Mukweze umwe walijina lyaWill ambile ngwenyi: “Unahase kwivwa uli kutanga Mbimbiliya kachi nge kawatachikijile kanawa mwakuyitangilako.”

 Kutala musaka kutachikiza vyuma vinahase kukukafwa ulivwisenga kuwaha kutanga Mbimbiliya tahi? Chihande chino nachikukafwa chikuma.

•  Shinganyeka uli nakumona vyuma unakutanga

•  Hehwojola

•  Vyuma veji kuhanjikanga vakwenu vakweze

 Shinganyeka havyuma uli nakutanga kwijiva nge vili nakusoloka. Hakulinga ngocho watela kuzachisa jijila jino

1.   Sakula mujimbu wamuMbimbiliya uze unakusaka kulinangula. Unahase kusakula kutanga vyuma vimwe vyasolokele chipwe chihanda chimwe chamumukanda waMujimbu Wamwaza, chipwe kusakula mujimbu umwe waha jw.org wakutanga Mbimbiliya nge hichimweso.

2.   Tanga mujimbu unasakula. Unahase kuutanga ukawove, chipwe kuutangila hamwe namasepa jove chipwe navaka-tanga yove. Hakusaka kulinga ngocho, mutu umwe nahase kutanga mazu akujimbula mujimbu unasakula. Kaha vakwavo vanahase kutanga mazu avatu veka vali mumujimbu kana.

3.   Sakula chuma chimwe chipwe vyavivulu havyuma vino vinakavangizaho:

   •   Funjika mivwimbimbi yize nayisolola mujimbu unakutanga kweseka nomwo vyalikavangijilile vyuma unakutanga mumujimbu kana. Kaha hamuvwimbimbi himuvwimbimbi sonekaho mazu amandende aze anakulumbununa vyuma vinakusoloka.

   •   Kachi nge uli nakutanga mujimbu wamutu wakushishika, kaha watela kusoneka vilinga vyenyi nomwo vamukiswile hakusakula kanawa vyakulinga.

   •   Sakula mujimbu umwe unatange nakuwambulula kuli vakwenu. Pwenu nalwola ‘lwakwihwojola’ vaze vanemanyinako vatu vali mumujimbu kana navaze vanemanyinako vatu vaze vamwene vyuma vyasolokele mumujimbu kana.

   •   Nge mutu umwe uze unatange mumujimbu asakwile vyuma vyakuhenga, kaha shinganyeka havyuma vyamwaza atelele kulinga. Chakutalilaho, tala hamujimbu waPetulu wakukana Yesu. (Mako 14:66-72) Vyuma muka vyamwaza atelele kulinga Petulu?

   •   Nge unasake, unahase kusoneka chimweso chove chize chinazame hamujimbu wamuMbimbiliya unatange. Kufumaho soneka vyuma unalinangula kumujimbu kana.—Wavaka-Loma 15:4.

 Kachi nge muhehwojola chikuma kaha nauwana vishina vyavilemu vili mumujimbu kana. Lwola lumwe unahase kuwana lizu limwe chipwe avali mumujimbu mutanga aze amalemu chikuma.

 Chakutalilaho, esekesa Mateu 28:7 naMako 16:7.

•    Mwomwo ika Mako avulukile ngwenyi, Yesu mwasoloka kuli tumbaji twenyi nakuli “Petulu”?

•  Vyakukukafwa: Tachikiza ngwove Mako kamwene omu vyuma kana vyasolokeleko, oloze Petulu ikiye amulwezele vyuma kana.

•  Vyuma vyavilemu unahase kuwana mukuhehwojola: Mwomwo ika Petulu evwilile kuwaha hakumulweza ngwavo Yesu apwile nakusaka kumumona cheka? (Mako 14:66-72) Uno Yesu asolwele ngachilihi ngwenyi apwile chikupu sepa lyaPetulu? Uno unahase kulondezeza ngachilihi Yesu nakupwa sepa wamwaza kuli vakwenu?

 Kachi nge nautanga kanawa Mbimbiliya nakuhehwojola, kaha mulivwisa kuwaha chikuma kuyitanga.