VYUMA NAVIKAFWA TANGA | ULO
Uno Twatela Kuvangila Kutwama Hamwe Shimbu Kanda Tulimbate Tahi?
Vatu vavavulu veji kuvangilanga kutwama hamwe shimbu kanda valimbate. Vamwe veji kulinganga ngocho mangana vamone nge vanalitela nakufwelela ngwavo kulinga ngocho nachivakafwa vakafukile muulo wavo. Uno chapwa chakwoloka kuvangila kutwama hamwe shimbu kanda mulimbate tahi?
Vishina vili muchihande chino
Vyuma muka yahanjika Mbimbiliya?
Mbimbiliya yakanyisa kulisavala namutu uze kawalimbata nenyiko. Chakutalilaho, yamba ngwayo:‘Lihendenu kuujila.’ (Wavaka-Tesolonyika 1, 4:3; Wavaka-Kolinde 1, 6:18) Omu mwaliweza nakulisavala chavalunga napwevo vaze vali nakutwama hamwe shimbu kanda valimbate, numba vene nge vali nakushinganyeka kukalimbata. a Jindongi jamuMbimbiliya jeji kukinganga valunga napwevo kukulihana majimo amuujila nakuukalu weka uze weji kwizanga mwomwo yakutwama hamwe shimbu kanda kulimbata.
Kalunga ikiye ahakako ulo. Omu ahakileko ulo ahanjikile ngwenyi: “Lunga mwakaseza ise nanaye nakukalipanjika napwevo lyenyi, kaha navakapwanga mujimba umwe.” (Kuputuka 2:24) Nge valunga napwevo navapwa vakushishika kuli umwe namukwavo muulo, kaha tanga yavo nayipwa yakuwahilila nakuzama.
Uno kutwama hamwe shimbu kanda mulimbate nachimikafwa mulizange kupwa muulo tahi?
Vatu vamwe veji kwambanga ngwavo eyo. Veji kushinganyekanga ngwavo echi cheji kulingisanga valunga napwevo valizange kwingila muulo omu navazachila hamwe milimo yahakanda nakulitachikiza michima. Oloze kupwa vakashishi chikiko cheji kukafwanga valunga napwevo vapwenga vakuwahilila muulo.
Uno valunga napwevo vanahase kulipandama ngachilihi chikuma mulwola lwamwaza nelu lwalupi? Kutwama hamwe shimbu kanda kulimbata hilwola luze lunga chipwe pwevo eji kushinganyekanga ngwenyi kala lwola umwe mukachi kavo nahase kusakula kulihandununa. Kaha echi kacheshi kuhasa kuvakafwa vapwenga naulo wamwenemweneko. Oloze ulo weji kufukilanga nge valunga napwevo navapwa vakushishika kuli umwe namukwavo nakuzachilanga hamwe hakukumisa ukalu.
Chishina chachilemu: Kutwama hamwe shimba kanda kulimbata kachakafwa valunga napwevo valizange vyakwingila muuloko, oloze cheji kuvalingisanga mangana valihandunune.
Lundongi lwamuMbimbiliya: “Vyeshovyo ali nakukuva mutu, vikiko vene mwakaha nawa.”—Wavaka-Ngalesha 6:7.
Uno kutwama hamwe shimbu kanda mulimbate nachimikafwa mulameko jimbongo tahi?
Vatu vamwe veji kwambanga ngwavo eyo. Vaka-liuka lyaPew Research Center vawanyine ngwavo vatu vavavulu muUnited States vaze vapwile nakutwama hamwe shimbu kanda valimbate, valingile ngocho mwomwo yakushinganyeka ngwavo nachivakafwa vakeheseko kuzachisa jimbongo jajivulu. Chipwe ngocho, hanyima yakutwama hamwe, vavavulu vawanyine ngwavo vatwalileho kupwa najimbongo jajindende, shikaho vakukulwile ngwavo kanda valizange kulimbata.
Kutwama hamwe shimbu kanda kulimbata chinahase kuneha ukalu ukwavo chikumanyi kumapwevo. Chakutalilaho, hanyima yakulihandununa mapwevo vakiko vavula kupwa namulimo wakulela vana.
Chishina chachilemu: Kutwama hamwe shimbu kanda kulimbata cheji kunehanga ukalu wauvulu chikuma kuhambakana navyuma vize namushinganyeka ngwenu namunganyala.
