Nduma, Mbimbiliya kayanangula ngwayo mavu apwa akusamatatako. * Numba tuhu Mbimbiliya kayapwa himukanda wasayasiko, oloze yahanjika mwakwoloka havihande vyasayasi. Vyuma yahanjika Mbimbiliya twatela ‘kuvifwelela oholyapwa nahaya myaka yosena.’—Samu 111:8.

•  Uno Mbimbiliya yatalisa mulihi hakwamba ngwayo “kusongosongo yamavu”?

•  Vyuma muka yahanjika Mbimbiliya havyuma vize Liyavolo amwenesele Yesu?

 Mazu akwamba ngwavo “kusongosongo yamavu” aze atwama muMbimbiliya, kawalumbununa nge mavu atwama nasongoko. (Yopa 37:3) Shikaho mazu kana vawazachisa mujila yachifwanyisa aze atalisa kumavu kwosena. Mbimbiliya yazachisa mitamba yamavu mujila yoyimwe ngana muze yapwa kapasi.—Luka 13:29.

 Lizu lyachiHepeleu valumuna ngwavo “kusongosongo” valizachisa mujila yachifwanyisa lize lyatalisa “kumavava.” Mukanda waThe International Standard Bible Encyclopedia wahanjika ngwavo: “Hakuwana nge livava lyakajila lyeji kufwikanga vana venyi, ngocho [eli lizu lyachiHepeleu] lyalumbununa kala chuma chize nachitanduuka.” Kaha mukanda woumwe wamba ngwawo lizu “kusongosongo” vazachisa hali Yopa 37:3, lyalumbununa “jingiza chipwe kujimbango josena jamavu.” *

 Hakusaka kweseka Yesu, “Liyavolo amutwalile nawa kupili yayisuku chikuma, kaha amulwekesele mawangana osena akaye naupahu wawo.” (Mateu 4:8) Vatu vamba ngwavo ou mujimbu wamuMbimbiliya wanangula ngwawo kwatwama chihela chimwe haze unahase kumwena kaye kosena. Oloze chasoloka nge “pili yayisuku chikuma” yize vavuluka haChisoneka kana yapwa yachifwanyisa, keshi nge pili yize tunahase kumonako. Talenu ovyo tunahanjikila ngocho.

•   Hano hamavu kahatwama pili haze tunahase kwimana nakumona mawangana osena amukayeko.

•   Liyavolo alwekesele Yesu mawangana osena amukaye “naupahu wawo.” Uze upahu kawasolokelele hahasukuko, oloze chasoloka nge Liyavolo azachishile chakumwenesa hakulwekesa Yesu vyuma kana. Echi chalifwana namutu uze mwazachisa projector chipwe chisaji chamivwimbimbi hakutalisa mivwimbimbi yakulisezaseza yavihela vyahano hamavu.

•   Mujimbu wahali Luka 4:5 wahanjika ngwawo “mukapyapya kakandende kaha [Liyavolo alwekesele Yesu] mawangana osena ahamavu,” vyuma vize mutu keshi kuhasa kumona namesoko. Shikaho echi chalumbununa nge Liyavolo esekele Yesu kuzachisa vyuma vimwe vize vatu kaveshi kuhasa kumonako.