“Ngunatangenga Mbimbiliya mapapa kakavulu, oloze ngwalizakaminyinenga numba nge nangukayikumisa washi kuyitanga.”—Briana, wamyaka yakusemuka 15.

 Kutala nayove mukiko weji kwivwanga tahi? Shikaho chihande chino nachikukafwa chikuma.

•  Mwomwo ika ngwatela kutangila Mbimbiliya?

•  Ngwatela kutanga ngachilihi Mbimbiliya?

•  Vyuma veji kuhanjikanga vakwenu vakweze

 Uno kutanga Mbimbiliya cheji kukwivwisanga uli tahi? Nge mukiko kaha tunakwivwishisa. Unahase kumona Mbimbiliya kupwa himukanda waunene chikuma uze ukwechi kaha mazu aze vasoneka muvasona vavandende, kaha nawa kawatwama namivwimbimbi chipwe kala vyuma vize weji kutalanga haTV chipwe mujivindiyoko.

 Achishinganyeke hachakutalilaho chino, kachi nge unawane chikasha chakushikulu muze muli luheto lwaluvulu chikuma, kutala kaweshi kufwila kuchisokolola mangana umone vyuma vili mukachiko tahi?

 Mbimbiliya yapwa ngana mwachikasha tunavuluka. Yatwama namazu amangana aze anahase kukukafwa

•   Usakulenga kanawa vyakulinga

•   Utwamenga mukuunda navisemi jove

•   Uwane masepa vamwenemwene

•   Uhonenga kulizakamina chikuma

 Mwomwo ika natwambila ngwetu mukanda wakushikulu unahase kutukafwa namakumbi ano? Mwomwo “Visoneka vyosena vavihwima kuli Kalunga.” (WaChimoteu 2, 3:16) Echi chalumbununa nge mazu atwama muMbimbiliya afuma kumutu wamwenemwene.

 Jila yatete shina kutanga Mbimbiliya yosena yamuundu. Echi chinahase kukukafwa utachikize kanawa mujimbu watwamamo. Kwatwama jijila jajivulu unahase kuzachisa hakutanga Mbimbiliya. Tala havyakutalilaho vino:

•    Unahase kutanga mikanda yosena 66 yatwama muMbimbiliya kweseka nomu yalikavangijila kufuma kumukanda waKuputuka kuheta kumukanda waKusoloka.

•    Unahase kutanga Mbimbiliya kweseka nalwola vyuma vyasolokele.

 Vyuma navikukafwa: MuVihande Vyakuhakilako A7 vyamuMbimbiliya yaKaye Kakahya mwatwama mukana wavyuma vyavilemu vyasolokele mukuyoya chaYesu hano hamavu.

 Jila yamuchivali yakutangilamo Mbimbiliya shina kutanga mujimbu uze unalitombola naukalu uli nakuhitamo. Chakutalilaho:

•   Kutala musaka kupwa nasepa wamwenemwene tahi? Tanga mujimbu wa Yonatane naNdavichi. (Samwele 1, kapetulu 18-20) Kufumaho wana vilinga vyamwaza apwile navyo Ndavichi vize vyalingishile Yonatane apandame kuli ikiye.

•   Kutala uli nakusaka kutachikiza mwakuhonesela vyeseko tahi? Tanga mujimbu waYosefwe mangana utachikize omu ahonesele cheseko. (Kuputuka, kapetulu 39) Wana mutu ahanyine ngolo Yosefwe jakufungula cheseko.

•   Kutala uli nakusaka kutachikiza omu kulomba chinahase kukufwa tahi? Tanga mujimbu waNehemiya. (Nehemiya, kapetulu 2) Wana omu kulomba chakafwile Nehemiya.

 Vyuma Navikukafwa: Omu nautanganga Mbimbiliya, watela kuyitangilanga kuchihela kuze kakweshi vyemako, echi nachikukafwa wivwishise kanawa ovyo uli nakutanga.

 Jila yamuchitatu yakutangilamo Mbimbiliya shina kusakula mujimbu chipwe samu, yitange kaha kufumaho shinganyeka omu vyuma unatange navikukafwa. Hanyima yakutanga lihulise vihula vino:

•    Mwomwo ika Yehova etavishile vyuma kana vavisoneke muMbimbiliya?

•    Uno vyuma kana vyasolola ngachilihi vilinga vyaYehova chipwe omwo eji kulingilangamo vyuma?

•    Ngunahase kuzachisa ngachilihi vyuma ngunatange mukuyoya chami?

 Vyuma Navikukafwa: Zachisa Mbimbiliya yaVisoneka vyaKaye Kakahya yakulinangwila kaha haInternet mangana uwane jivindiyo, najimapu navyuma vikwavo vize navikukafwa wivwishise kanawa vyuma unatange muMbimbiliya.