Mbimbiliya kayazachisa mazu “kufumisa lijimo” kutalisa kukujiha mwana uze kanda asemukeko. Chipwe ngocho, jivesi jajivulu muMbimbiliya jasolola omu Kalunga amona kuyoya kuhakilako vene nakuyoya chamwana uze kanda asemuke.

 Kuyoya chapwa wana wakufuma kuli Kalunga. (Kuputuka 9:6; Samu 36:9) Kalunga amona kuyoya chosena kupwa chachilemu, kuhakilako vene nakuyoya chamwana ali mujimo. Shikaho nge mutu mwafumisa lijimo chakulisakila, kaha mwapwa namulonga wakujiha mutu.

 Jishimbi jize Kalunga ahanyine vaIsalele jambile ngwajo: “Kachi nge malunga navalizungisa mwavomwavo nakukuka pwevo ali nalijimo, kaha uze pwevo himwasema mwana wamuvisu, oloze ikiye namwanenyi kavafwileko, uze namukuku afwete mulonga navamutomena kuli lunga lyayauze pwevo. Mulonga kana aufwete kuhichila muli vaka-kuyula. Oloze nge umwe nafu, kaha mukalinge mwono namwono ndwa.”—Kulovoka 21:22, 23. *

•  Uno kuyoya chamutu cheji kuputukanga lwola muka?

•  Uno Kalunga nahase kukonekela mutu uze alifumishile lijimo tahi?

•  Uno chapwa chakuhenga kulifumisa lijimo nge kuyoya chamwana chipwe chanaye chili muponde tahi?

 Kalunga eji kuputukanga kumona kuyoya chamutu kupwa chachilemu hahaze vene naye mwemita. Kakavulu Mbimbiliya yasolola nge Kalunga eji kumonga mwana uze kanda asemuke kupwa mutu nahenyi. Talenu vyakutalilaho vimwe vize vyasolola nge Kalunga eji kumonanga kuyoya chamwana uze achili mujimo nauze nasemuka lyehi kupwa chochimwe.

•   Mwangana Ndavichi ambile kuli Kalunga ngwenyi: “Meso ove angumwene shimbu ngwapwile ngumuvisu.” (Samu 139:1) Kalunga amwene Ndavichi kupwa mutu nahenyi shimbu kanda asemuke.

•   Chikwavo nawa, Kalunga atachikijile ngwenyi kapolofweto Yelemiya mwakazata mulimo wakulipwila, shimbu kanda naYelemiya asemuke. Kalunga amulwezele ngwenyi: “Ngwakutachikijile shimbu kanda ngukutenge mujimo lyanoko, Ngwakujilikile shimbu kanda usemuke. Ngwakutongwele upwenga ukapolofweto kuli vaka-mafuchi eka.”—Yelemiya 1:5.

•   Luka uze apwile chimbuke azachishile lizu lyachiHelase lyolimwe hakulumbununa mwana uze kanda asemuke nauze nasemuka lyehi.—Luka 1:41; 2:12, 16.

 Yehova nahase kukonekela vatu vaze valifummishile majimo. Shikaho nge vanatachikiza jino ngwavo Kalunga amona kuyoya kupwa chachilemu, kaha kavatela kulihana mulonga wavyuma valingile kunyimako. “Yehova apwa wakeke nakutetela . . .Nganomu mututuko wasosoloka kumulauko, mukiko atusosolwela milonga yetu yakuzombwojoka jishimbi.” * (Samu 103:8-12) Yehova eji kukonekelanga vosena vaze veji kupihililanga nakwalumuka kushili yize valingile kunyima kuhakilako vene nakulifumisa lijimo.—Samu 86:5.

 Kweseka nomu yahanjika Mbimbiliya kutalisa kukuyoya chamwana uze kanda asemuke, mutu kavatela kumusambisa kachi nge nafumisa lijimo mwomwo yaukalu waunene chikuma wakumujimba, uze unahase kuhaka kuyoya chenyi muponde chipwe kuyoya chamwanako.

 Nyi ngachilihi ukalu uze unahase kwizanga mukukasumuna hakusapuluka, uze nawa nausakiwa kuyovola kuyoya chamwana chipwe chanaye? Halwola lwangana mutu uze ali muukalu atela kulisakwila yivene vyakulinga.