Achishinganyekenu muli nakumona chilombo chamaswalale chize chinatalisa kuchihela chajipili chamalolwa. Kaha maswalale javaFwilishite vali nakutala malunga vavali vavaIsalele vaze vanemana muchinema. Ava maswalale vali nakulelesa vaze malunga mwomwo vanamono ngwavo kaveshi navitwako. VaFwilishite vayanjishilenga vaIsalele hamyaka yayivulu, vaze kavahashilenga kulifulila matemo akulimisako kuvanga vavakafwe kuli vaka-kole javo vaFwilishite. Shikaho maswalale javaIsalele kavapwile navitwa vyakuzachisa kujitako. Malunga vaze vapwile nakulelesa vapwile vavali kaha. Numba nge malunga kana vapwile navitwa, kutala kachi vahashile kufungulula maswalale vavavulu tahi? VaFwilishite vasanyikile vaze malunga mujila yakuhulamisa ngwavo: “Kandukenu kuno kuli etu, kaha namumona omu natumilinga.”—Samwele 1, 13:19-23; 14:11, 12.

VaFwilishite vashinganyekele ngwavo vakiko navazangamisa vaze malunga vavali, oloze vaze malunga vakiko vazangamishile vaFwilishite. Vaze vaIsalele vavali vashikumukile muchinema nakuputuka kukalava nakukanduka hamalwola. Vakalavile lika hamalwola nakuya kuchilombo chamaswalale javaFwilishite. (Samwele 1, 14:13) VaFwilishite vamwene jino ngwavo uze lunga apwile kulutwe apwile navitwa, kaha munyima yenyi mwapwile muka-kumumbachila vitwa vyajita. Uno uze lunga apwile nakulukuka lizavu lyamaswalale mungolo jenyi tahi? Uno ou lunga apwile wakuzaluka tahi?

Nduma, kapwile wakuzalukako, oloze apwile nalufwelelo lwakukola. Lunga kana apwile Yonatane, kaha mujimbu wenyi unahase kukafwa vaka-Kulishitu makumbi ano. Numba tuhu katwazana mujijita makumbi anoko, oloze tunahase kulinangula vyavivulu kuli Yonatane vize vinahase kutukafwa tupwenga nalufwelelo lwakukola. Vyuma kana shina kupwa vakumika, nakushishika, nakupwa namuchima wakuzakama vakwetu.—Isaya 2:4; Mateu 26:51, 52.

Hakusaka mangana twivwishise ovyo Yonatane alukukilile chilombo chamaswalale javaFwilishite, twatela kukekesa chiyoyelo chenyi chakunyima. Yonatane ikiye apwile mwana wamukulwane havana vaSaulu uze apwile mwangana wavaIsalele watete. Omu Saulu vamutongwele kupwa mwangana, halwola kanelu Yonatane apwile shina lyalunga, pamo apwile namyaka yakusemuka 20 chipwe kuhambakanyisaho. Chasoloka nge Yonatane alizangile chikuma naise uze amulwezelenga kala vyuma. Halwola kana, Yonatane katachikijile kaha ise kupwa lunga wakutaluka, wamwaza chikuma kaha nawa wakumikako, oloze amumwenenga kupwa lunga walufwelelo kaha nawa wakulinyisa. Yonatane atachikijile jino ovyo Yehova asakwilile Saulu kupwa mwangana. Kaha kapolofweto Samwele naikiye ambile ngwenyi, kakwapwile lunga wakufwana nge Saulu mulifuchi lyosenako.—Samwele 1, 9:1, 2, 21; 10:20-24; 20:2.

Yonatane achimwene kupwa hikutokwa chikuma hakwazana mujijita jize vatwaminyinenga kuli ise hakunongesa vaka-kole javatu jaYehova. Jijita kana kajapwile nganomu jili jijita jamakumbi anoko. Halwola kana, Yehova asakwile muyachi wavaIsalele umwimanyineko, kaha echi chalingishile vaufumbukilenga kuli vaka-kulemesa tulunga vamakuli lwola lwosena. VaFwilishite valemeselenga kalunga Ndangone natulunga veka vamakuli, kaha nawa vayanjishilenga nakufwila kunongesa vatu jaYehova.

