Vinjiho jaYehova veji kupwanga nakukunguluka chivali muchalumingo mujiZuvo jaWangana. Vyuma muka vyeji kupwangako, kaha munahase kunganyala ngachilihi hakupwa kukukunguluka kana?

•  Vyuma muka vyeji kusolokanga haZuvo yaWangana?

•  Mwomwo ika mwatela kuyila kuZuvo yaWangana?

•  Vyuma veji kuhanjikanga vakwenu vakweze

 Zuvo yaWangana yapwa hichihela chakulinangwila vyuma vyamuMbimbiliya. Kukunguluka chize cheji kupwanga havihela kana chinahase kumikafwa:

•   mulinangule muchano hali Kalunga.

•   mutachikize vinakulingisa kupwenga ukalu makumbi ano.

•   mupwenga vatu vamwenemwene.

•    muwane masepa vamwenemwene.

 Uno Mwatachikiza Tahi? Chihela chakukungulukila Vinjiho jaYehova vachivuluka ngwavo Zuvo yaWangana. Vachivulukila ngocho mwomwo veji kunangulanga chikuma haWangana waKalunga.—Mateu 6:9, 10; 24:14; Luka 4:43.

 Vishina navimikafwa. Jindongi jamuMbimbiliya veji kunangulanga kukunguluka chaVinjiho jaYehova najimikafwa ‘muhete mangana.’ (Vishimo 4:5) Kulumbununa nge Mbimbiliya nayimikafwa musakulenga kanawa vyakulinga mukuyoya chenu. Yinahase nawa kumikafwa muwane muvakumbulwila vihula vyavilemu vyamukuyoya vyakufwana nge:

•   Uno kuyoya chalumbunukila mulihi?

•   Kutala twatela kuhana mulonga Kalunga haukalu tuli nakumona tahi?

•   Vyuma muka vyeji kusolokanga kuli etu nge tunafu?

 Kaha kusongo yachalumingo, kuZuvo yaWangana veji kushimutwilanga hamitwe yavihande yimwe yakufwana nge:

•   Mwomwo Ika Mbimbiliya Yatela Kumitwaminyina?

•   Kulihi Munahase Kuwana Kukafwa muLwola lwaUkalu?

•   Vyuma Vize Wangana waKalunga Uli Nakutulingila Oholyapwa.

 “Mukwetu ngwatanga nenyi kushikola ejile kukukunguluka likumbi limwe. Kaha atwamine hamwe natanga yami, ngocho twazachishile hamwe mikanda yetu yize twapwile nayo. Kufumaho, angulwezele ngwenyi alikomokelele havyuma vapwile nakukumbulula vandumbwetu. Kaha ahanjikile nawa ngwenyi kuchachi yavo kavapwile namikanda yakuzachisa hakulinangula nganomu chapwa kuli yetuko.”—Brenda.

 Uno Mwatachikiza Tahi? Kavafwetesa kuZuvo yaWanganako.

 Vatu namukawana navakamikolezeza. Mbimbiliya yamba ngwayo chuma chimwe cheji kulingisanga vaka-Kulishitu valikungulwile hamwe shina mangana ‘valikolezeze.’ (WavaHepeleu 10:24, 25) Kulikata navatu vaze vamona Kalunga navakwavo vatu kupwa vavalemu chinahase kumilingisa mupwenga vakuwahilila mukaye kano kakapi.

 “Hanyima yakuzata likumbi lyamuundu ngweji kuzeyanga, oloze vatu veji kupwanga kuZuvo yaWangana veji kungulingisanga nguwahilile. Omu ngweji kufumanga kuZuvo yaWangana, ngweji kwivwanga kuwaha chikuma nakutalilila lwola lukwavo lwakukunguluka.”—Elisa.

 Uno Mwatachikiza Tahi? Mukaye kosena mwatwama vikungulwilo vyaVinjiho jaYehova vyakuhambakana 120,000, kaha nawa veji kulikungulwilanga kuvihela vyakuhambakana 60,000. Mwaka himwaka, vali nakutunganga jiZuvo jaWangana kafwe 1,500 mangana vatu vavavulu vakungulukilengamo. *