Unahase kupandama kuli Kalunga nakumutachikiza hakulinangula hali ikiye nakulinga vyuma vize navimwivwisa kuwaha. Kaha Kalunga “mwapandama kuli enu.” (WaYakova 4:8) Mbimbiliya yatufwelelesa ngwayo Kalunga “kapwa kwakusuku nayetu tuvosena mutu himutuko.”—Vilinga 17:27.

•  Vyuma navikukafwa utachikize Kalunga

•  Vishinganyeka vyakuhenga kutalisa kukupandama kuli Kalunga

 Kutanga Mbimbiliya

•  Vyuma yahanjika Mbimbiliya: “Visoneka vyosena vavihwima kuli Kalunga.”—WaChimoteu 2, 3:16.

•  Kulumbununa: Kalunga ikiye mwenyaMbimbiliya. Alwezele vaka-kusoneka Mbimbiliya vishinganyeka vyenyi. Kaha Kalunga atulweza vyuma ajina kukatulingila kuhichila muMbimbiliya. Atulweza nawa omu apwa navilinga atwama navyo vyakufwana nge zangi, nachiyulo nakeke.—Kulovoka 34:6; Lushimbi lwamuchivali 32:4.

•  Vyuma watela kulinga: Watela kutanganga Mbimbiliya hakumbi hakumbi. (Yoshuwa 1:8) Shinganyeka havyuma unatange nakulihulisa ngwove: ‘Uno vyuma ngunatange vinangunangula ika hali Kalunga?’—Samu 77:12.

   Chakutalilaho tanga Yelemiya 29:11, kufumaho lihulise ngwove: ‘Uno Kalunga ali nakusaka kungutwamisa mukuunda tahi nyi kungunehela lupi? Uno asaka kulinga sambanjinga tahi, nyi asaka ngukayoye kanawa kulutwe?’

 Kutalanga vyuma vyakutenga

•  Vyuma yahanjika Mbimbiliya: “Vilinga [vyaKalunga] evi vahona kumona . . . vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.”—Wavaka-Loma 1:20.

•  Kulumbununa: Nganomu mivwimbimbi vanafunjejeka yeji kusololanga uhashi atwama nawo mutu uze nayifunjejeka, chipwe omu likina lyangolo lyeji kusololanga uhashi atwama nawo mutu uze nalitungu, mukiko navyuma vyakutenga vyasolola omu apwa Kalunga. Chakutalilaho, jila vatungilamo wongo wamutu yasolola mangana aKalunga, kaha nawa ngolo jatwama mulikumbi namuvatanganyika veka vyasolola ngolo atwama najo.—Samu 104:24; Isaya 40:26.

•  Vyuma watela kulinga: Watela kuwanangako lwola lwakutala vyuma vyakutenga. Hakulinga ngocho lihulise ngwove: ‘Uno evi vyuma vatenga mujila yakukomwesa vyasolola ngachilihi omu apwa Yehova?’ * Chipwe ngocho, kuli vyuma vyavivulu vize twatela kutachikiza hali Kalunga vize katweshi kuwana muvyuma vyakutengako. Evi vikiko atuhanyina Mbimbiliya.

 Kuzachisa lijina lyaKalunga

•  Vyuma yahanjika Mbimbiliya: “Nangumukinga mwomwo atachikiza lijina lyami. Mwangusanyika, kaha nangumukumbulula.”—Samu 91:14, 15.

•  Kulumbununa: Kalunga uze ukwechi lijina lyenyi Yehova, eji kuzakamanga chikuma vaze vatachikiza lijina lyenyi nakulizachisa mukavumbi. * (Samu 83:18; Malaki 3:16) Yehova atulweza lijina lyenyi nakulijimbula kuli etu. Ambile ngwenyi: “Ami yami Yehova. Eli likiko lijina lyami.”—Isaya 42:8.

•  Vyuma watela kulinga: Zachisanga lijina lyaYehova.

 Hanjikenunga naYehova kuhichila mukulomba

•  Vyuma yahanjika Mbimbiliya: “Yehova atwama hakamwihi navosena vaze veji kumusanyikanga.”—Samu 145:18.

