Eyo. Kalunga eji kuzakamanga vangamba jenyi vaze vali nakuviza. Mbimbiliya yahanjika hali ngamba yaKalunga wakushishika ngwayo: “Yehova mwamuzamikisa omu ali nakuviza hakahela kenyi.” (Samu 41:3) Shikaho nge mwaviza misongo yakutekeleka, kaha vishina vitatu vinakavangizaho navimikafwa mupwenga vakumika:

1.   Lombenu vamihane ngolo mangana mumike. Kaha “kuunda chaKalunga chize chahambakana kunangakana chosena,” nachimikafwa muhone kulizakamina nakumivendejeka.—Wavaka-Fwilipi 4:6, 7.

2.   Shinganyekenu havyuma vyamwaza. Mbimbiliya yamba ngwayo: “Muchima wakuwahilila unapu nge vitumbo vyamwaza, oloze muchima wakuhomba weji kukumisanga ngolo jamutu.” (Vishimo 17:22) Monenunga vyuma mujila yamwaza, kahechi nachimikafwa muhone kuhomba nakuhona kuviza chikuma.

3.   Zamisenu lutalililo lwenu. Lutalililo nalumikafwa mupwenga vakuwahilila chamokomoko nakuviza misongo yakutekeleka. (Wavaka-Loma 12:12) Mbimbiliya yahanjika ngwayo nakukapwa lwola luze kakweshi kukapwa “mutu mwakamba ngwenyi: ‘Nguli nakukola.’” (Isaya 33:24) Kalunga mwakoka namisongo yize vatu vanahono kuka makumbi ano. Chakutalilaho, Mbimbiliya yalumbununa omu naukapwa mujimba wamutu ngwayo: “Nyama yenyi yipwenga yayivwovu kuhambakana muze apwile haukweze wenyi. Akinduluke kumakumbi aukweze wenyi.”—Yopa 33:25.

 Nyingililenu: Hakuwana nge twetavila ngwetu Kalunga eji kutukafwanga, ngocho Vinjiho jaYehova navakiko veji kulisakwilanga jila yakuvokilamo misongo yavo. (Mako 2:17) Chipwe ngocho, katweshi kusakwila mutu jila yakumukilamoko, oloze mutu himutu akwechi lisesa lyakulisakwila jila yakumukilamo.