Yonatane namalunga veka vakushishika vakufwana nge ikiye, vamwene kuzunga jita kupwa mulimo wakuzachila Yehova Kalunga. Kaha Yehova akiswilenga Yonatane. Omu Saulu apwile mwangana, atongwele mwanenyi atwaminyine vamaswalale 1,000, kaha Yonatane namaswalale valukukile maswalale javaFwilishite vaze vapwile kuNgeva. Numba tuhu ava maswalale kavapwile navitwa vyakuzungisa jita vyangoloko, oloze Yehova amukafwile afungulule vaka-kole jenyi. Chipwe ngocho, vaFwilishite vakiko vapwile namaswalale vangolo chikuma. Ngocho maswalale jaSaulu vevwile woma. Echi chalingishile maswalale vamwe vachine nakuswama. Oloze Yonatane apwile lika wakumika.—Samwele 1, 13:2-7; 14:21.

Halikumbi lyakuzunga jita, Yonatane namuka-kumumbachila vitwa vyajita vaseunukile nakuya. Omu vapandamine kwakamwihi nachilombo chavaFwilishite chakuMikimashe, Yonatane alwezele uze muka-kumumbachila vitwa vyajita vishinganyeka vyenyi. Kaha valisolwele kumaswalale javaFwilishite. VaFwilishite valwezele vaze malunga vezenga kuli vakiko, kaha echi chasolwele nge Yehova mwakafwa vangamba jenyi. Uze muka-kumumbachila vitwa vyajita etavilile mazu ahanjikile Yonatane akwamba ngwenyi: “Kakweshi chuma nachihonesa Yehova kutulwilako, numba tupwa tuvavavulu chipwe tuvavandende.” (Samwele 1, 14:6-10) Uno apwile nakulumbununa ika?

Yonatane atachikijile kanawa Kalunga kenyi. Atachikijile ngwenyi kunyima Yehova akafwilenga vatu jenyi vafungulule vaka-kole javo vaze vapwilenga namaswalale vavavulu. Shimbu jimwe Yehova azachishilenga mutu umwe afungulule vaka-kole javatu jenyi. (Vaka-kuyula 3:31; 4:1-23; 16:23-30) Yonatane atachikijile ngwenyi chapwile chachilemu kupwa nalufwelelo, kuhambakana kupwa vavavulu nakupwa navitwa, chipwe ngolo. Lufwelelo lwakafwile Yonatane namuka-kumumbachila vitwa vyajita vasakwile chinjikizo chakuvakafwa vatachikize numba nge vatelele kuluka chilombo chavaFwilishite, kaha nawa Yehova avetavilile valinge chuma kana. Omu Yehova avasolwelele chinjikizo, Yonatane kevwile womako.

Shinganyekenu havyuma vivali vize vyakafwile Yonatane apwenga nalufwelelo lwakukola. Chatete, evwilenga Yehova Kalunga woma. Atachikijile ngwenyi apwa Kalunga Wangolo Josena uze kapendamina hangolo javatu mangana atesemo vyuma ajinako. Oloze Yehova eji kukisulanga vangamba jenyi vakushishika vaze veji kumuzachilanga. (Mijimbu 2, 16:9) Chamuchivali, Yonatane apendaminyinenga hali Yehova shimbu kanda alinge kala chuma. Makumbi ano katwafwila kumona ngolo jaYehova mujila yakukomwesa numba tutachikize ngwetu natwitavisa tulinge vyuma vimweko. Oloze Mazu aKalunga aze vavihwima, anahase kutukafwa tulinge mwaya muchima waKalunga. (WaChimoteu 2, 3:16, 17) Uno tweji kupendaminanga haMbimbiliya shimbu kanda tusakule vyakulinga tahi? Kulinga ngocho nachisolola nge twamona kulinga mwaya muchima waKalunga kupwa chachilemu kuhambakana vyuma vize twasaka. Kaha omu mukiko alingilenga naYonatane.

Shikaho Yonatane namuka-kumumbachila vitwa vyajita, vashikumukile nakuya muchilombo chavaFwilishite. Omu vaFwilishite vamwene ngwavo chilombo chavo chili muponde, vatumine maswalale mangana vayenga nakuzunga navaze malunga vavali. VaFwilishite vapwile vavavulu, kaha nawa vapwile nachihela chakulunduka, shikaho vatelele kujiha vaze malunga vavali. Oloze Yonatane alindumwine maswalale vavavulu. Kaha uze muka-kumumbachila vitwa vyajita ikiye apwile nakumanusula vaze maswalale. Halwola lwalundende kaha, ava vatu vavali vajihile maswalale 20. Chipwe ngocho, Yehova alingile nawa vyuma vyeka. Mbimbiliya yahanjika ngwayo: “Ngocho vatu vosena muze muchilombo, navaze vapwile muchilombo chamuchipapa vevwile woma chikuma. Vaka-kupupa navakiko valizuzukilile nawoma. Mavu andendele, kaha Kalunga anehele chiwomawoma muli vatu.”—Samwele 1, 14:15.

