Mbimbiliya yatukolezeza tuhanenga vakwetu chakufuma kumuchima, kaha nawa navishinganyeka vyakwoloka. Yasolola nawa nge kuhana chakufwana ngana cheji kunganyalisanga uze mwahana nauze mwatambula. (Vishimo 11:25; Luka 6:38) Yesu ambile ngwenyi: “Kuhana cheji kunehanga kuwahilila chikuma kuhambakana kutambula.”—Vilinga 20:35.

•  Lwola muka kuhana cheji kunganyalisanga?

•  Lwola muka kuhana cheji kupwanga chakuhenga?

•  Visoneka vyamuMbimbiliya vize vyahanjika hakuhana

 Kuhana cheji kunganyalisanga kachi nge mutu mwahana namuchima wosena. Mbimbiliya yahanjika ngwayo: “Mutu himutu alinge nge omwo najinyi mumuchima wenyi, keshi nge nakunyengetelako, chipwe nakulishinjilako, mwomwo Kalunga azanga muka-kuhana nakuwahilila.”—Wavaka-Kolinde 2, 9:7.

 Kuhana chakufuma kumuchima chapwa “kwitava” chize etavila Kalunga. (WaYakova 1:27, kwinyikila chamwishi) Mutu uze atwama namuchima wakuhana vaka-kukalikiza eji kuzachilanga hamwe naKalunga uze amona kuhana kana kupwa nge himukuli kuli ikiye. (Vishimo 19:17) Mbimbiliya yatulweza ngwayo, Kalunga ikiye eji kufwetenga vaze vatwama namuchima wakuhana.—Luka 14:12-14.

 Kachi nge mutu mwahana mwomwo yakusaka kunganyalilaho. Chakutalilaho:

•   Nge anakusaka kusuulwisa vatu.—Mateu 6:2.

•   Nge anakusaka naikiye vamuhaneko vyuma vimwe.—Luka 14:12-14.

•   Nge mutu mwashinganyeka ngwenyi Kalunga mwakamuyovola hakuhana wana.—Samu 49:6, 7.

 Kachi nge wana natuhana navauzachisa kuvyuma ahunga Kalunga. Chakutalilaho, chapwa chakuhenga kuhana mutu jimbongo mangana ayenga nakuhema njuka, chipwe kulanda maundu akupendesa chipwe kunwisa wala. (Wavaka-Kolinde 1, 6:9, 10; Wavaka-Kolinde 2, 7:1) Chochimwe nawa, chapwa chakuhenga kuhana vyuma mutu uze nahase kulizakama ivene, oloze kasakile kuzatako mwomwo yauvwa.—Wavaka-Tesolonyika 2, 3:10.

 Kachi nge natufwila kuhana kaha vatu veka nakusuvilila tanga yetu. Mbimbiliya yanangula ngwayo, mitwe yajitanga yatela kuhananga jitanga javo vyuma vyasakiwa mukuyoya. (WaChimoteu 1, 5:8) Nachipwa chakuhenga kuli mutwe watanga kuhananga kaha vatu veka nakwechelela tanga yenyi yiliyanjile. Chochimwe nawa, Yesu ahuhumwine vaze vakanyinenga kuzakama visemi javo vatushinakaji hakushinganyeka ngwavo, vikumba vyavo vatela kuvihana kupwa “wana wakuhana Kalunga.”—Mako 7:9-13.