Shinga yayinene yinafwane nge poko, nge muyizachisa kanawa kaha kayeshi kukulemekako, oloze nge kaweshi kuyizachisa kanawako kaha yinahase kukulemeka. Unahase kunangula ngachilihi vana vove vazachisenga kanawa shinga yayinene? Chakutalilaho, uno vatela kuzachisa shinga hajola jingahi? a

•  Vyuma watela kutachikiza

•  Vyuma watela kulinga

•  “Chisemi wazangi eji kutunganga jishimbi”

•   Shinga yayinene yinahase kwingisa mutu muukalu. Ngana muze vahanjika muchihande chakwamba ngwavo “Vanyike naJishinga Jajinene—Chihanda 1: Uno Mwanami Atela Kupwa naShinga Yayinene Tahi?” shinga yayinene yeji kulingisanga mutu awane kala mijimbu yili haInternet, yamwaza neyi yayipi.

   “Chapwa chachashi kuvulyama ngwetu jishinga jajinene jinahase kulingisa vana valikate navatu vavapi nakupwa navishinganyeka vyavipi.”—Brenda.

•   Vanyike vasakiwa kuvatwaminyina. Vanyike vanasemukila halwola chinyingi chamakina chinavulu, oloze vakulwane vavavulu vali kaha nakulinangula chinyingi kana. Chipwe ngocho, echi kacheshi nakulumbununa nge visemi kavatachikiza kanawa vyamakinako, kaha nawa vanyike vatela kulisakwila vavene mwakuzachishila shinga yayinene nalwola vatela kuyizachisako.

   Vana vanahase kupwa nauhashi wakuzachisa shinga kuhambakana visemi, oloze kacheshi nakulumbununa nge vatachikiza mwakuyizachishila mujila yakwolokako. Shikaho navana vaze vatwama nachinyingi chamwakuzachishila makina vasakiwa kuvatwaminyina kuli visemi javo hakuzachisa shinga yayinene.

   “Kuhana mwana shinga yayinene chakuzeneka kumunangula mwakuyizachishila, chinafwane nge unamuhane sapi jakuminyau nakumulweza ngwove ‘tambukisa kanawa’ chakuzeneka kumunangula mwakutambukishila.”—Seth.

•   Tachikiza omwo yazata shinga yamwanove. Tachikiza vyuma navikafwa mwanove azachisenga shinga yenyi mujila yakwoloka. Chakutalilaho:

   Uno vyuma muka vili hashinga yamwanove vize navikukafwa uyisoke yihonenga kuya hajikeyala jimwe?

   Uno watachikiza ngwove lwola lumwe vyuma kana kavyazata kanawako tahi?

   Kutachikiza kanawa omwo yazata shinga yamwanove nachikulingisa umukafwe ayizachisenga mujila yakwoloka.

   Lundongi lwamuMbimbiliya: “Vaka-mangana veji kulamanga chinyingi.”—Vishimo 10:14.

•   Tunga jishimbi. Mulweze vyuma unetavisa navize unakanyisa. Chakutalilaho:

   Uno nawitavisa mwanove anyachikenga shinga oku muli nakulya, chipwe nge munatambukila tanga chipwe masepa tahi?

   Uno nawitavisa vana vove vapwenganga najishinga mutupete twavo twakusavala ufuku wosena tahi?

   Jiapp muka nawitavisa jipwenga hashinga yamwanove?

   Uno vatela kuzachisa shinga hajola jingahi?

   Uno nauseteka lwola vatela kuzachisanga shinga hakumbi hakumbi tahi?

   Valweze jishimbi unakase, nakuvazangamisa kachi nge navajihokola.

   Lundongi lwamuMbimbiliya: “Kanda naukana kuzangamisa mukwezeko”—Vishimo 23:13, kwinyikila chamwishi.

•   Talanga mushinga yamwanove. Tachikiza mukeleko washinga yamwanove, nakutalanga vili mushinga yenyi, kuhakilako vene namijimbu, najiapp, najifwato najikeyala jahaInternet nayingaho.

   Twalwezele mwanetu ngwetu natutalanga mushinga yenyi chakuzeneka ikiye kutachikiza. Kaha nge natuwana keshi nakuyizachisa mujila yakwolokako, kaha natumuhana jishimbi jikwavo.”—Lorraine.

   Enu visemi mwatwama nalisesa lyakutachikiza omu mwanenu ali nakuzachishilamo shinga yayinene.

   Lundongi lwamuMbimbiliya: “Mwana veji kumutachikijilanga kuvilinga vyenyi, numba nge vyamwaza, vyakwoloka nyi chiku.”—Vishimo 20:11.

•   Nangula mwanove vilinga vyamwaza. Kafwa mwanove afwile kulinganga vyuma vyakwoloka. Mwomwo ika chapwila chachilemu? Mwomwo nge mwana ali nakusaka kuswekela visemi jenyi vyuma vimwe, eji kuzatanga nangolo awane jijila jakulingilamo ngocho. b

   Shikaho nangula mwanove apwenga navilinga vyamwaza vyakufwana nge kushishika, nakupwa namuchima wakulikanyisa, nakusakulanga kanawa vyakulinga. Kanyike uze ali navilinga vyamwaza, mwazachisanga shinga yenyi mujila yamwaza.

   Lundongi lwamuMbimbiliya: “Vatu vanakolo lyehi, vaze vakwechi uhashi wakukekesa vyuma uze valongesa lyehi . . . mangana vahandunune kwoloka nakuhenga.”—WavaHepeleu 5:14.