Saulu navaka-kumulama vamwenene hahasuku liwayanga lyapwile nakusoloka kuli vaFwilishite omu vapwile nakulijiha mwavomwavo. (Samwele 1, 14:16, 20) VaIsalele jino vakwachile ngolo nakuluka vaFwilishite, kaha vatambwile vitwa vyajita vyavaFwilishite vaze vafwile. Yehova akafwile vatu jenyi vafungulule vaka-kole javo halikumbi kana. Kaha kufuma vene halwola kana Yehova kalumukako. Kachi nge nayetu natupwa nalufwelelo makumbi ano ngana mwaYonatane nauze muka-kumumbachila vitwa vyajita, kaha katweshi kukaliveya havyuma natusakula kulinga mukuyoyako.—Malaki 3:6; Wavaka-Loma 10:11.

Yonatane amwene ngwenyi Yehova ikiye avakafwile mangana vafungulule, oloze Saulu keshi mukiko amweneko. Saulu alingilenga shili yayinene chikuma. Alikangile kuli kapolofweto Samwele uze vatongwele kuli Yehova hakulumba wana uze vatelele kulumba kuli kapolofweto uze apwile kaLevi. Jino omu Samwele ahetele, alwezele Saulu ngwenyi hakuwana nge unalikange, ngocho wangana wove kaweshi kukelilako. Kufumaho, shimbu kanda Saulu atume vatu jenyi kujita, avashingilile lushingo ngwenyi: “Weshowo mwalya vyakulya shimbu kanda likumbi litoke, kaha nawa shimbu kanda nguchilinge sambanjinga kuli vaka-kole jami, mutu kana apwenga wakwangula.”—Samwele 1, 13:10-14; 14:24.

Mazu ahanjikile Saulu asolola nge aputukile kwalumuka chindende chindende. Uno ou mutu wakulinyisa wakuhya kushipilitu aputukile kulivwimba ngachilihi? Yehova kakanyishile vaze maswalale vakuhamuka vangolo kuhona kulyako. Uno mazu aSaulu akwamba ngwavo “nguchilinge sambanjinga kuli vaka-kole jami,” alumbununa nge Saulu apwile nakushinganyeka ngwenyi ikiye mwafungulula vaka-kole jenyi tahi? Uno Saulu katachikijile ngwenyi chiyulo chaYehova chikiko chachilemu chikuma kuhambakana ikiye kulinga sambanjinga, nakupwa naulemu, nakufungulula tahi?

Yonatane katachikijile vyuma vyalingishile ise ashingile vatu lushingo kanako. Omu Yonatane afumine kujita azeyele chikuma, kaha atupikile mbwechi yenyi muuchi nakulya, ngocho hahaze vene akwachile cheka ngolo. Jino mutu umwe amulwezele ngwenyi ise ketavishile vatu kulyako. Oloze Yonatane ambile ngwenyi: “Tata nanehe ukalu waunene mulifuchi. Talenu omu kunataunuka kumeso ami mwomwo yakumakilako tuuchi. Kachi nge vatu valyanga kuvyuma vapukulanga kuli vaka-kole javo likumbi lyalelo, kachi chinawahe chikuma. Mwomwo kachi tunajihi vaFwilishite vavavulu.” (Samwele 1, 14:29, 30) Yonatane alingile chuma chakwoloka. Apwile mwana wakushishika, oloze kazachishile kushishika chenyi mujila yakuhengako. Ketavililenga vyuma vyosena vize alingilenga ise chipwe kuhanjikako. Ngocho echi chalingishile vatu vavavulu vamuvumbike.

Omu Saulu atachikijile ngwenyi Yonatane nahokola lushingo lwenyi, ikiye kamwene kupihya chachuma alingileko. Ngocho ashinganyekele kujiha namwanenyi. Yonatane kalikokojwesele naise chipwe kulomba amukonekeleko. Talenu mazu ahanjikile. Ambile ngwenyi: “Yami uno, ngunalisuula ngufwenga.” Kaha vaIsalele vahanjikile ngwavo: “Kutala chinapu chakutamo Yonatane, ou nalwili vaIsalele afwenga? Nduma, kacheshi kutamoko. Omu ayoya Yehova tu, numba lukambu lumwe lwakumutwe wenyi kalweshi kuholokela hamavuko. Mwomwo Kalunga ikiye amukafwanga numba afungulule vaka-kole likumbi lyalelo.” Jino vyuma muka vyasolokele? Saulu ashinganyekele hachuma kana, kaha kamujihileko. Mujimbu kana wahanjika ngwawo: “Ngocho vatu vapululwile Yonatane, kaha kafwileko.”—Samwele 1, 14:43-45.

