Mbimbiliya kayahanjika hakunwa makanya * chipwe hakunwa maundu akupendesako. Oloze yatwama najindongi jize jasolola nge, Kalunga ketavisa vatu valinge vyuma vyosena vyakwenyeka mujimbako. Shikaho amona kunwa makanya kupwa shili.

•   Kumona kuyoya kupwa chachilemu. “Kalunga . . . eji kuhananga vatu vosena kuyoya nakuhwima navyuma vyosena.” (Vilinga 17:24, 25) Hakuwana nge kuyoya chafuma kuli Kalunga, ngocho katwatela kulinga kala vyuma vize navitulingisa tuyoye myaka yayindendeko. Kunwa makanya cheji kunehanga misongo yize yeji kujihanga vatu vavavulu mukaye.

•   Zangi yakuzanga vakwetu. “Zangenunga vakwenu nganomu mwalizanga enu vavene.” (Mateu 22:39) Kunwina makanya hakachi kavatu kachasolola zangiko. Kaha vatu vaze vavula kuhwima wishi wamakanya kuswakumwe, veji kuvizanga misongo yize veji kuvizanga vaka-makanya.

•   Twatela kupwanga vajila. “Hanenu mijimba yenu kupwa chimuna wakuvatula wamutonyi, wajila, wakwitavila kuli Kalunga.” (Wavaka-Loma 12:1) “Tulitomesenu kuvyuma vyosena vyakupihisa mujimba nashipilitu, tukupwisenunga kujila chetu muwoma waKalunga.” (Wavaka-Kolinde 2, 7:1) Kunwa makanya kachalingisa mutu apwenga wajila kulumbununa kupwa utomako, mwomwo vaka-kunwa makanya veji kulinganga vyuma vize vyeji kwenyekanga mujimba.

 MuMbimbiliya kavavulukamo lyamba chipwe kala maundu eka akupendesako. Oloze yatwama najindongi jize kajakundwiza kunwa vyuma vyakupendesa mwomwo yachisekeko. Kaha nawa jindongi jinakavangizaho, najikiko jinahase kuzata:

•   Twatela kukinga vishinganyeka vyetu. “Zangenunga Yehova Kalunga kenu . . . navishinganyeka vyenu vyosena.” (Mateu 22:37, 38) “Lamenunga chikuma uhashi wenu wakushinganyeka kanawa.” (WaPetulu 1, 1:13) Kachi nge mutu ali nakunwanga makanya namaundu akupendesa, keshi kuhasa kukinga vishinganyeka vyenyiko. Vatu kana kavashinganyeka vyuma vyekako, oloze veji kushinganyekanga kaha kunwa makanya namaundu akupendesa.—Wavaka-Fwilipi 4:8.

•   Kwononoka jishimbi jafulumende. ‘Ononokenunga kujifulumende nakumawata.’ (WaChituse 3:1) Mumafuchi amwe, jifulumende jakanyisa kunwa makanya namaundu akupendesa. Shikaho nge tunakusaka kwivwisa kuwaha Kalunga, kaha twatela kwononoka vaka-fulumende.—Wavaka-Loma 13:1.