Lundongi lwamuMbimbiliya: “Ami Yehova yami Kalunga kenu, Ou eji kuminangulanga mangana munganyale.”—Isaya 48:17.
Uno kutwama hamwe shimbu kanda mulimbate nachikukafwa umbate chipwe kusomboka kumutu wamwenemwene tahi?
Vatu vamwe veji kwambanga ngwavo eyo. Mukanda waFighting for Your Marriage wamba ngwawo, “vatu vaze veji kutwamanga hamwe shimbu kanda valimbate kavatachikiza ngwavo kutwama hamwe cheji kulingisanga chikaluhwe kulihandununako.” Mwomwo ika? Valunga napwevo vaze vali nakutwama hamwe shimbu kanda valimbate vanahase kuwana ngwavo kavaliteleleleko. Oloze pamo mwomwo vapita kanyama uze vazanga chikuma vosena vavali chipwe mwomwo vasayinyine lipapilo lyakulitavila kufwetelanga zuvo vatwamamo chipwe mwomwo pwevo nemita, vaka-kuhehwojola vanawane nge ava valunga napwevo vanahase kutwalaho kutwama hamwe hakuwana nge vanalijilila kaha nawa kakweshi vyuma navalumunako vize navivawahilako. b Mukanda waFighting for Your Marriage wamba nawa ngwawo, “valunga napwevo vaze vatelanga kulihandununa shimbu kanda valimbate vanahase kusakula kutwalaho lika kutwama hamwe hakuwana nge vanejilila lyehi kutwama hamwe.”
Chishina chachilemu: Kutwama hamwe shimbu kanda mulimbate chinahase kumilingisa mwingile muulo namutu uze mwakaminehela ukalu, muchishishisa chakusakula pwevo chipwe lunga wamwenemwene.
Lundongi lwamuMbimbiliya: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.”—Vishimo 22:3.
Uno kuli jila yamwaza nayikukafwa tahi?
Unahase kulihenda kuukalu uze weji kwizanga mwomwo yakutwama hamwe shimbu kanda mulimbate nakulinga vyuma vize navimikafwa mukafukile muulo wenu. Munahase kulinga ngachilihi ngocho? Hakukavangiza jindongi jamuMbimbiliya jize jahanjika haulo. Pwako nalwola lwakutachikiza kanawa mutu uli nakusaka kulimbata nenyi shimbu kanda wingile nenyi muulo. Chapwa chamwaza kusakula kumbata mutu uze afwelela nakufwila vyuma vize wafwelela nakufwila nayove, keshi uze unamono kaha ngwove wamwaza chihanga chipwe mujimbako.
MuMbimbiliya mwatwama jindongi jize jinahase kukukafwa upwenga wakuwahilila nakusuuluka muulo wove. c Chakutalilaho, muMbimbiliya mwatwama jindongi jize jinahase kukukafwa . . .
upwenga uwakushishika
upwenga lunga chipwe pwevo wamwenemwene
utachikize mwakulingila hatutenga naumona halwola muli nakulitachikiza
Hakusaka ulinangule vyavivulu hachihande kana tala chihanda chakwamba ngwavo, “Ulo naTanga” chili ha jw.org/lue.
Lundongi lwamuMbimbiliya: “Visoneka vyosena vavihwima kuli Kalunga, kaha vinawahila kunangula.”—WaChimoteu 2, 3:16.
a Tanga chihande chamuChingeleshi chakwamba ngwavo “Does Romantic Love Justify Premarital Sex?”
b Kufuma muchihande chakwamba ngwavo “Sliding Versus Deciding: Inertia and the Premarital Cohabitation Effect,” vasonekele kuli Scott M. Stanley, Galena Kline Rhoades, naHoward J. Markman, mumukanda wakwamba ngwavo Family Relations.
c Muvisemwa vimwe visemi vakiko vatwama nangolo jakusakwila mwanavo mutu wakulimbata nenyi. Nge omwo mukiko chapwa okwo mwatwama, kaha Mbimbiliya yinahase kukafwa visemi vatachikize vilinga atela kupwa navyo mutu uze navasakwila mwanavo.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Mbimbiliya Yahanjika Ika Hali Valunga naPwevo Kutwama Hamwe Okunyi Kavalimbatako?
Jindongi eji kutuhananga Kalunga jeji kutukafwanga tutachikize mwakupwila najitanga jakufukila, kaha nawa Jindongi jaKalunga jeji kukafwanga vaze veji kujikavangizanga.