Kumika chaYonatane, nakuzata chenyi nangolo, nakupwa namuchima wakuzakama vakwavo, chamulingishile apwenga napuho yamwaza. Omu vatondele kumujiha, puho yenyi yamwaza yalingishile vatu vamuhakwile. Shikaho hakumbi hakumbi, twatela kushinganyekanga numba nge tuli nakutunga lijina napuho yamwaza chipwe chiku. Mbimbiliya yamba ngwayo kutunga lijina lyamwaza chapwa chachilemu. (Muka-kwambulula 7:1) Kachi nge natutunga lijina lyamwaza naYehova ngana mwaYonatane, kaha natupwa napuho yamwaza kuvatu.

Yonatane atwalileho lika kupwa wakushishika hakwazana mujijita jize atwaminyinyinenga ise, chamokomoko nakulimbenja chaSaulu. Tunahase kushinganyeka kupihya evwile, omu amwene ise naputuka kulikanga kuli Yehova nakupwa namuchima wakulivwimba. Numba tuhu ukalu kana wapwile nakutohweleko lika, oloze Yonatane kapwile nangolo jakukumisa ukalu kanako.

Ukalu kana watohwele chikuma omu Yehova atumine Saulu ayenga nakulwa jita navaAmaleke, vaze vapwile navilinga vyavipi chikuma mumakumbi aMose. Kaha Yehova ahanjikile chimweza vyakunongesa muyachi wosena wavaAmaleke. (Kulovoka 17:14) Saulu vamulwezele ajihe vimuna javo vosena nakujiha nawa Angange uze apwile mwangana wavo. Saulu afungulwile jita kana mwomwo yakumukafwa kuli Yonatane uze apwile wakuhamuka lwola lwosena. Oloze Saulu, alikangile kuli Yehova hakuhona kujiha Angange nakuhona kwenyeka luheto lwenyi, nakulama vimuna jenyi vosena. Kapolofweto Samwele alwezele Saulu kusopesa chaYehova chamakumishilo ngwenyi: “Hakuwana nge unakane kwononoka mulizu lyaYehova, ngocho nakukane kupwa umwangana.”—Samwele 1, 15:2, 3, 9, 10, 23.

Omu mwahichile lwola, Yehova afumishile shipilitu yenyi hali Saulu. Hakuwana nge Yehova kapwile jino nakutwaminyina Sauluko, ngocho Saulu apwile jino navilinga vyauhwanga, nautenu, nawoma. Chapwile kwijiva nge shipilitu yayipi yakufuma kuli Kalunga yapwile jino hali ikiye. (Samwele 1, 16:14; 18:10-12) Yonatane evwile kupihya chikuma hakumona ise uze apwile wakulinyisa mwalumuka nakupwa navilinga vyavipi. Chipwe ngocho, Yonatane kalitwaminyinyine kupwa wakushishika hakuzachila Yehovako. Akundwijilenga ise hakulinga vyuma vyakwoloka, nakumwolola lwola lwosena nge nalimbenje, kaha nawa apwile lika wakushishika kuli Ise waMwilu Yehova Kalunga.—Samwele 1, 19:4, 5.

Uno mwamonaho lyehi mutu mwazanga chikuma, pamo vene kausoko kenu mwaputuka kupwa navilinga vyavipi tahi? Chuma kana chinahase kumivwisa kupihya chikuma. Chakutalilaho chaYonatane, cheji kutwanukisanga mazu asonekele muka-kwimba jisamu ngwenyi: “Numba nge tata namama navanguseza, oloze Yehova mwanguzakama.” (Samu 27:10) Yehova apwa wakushishika. Shikaho Yehova mwamizakamanga nayenu nakupwa Senu wamwenemwene, chamokomoko nakumilinga mwamupi kuvatu.

Yonatane atachikijile ngwenyi Yehova asakile kutambula Saulu wangana. Jino Yonatane alingile ngachilihi? Kutala atachikijile omu mwakapwa mwangana uze mwakaswana ise tahi? Uno ashinganyekele ngwenyi nahase kwolola vyuma vize alimbenjele ise mangana apwenga mwangana wakushishika, kaha nawa wakwononoka tahi? Katwatachikiza vyuma apwile nakushinganyekako, oloze twatachikiza ngwetu pamo vene nakuvishinganyeka kavishinganyekeleko. Uno echi chalumbununa nge Yehova kapwile nou mutu wakushishikako tahi? Nduma. Yehova azachishile Yonatane kupwa chakutalilaho chamwaza chausepa wamwenemwene uze vasoneka muMbimbiliya. Usepa kana natuushimutwila muchihande chinakavangizaho chize nachihanjika cheka hali Yonatane.