Eyo. Yesu apwile nakulumbununa ngwenyi vaka-kumukavangiza vanahase kuvoka kuzachisa vitumbo hakuhanjika ngwenyi, “vatu vavakangule kaveshi kusakiwa chimbukeko, kuvanga vaka-kuviza kaha.” (Mateu 9:12) Numba tuhu Mbimbiliya kayapwa himukanda wajindongi jamwakukila misongoko, oloze yatwama najindongi jakutukafwa tulinge mwaya muchima waKalunga.

Lihulisenu ngwenu

 1. Uno ngunatachikiza kanawa jila vatela kungukilamo tahi? Mbimbiliya yatukolezeza ngwayo, twatela kufwila kuwana unjiho wosena muchishishisa ‘chakwitavila vyuma vyosena navatulweza.’—Vishimo 14:15.

 2. Uno ngwatela kusakulako jila yamuchivali chipwe yamuchitatu yakungukilamo tahi? Nge “vaka-kulweza mangana vanavulu,” kaha nachipwa chachilemu chikumanyi nge musongo waunene chikuma.—Vishimo 15:22.

 3. Uno jila vanakusaka kungukilamo yalimbalaka najindongi jamuMbimbiliya jize jahanjika ‘hakulihenda kumanyinga’ tahi?—Vilinga 15:20.

 4. Uno jila vanakusaka kuzachisa hakunguka yakundwiza kupanda tahi? Mbimbiliya yahunga “kupanda.” (Wavaka-Ngalesha 5:19-21) Hakusaka mutachikize numba nge jila kana yakundwiza kupanda, kaha kekesenu havihula vino:

•   Uno chimbanda kana atwama napuho yakupanda tahi?

•   Kutala kuka chenyi chapendamina hakufwelela ngwenyi musongo naviji mutu unafumu kuli vakulu chipwe hakumulova kuli vaka-kole tahi?

•   Uno hakuwahisa nakuzachisa vitumbo eji kukombelela chipwe kusakutwiza nakulinga visava vyeka vyakupanda tahi?

 5. Uno ngweji kushinganyeka chikuma hakulikangula chami tahi? Mbimbiliya yatuhuhumuna ngwayo: “Vatu vosena vamone ngwavo mwapwa muvaka-kwashiwisa muchima.” (Wavaka-Fwilipi 4:5) Shikaho kwashiwisa muchima nachimikafwa mushinganyekenga ‘havyuma vyavilemu’ chikuma vyakufwana nge kuzachila Yehova.—Wavaka-Fwilipi 1:10; Mateu 5:3.