Hakuwana nge Mbimbiliya kayahanjika chikuma hachihande kanako, ngocho kayakanyisa kulilenga nakuvwala vimbilingwa najijila jeka jakuliwahishilamoko. Mbimbiliya kayahanjika chikuma hakuliwahisa kumujimba, oloze yahanjika chikuma hakuliwahisa “chakuvwala uvwalo wakuhona kupola washipilitu yayivwovu yakuunda.”—WaPetulu 1, 3:3, 4.

•   Mapwevo vakushishika vaze vavuluka muMbimbiliya valiwahishilenga kumujimba. Laveka uze apwile pwevo lyaIsaka mwanaApalahama, avwalilenga kazeya kaulu kahamuzulu, namaseka aulu navimbilingwa vyeka vyandando yayinene vize vamuhanyine kuli mutu uze ejile nakupwa isewenu. (Kuputuka 24:22, 30, 53) Kaha nawa Eseta, vamukwichilenga “maji akuwahisa mujimba” mangana alizange kuzata kanawa mulimo waunene wakupwa mwangana wapwevo wavaka-Peleja. (Eseta 2:7, 9, 12) Kaha “maji akuwahisa mujimba” vamukwichilenga, mwaliwezele navyuma vyeka vyakulikwita kumeso.

•   Vimbilingwa vavizachisa kupwa vifwanyisa vyamwaza muMbimbiliya. Chakutalilaho, mutu uze mwahanjika mazu amwaza kuli mukwavo vamufwanyisa kupwa ‘tupata twaulu twakumatwitwi . . . kuli muka-kwivwilila.’ (Vishimo 25:12) Kaha nawa Kalunga afwanyishile jila azakaminyinemo muyachi wavaIsalele kulunga uze mwavwika mwenga wenyi maseka, nausanga wamushingo, natupata twakumatwitwi. Kuzakama muyachi wavaIsalele mujila kaneyi chalingishile muyachi kana upwenga “wamwaza chikuma.”—Ezekele 16:11-13.

 Vishinganyeka vyakuhenga: Chapwa chakuhenga kulikwita “ulombo” kumeso mwomwo vauzachishilenga kuli Lisano wamupi muchima Yezevele.—Vamyangana 2, 9:30.

 Muchano: Yezevele uze apwile navilinga vyakupanda kaha nawa chilyanyi, vamuzangamishile mwomwo yakupwa navilinga vyaukenya keshi mwomwo yasolokeso yenyiko.—Vamyangana 2, 9:7, 22, 36, 37.