Nduma. Mbimbiliya kayahanjika ngwayo jimbongo japwa jajipi, chipwe ngwayo jikiko jika kuneha vyuma vyavipi vyosenako. Vatu vavavulu veji kuhanjikanga ngwavo ‘jimbongo jikiko jika-kuneha vyuma vyavipi vyosena’ mwomwo mukiko yahanjika Mbimbiliya. Oloze hanjikiso kana kayapwa yamuchanoko, kaha nawa yeji kuhungumwisanga vatu, mwomwo Mbimbiliya yamba ngwayo, “zangi yakuzanga jimbongo yinapu mwiji wavyuma vyavipi vyosena.”—WaChimoteu 1, 6:10.

• Uno Mbimbiliya yahanjika vyuma muka hajimbongo?

• Mwomwo ika Mbimbiliya yatuhuhumuna tulihende kukuzanga jimbongo?

• Uno vyuma yahanjika Mbimbiliya hajimbongo navitunganyalisa ngachilihi?

• Jivesi jamuMbimbiliya jize jahanjika hajimbongo

 Mbimbiliya yahanjika ngwayo nge vatu navazachisa kanawa jimbongo, kaha jinahase kuvakafwa ‘nakuvakinga.’ (Muka-kwambulula 7:12) Kaha nawa Mbimbiliya yasangejeka vaze veji kuhananga vakwavo vyuma. Vyuma vimwe shina jimbongo.—Vishimo 11:25.

 Oloze Mbimbiliya yatuhuhumuna nawa tulihende kukuzanga jimbongo mukuyoya chetu. Yamba ngwayo: “Kutwama chenu chipwenga chakuzeneka kuzanga jimbongo, oku munasuuluka navyuma muli navyo.” (WavaHepeleu 13:5) Chishina natulinangula kuli echi chisoneka shina kuzachisanga kanawa jimbongo, keshi kufwila luhetoko. Oloze twatela kusuuluka navyuma vize twasakiwa chikuma mukuyoya, vyuma kana shina vyakulya, vyakuvwala nazuvo yakusavala.—WaChimoteu 1, 6:8.

 Vaka-chipululu kaveshi kukayoya haya myaka yosenako. (Wavaka-Efwesu 5:5) Tachikizenu ngwenu chipululu nachikiko chapwa kulemesa makombelo, chipwe ngwetu kulemesa chamakuli. (Wavaka-Kolose 3:5) Kaha nawa kakavulu vaka-chipululu kavakavangiza jindongi jamwazako hakusaka kuwana vyuma vali nakusaka. Mukanda waVishimo 28:20 wamba ngwawo, “ou mwawana luheto muwashiwashi keshi kukasambako.” Vatu kana vanahase kupwa mucheseko chakulinga vyuma vyavipi. Vyuma vimwe shina wiji, chipwe kulyapula chipwe kujiha vatu.

 Numba tuhu mutu uze mwazanga jimbongo keshi kupwa navilinga vyavipiko, oloze nahase kumona ukalu weka. Mbimbiliya ngwayo “vaze veji kufwilanga kupwa naluheto veji kwingilanga mucheseko namumuheto, namukufwila cheka nacheka chamokomoko chachipi.”—WaChimoteu 1, 6:9.

 Kachi nge natulihenda kukulinga vyuma vyavipi nakulinga vyuma vize navivwisa Kalunga kuwaha, kaha natupwa tuvatu vavilinga vyamwaza. Kaha nawa Kalunga mwatwivwila uselewa nakutukafwa. Kalunga ashika vatu vaze veji kumwivwisanga kuwaha ngwenyi, ‘keshi kukavasezako, keshi kukavambilako.’ (WavaHepeleu 13:5, 6) Kaha nawa atufwelelesa ngwenyi, “mutu wakushishika navakamukisula mwamunene.”—Vishimo 28:20.