Mbimbiliya yamba ngwayo Kalunga asaka vatu ‘valihende kuujila.’ (Wavaka-Tesolonyika 1, 4:3) Mbimbiliya yazachisa lizu “ujila” kulumbununa ukoji, nakulisavala namutu wausonyi woumwe, nakulisavala chalunga napwevo vaze kavalimbatako.

•  Mwomwo ika Kalunga asakila valunga napwevo valimbate muchishishisa chakutwama kaha hamwe?

•  Kutala valunga napwevo vanahase kutwama hamwe shimbu kanda valimbate mangana vamone nge vanalitela tahi?

•  Vyuma muka navikafwa valunga napwevo vazamise ulo wavo?

•   Kalunga ikiye alongesa ulo. Ahakileko ulo omu awanyishile valunga napwevo vakulivanga. (Kuputuka 2:22-24) Kafwililile ngwenyi valunga napwevo vatwamenga hamwe chakuzeneka kulimbatako.

•   Kalunga atachikiza vyuma vize navikafwa vatu. Kalunga ahakako ulo wililenga lika mangana tanga yipwenga yakuwahilila nakupwa yakukingiwa. Achishinganyeke hachakutalilaho chino. Kapani nge yinatungu chuma yeji kuhananga najindongi najikukafwa uchitokejeke kanawa, chochimwe nawa, jindongi eji kutuhananga Kalunga jeji kutukafwanga tutachikize mwakupwila najitanga jakufukila. Jindongi jaKalunga jeji kukafwanga vaze veji kujikavangizanga.—Isaya 48:17, 18.

•   Kulisavala namutu uze kawalimbata nenyiko chinahase kuneha ukalu waunene. Chakutalilaho, chinahase kuneha majimo akuhona kusaka namisongo yakulitambwisa muujila, nakulyonyinga chavishinganyeka.

•   Kalunga ahanyine malunga namapwevo uhashi wakusemunwina kuhichila mukulisavala. Kalunga amona kuyoya kupwa chajila kaha amona nawa uhashi wakusemunwina kupwa wana waulemu chikuma. Kalunga asaka tumonenga wana kana kupwa waulemu nakuvumbika vyuma alongesa kutalisa kuulo.—WavaHepeleu 13:4.

 Kupwa naulo wakufukila kachalumbununa nge valunga napwevo vatela kuvangila kulyeseka vamone nge vanalitelako. Oloze ulo weji kufukilanga nge valunga napwevo navapwa vakulinunga nakuzachila hamwe mangana vahonese ukalu. * Vapwevo nalunga vaze valimbata valishika lushiko, ngocho vafwila kutwama hamwe.—Mateu 19:6.

 Kakwatwama ulo wakukupukako. Chipwe ngocho, valunga napwevo vaze valimbata vanahase kupwa naulo wakufukila hakukavangiza jindongi jamuMbimbiliya. Tala hajindongi jimwe jino:

•   Haka vyuma asaka muka-mahyove kulutwe.—Wavaka-Kolinde 1, 7:3-5 Wavaka-Fwilipi 2:3, 4.

•   Lisolwelenunga zangi nakavumbi.—Wavaka-Efwesu 5:25, 33.

•   Kekesanga hanjikiso yove.—Vishimo 12:18.

•   Talililanga chikoki nakukonekela washi muka-mahyove.—Wavaka-Kolose 3:13, 14.