•  Kulumbununa: Yehova eji kupandamanga kuli vaze veji kulombanga nalufwelelo. Kulomba chapwa hijila yimwe yakulemeselamo Kalunga nakusolola ngwetu twamuvumbika.

•  Vyuma watela kulinga: Lombanga kuli Kalunga lwola lwosena. (Wavaka-Tesolonyika 1, 5:17) Mulweze vyuma unalizakamina nomu uli nakwivwa.—Samu 62:8. *

 Fwelela Kalunga

•  Vyuma yahanjika Mbimbiliya: “Chakuzeneka lufwelelo, chachikalu kumwivwisa Kalunga kuwaha.”—WavaHepeleu 11:6.

•  Kulumbununa: Hakusaka tupandame kuli Kalunga, twatela kumufwelela. Kweseka naMbimbiliya, kupwa nalufwelelo kachalumbununa kaha kutachikiza ngwetu Kalunga kwatwamako. Oloze chalumbununa nawa kumufwelela chikuma, nakufwelela vyuma atushika najishimbi jenyi. Chasakiwa kufwelela mutu numba usepa wetu uzame.

•  Vyuma watela kulinga: Lufwelelo lwamwenemwene lwapendamina hachinyingi. (Wavaka-Loma 10:17) Linangule Mbimbiliya mangana usolole ngwove wafwelela Kalunga najishimbi jenyi. Vinjiho jaYehova navawahilila kulinangula Mbimbiliya nayove. *

 Kulinga vyuma vize navivwisa Kalunga kuwaha

•  Vyuma yahanjika Mbimbiliya: “Kuzanga Kalunga chalumbununa kulamanga jishimbi jenyi.”—WaYowano 1, 5:3.

•  Kulumbununa: Yehova apwa kwakamwihi navaze vamuzanga hakuzata nangolo mangana vakavangize jishimbi jenyi.

•  Vyuma watela kulinga: Hakutanga Mbimbiliya mona vyuma azanga Kalunga navize kazangako. Lihulise ngwove: ‘Vyuma muka ngwatela kwalumunako mukuyoya chami mangana ngwivwise Tengi yami kuwaha?’—Wavaka-Tesolonyika 1, 4:1.

 Kumona omu Kalunga akuzakama hakukavangiza jishimbi jenyi

•  Vyuma yahanjika Mbimbiliya: “Makilenu mangana mumone ngwenu Yehova apwa wamwaza.”—Samu 34:8.

•  Kulumbununa: Kalunga ali nakusaka ulimwene ngwove apwa wamwaza. Kachi nge naumona omu akuzanga nakukukafwa, nachikulingisa upandame chikuma kuli ikiye.

•  Vyuma watela kulinga: Omu nautanganga Mbimbiliya, kavangiza vyuma nautanga nakumona omu vinahase kukukafwa. (Isaya 48:17, 18) Watela nawa kushinganyeka havyakutalilaho vyavatu vaze Kalunga akafwile mangana vahonese vyeseko, nakupwa nachiyoyelo chamwaza hamwe kaha natanga yavo, nakupwa vakuwahilila. *

 Vishinganyeka vyakuhenga: Katweshi kuhasa kupandama kuli Kalungako, mwomwo katwamako.

 Muchano: Chapwa chachikalu kwivwishisa vyuma vimwe hali Kalunga. Chakutalilaho, chapwa chachikalu kwivwishisa ngwetu apwa Shipilitu uze katwamona namesoko. Chipwe ngocho, unahase kupandama kuli ikiye. Mbimbiliya yatulweza ngwayo twatela kumutachikiza numba tukayoye haya myaka yosena. (Yowano 17:3) Kaha nawa, Mbimbiliya yazachisa mazu amashi akutukafwa tutachikize Tengi yetu, navilinga vyenyi, navyuma ajina kulingila vatu navyuma mwakalinga hamavu, najishimbi jenyi. (Isaya 45:18, 19; WaChimoteu 1, 2:4) Ngana muze twavulukanga, Mbimbiliya yatulweza lijina lyaKalunga. (Samu 83:18) Chikupu vene, tunahase kutachikiza Kalunga nakupandama kuli ikiye.—WaYakova 4:8.