukakachilako.” Yesu pamo ahanjikile mazu kana mujila yalikoji nakumwesa mwesa kukanwa, oku ali nakutasunuka mulivoko lyaMaliya nakumulweza ngwenyi: “Kanda nguchiye mwilu kuli Tata.” Elu kalwapwile lwola luze Yesu atelele kuya mwiluko mwomwo apwile namulimo uze atelele kuzata hano hamavu. Ngocho asakile Maliya amukafweko kuzata mulimo kana. Maliya evwililile kanawa omu Yesu amulwezele ngwenyi: “Yako kuli vandumbwami ukavalweze ngwove, ‘Ami nguli nakuya mwilu kuli Tata uze apwa Senu nayenu, kuli Kalunga kami uze apwa Kalunga kenu nayenu.’”—Yowano 20:17.

Mulimo vamuhanyine kuli Mwata wenyi wapwile wakulipwila. Maliya apwile hatumbaji vatete vaze vamwene Yesu hanyima yakumusangula, ngocho vamuhanyine mulimo wakuya nakulweza vakwavo ou mujimbu wamwaza. Evwile chikuma kuwaha hakuliwana navakwavo tumbaji. Achishinganyekenu muli nakumumona ali nakuhwimasana omu ali nakulweza vakwavo ngwenyi: “Ngunamono Mwata!” Avalwezele vyuma vyosena vize amulwezele Yesu oku ali nakuhanjika washiwashi mwomwo yakuwahilila. (Yowano 20:18) Mujimbu wenyi walitombwele navyuma valwezele tumbaji kuli mapwevo vaze vayile kuchimbumbe chaYesu muze mwapwile mwamupolongwa.—Luka 24:1-3, 10.

Uno vaze tumbaji vakwileko ngachilihi? Hakavanga kavakwileko kanawako. Mbimbiliya yamba ngwayo: “Vakiko vamwene vyuma vavalwezele kupwa vyamokomoko, kaha kavetavilile vaze mapwevoko.” (Luka 24:11) Malunga kana vakolelele kuvihela vize malunga vahonenenga kufwelela mapwevo kweseka nachisemwa chavalapi chize chambile ngwacho pwevo katela kuhanjika muzangoko. Chasoloka nge vaposetolo vavahungumwishile chikuma kuchisemwa kana chakuzeneka vakiko kutachikiza. Oloze Yesu naIse kavatala vatu kumesoko. Chikupu vene, Maliya vamumwene kupwa wamulemu.

Maliya kechelelele vyuma vahanjikile vaze malunga vimwivwise kupihyako. Atachikijile ngwenyi Mwata wenyi amufwelelele chikuma. Vosena vaze veji kukavangizanga Yesu vavahana mulimo wakwambulula mujimbu. Mbimbiliya yavuluka mujimbu kana ngwayo: “Mujimbu wamwaza waWangana waKalunga.” (Luka 8:1) Yesu kafwelelesele vaka-kumukavangiza ngwenyi vatu vosena navevwililanga chipwe kumona mulimo wavo kupwa waulemuko. (Yowano 15:20, 21) Vaka-Kulishitu vatela kulondezezanga Maliya Mangatala. Numba tuhu tumbaji vamwe kavafwelele mazu ahanjikile hahaze veneko, oloze kechelele vyuma kana vimuhonese kwambulula mujimbu wamwaza wakusanguka chaYesuko.

Kutwala muze, Yesu asolokele kuli vaposetolo jenyi nakuli vaka-kumukavangiza vavavulu. Lwola lumwe asolokele kuvatu vakuzomboka 500 halwola lwolumwe. (Wavaka-Kolinde 1, 15:3-8) Lufwelelo lwaMaliya lwazaminenga lika lwola lwosena luze asolokelenga Yesu. Kaha nawa Maliya Mangatala apwile hamapwevo vaze vapwile muYelusalema halikumbi lyaPendekoseta omu shipilitu yejile hali vaka-kukavangiza Yesu vaze valikungulwile.—Vilinga 1:14, 15; 2:1-4.

Chikupu vene, Maliya Mangatala atwalileho lika kupwa nalufwelelo lwakukola palanga nakukufwa chenyi. Shikaho tuvosena twatela kupwa nalufwelelo lwakukola. Tunahase kulondezeza lufwelelo lwaMaliya Mangatala kachi nge natusolola muchima wakusakwilila havyuma vyosena atulingila Yesu Kulishitu, nakulisuula kuzachila vakwetu, nakufwelela ngwetu Yehova mwatukafwa.