MujiMbimbiliya jimwe vazachisa lizu “helo” muchishishisa chakuzachisa lizu lyachiHepeleu “Sheyole” nalyachiHelase “Hetese” aze alumbununa fuka yavatu vosena. (Samu 16:10; Vilinga 2:27) Vatu vavavulu vafwelela ngwavo, kwatwama kakahya kahelo, nganomu vanasolola mumuvwimbimbi uli helu. Oloze omu keshi mukiko yanangula Mbimbiliyako.

1.   Vatu vaze vali muhelo kavatachikiza chuma numba chimweko kaha nawa kavevwa kukolako. Mbimbiliya ngwayo: “MuFuka nauya kamweshi milimo, chipwe kujina, chipwe chinyingi, chipwe manganako.”—Muka-kwambulula 9:10.

2.   Vatu vavilinga vyamwaza veji kuyanga muhelo. Yakova naYopa vaze vapwile vakushishika, navakiko vatachikijile ngwavo mukiko navakaya.—Kuputuka 37:35; Yopa 14:13.

3.   Fweto yashili yapwa kufwa keshi kuyekelesa mutu mukakahya kaheloko. Mbimbiliya ngwayo: “Ou nafu lyehi, nasambe lyehi kushili yenyi.”—Wavaka-Loma 6:7.

4.   Kuyekelesa vatu mukakahya, chalimbalaka nachiyulo chaKalunga. (Lushimbi lwamuchivali 32:4) Omu mutu watete Alama alingile shili, Kalunga amulwezele ngwenyi keshi kukapwako chekako. Ambile ngwenyi: “Unapu ulukungu, kaha naukakinduluka cheka kulukungu.” (Kuputuka 3:19) Ngocho kachi nge Kalunga ayekelesele Alama mukakahya kahelo, kachi asolokele kupwa muka-makuli.

5.   Kalunga kajina ngwenyi mwakayekelesa vatu mukakahya kaheloko. Kunangula chakuzangamisa vatu mukakahya kahelo chalimbalaka nakunangula chamuMbimbiliya chakwamba ngwavo “Kalunga ikiye zangi.”—WaYowano 1, 4:8; Yelemiya 7:31.