Uno Kalunga Atwama Kwosena Tahi?

PUTUKA KWIMBISA

Vyuma Yakumbulula Mbimbiliya

Kalunga eji kumonanga vyuma vyosena nakulinga kala vyuma kukala chihela nasake. (Vishimo 15:3; WavaHepeleu 4:13) Shikaho Mbimbiliya kayanangula ngwayo Kalunga atwama kwosena, chipwe ngwayo atwama muvyuma vosenako. Oloze yamba ngwayo apwa mutu, kaha nawa atwama kuchihela chimwe.

Omu apwa Kalunga: Kalunga apwa shipilitu. (Yowano 4:24) Shikaho vatu kaveshi kuhasa kumumonako. (Yowano 1:18) Vyakumwenesa vyakuli Kalunga vize vasoneka muMbimbiliya, vyasolola nge Kalunga atwama kuchihela chimwe. Kavamuvuluka ngwavo atwama kwosenako.—Isaya 6:1, 2; Kusoloka 4:2, 3, 8.
Okwo atwama Kalunga: Kalunga atwama kuchihela chimwe chakushipilitu kuze kakwatwama vatuko. Chihela kana chapwa ‘mwilu muze atwama’ Kalunga. (Vamyangana 1, 8:30) Mbimbiliya yahanjika nge vangelo “vejile nakwimana kumeso aYehova,” * kulumbununa nge Kalunga atwama kuchihela chimwe.—Yopa 1:6.

Kachi nge Kalunga katwama kwosenako, kutala nahase kutuzakama tahi?

Eyo. Kalunga eji kutuzakamanga mutu himutu. Numba tuhu atwama kuchihela chimwe chakushipilitu, oloze eji kumonanga vosena vaze vatwama hamavu, vaze vasaka kumwivwisa kuwaha, kaha nawa eji kuvakafwanga. (Vamyangana 1, 8:39; Mijimbu 2, 16:9) Talenu omu Yehova asolola nge azakama vangamba jenyi vakushishika:

Nge muli nakulomba: Yehova nahase kwivwa kulomba chenu hahaze vene namumulomba.—Mijimbu 2, 18:31.
Nge munahombo: “Yehova ali hakamwihi navaze vali nakulyonyinga mumuchima. Kaha eji kulwilanga vaze vanahombo.”—Samu 34:18.
Nge muli nakusaka kusakula vyakulinga: Yehova ‘mwamihana kunangakana nakumilweza’ vyakulinga kuhichila muMazu enyi Mbimbiliya.—Samu 32:8.

Vishinganyeka vyakuhenga kutalisa okwo atwama Kalunga

Vishinganyeka vyakuhenga: Kalunga atwama muvyuma vyosena vyakutenga.

Muchano: Kalunga katwama hano hamavu chipwe muutangatangako. (Vamyangana 1, 8:27) Vatanganyika navyuma vyeka vyakutenga vyeji “kuvilikanga upahu waKalunga.” (Samu 19:1) Shikaho Kalunga katwama muvyuma vize atengako, ngana muze muka-kufunjejeka keshi kupwa muvyuma nafunjejekako. Chipwe ngocho, vyuma eji kufunjijekanga vikiko vyeji kutukafwanga tutachikize omwo apwa mutu kana. Chochimwe nawa, vyuma vize atenga Yehova vyasolola “vilinga vyenyi” vyakufwana nge ngolo, namangana nazangi.—Wavaka-Loma 1:20.

Vishinganyeka vyakuhenga: Kalunga atela kupwa kwosena numba ahase kutachikiza vyuma vyosenevi nakupwa nangolo.

Muchano: Shipilitu yajila yaKalunga yapwa hingolo jenyi jize jeji kuzatanga milimo. Kalunga nahase kuzachisa shipilitu yenyi yajila hakulinga kala chuma, kukala chihela kaha nawa kala lwola, numba nge keshi kuchihela kanako.—Samu 139:7.

Vishinganyeka vyakuhenga: Mukanda waSamu 139:8 wanangula ngwawo Kalunga atwama kwosena hakuhanjika ngwawo: “Kachi nge nanguya mwilu, naungumona. Kachi nge nangwala kahela kami muFuka, naungumona lika.”

Muchano: Ou mukanda kawahanjika kuchihela atwama Kalungako, oloze watunangula ngwawo kakweshi chihela chize tuhase kutwama, chize nachikulingisa Kalunga ahone kutukafwako.

^ Kweseka naMbimbiliya, Yehova likiko lijina lyaKalunga.