Mbimbiliya yakumbulula hatoma ngwayo, katwatela kuhana Kalunga mulongako, mwomwo Yehova Kalunga kajina ngwenyi vatu vayandengako. Chipwe ngocho, valunga napwevo vakulivanga valikangile kuchiyulo chaKalunga, nakufwila kulisakwila vavene vyuma vyamwaza nevi vyakuhenga. Vahokwele jishimbi jaKalunga ngocho vaputukile kuyanda.

 Makumbi ano, tuli nakuyanda chikuma mwomwo yavyuma valingile. Ngocho kuyanda kachafuma kuli Kalungako.

 Mbimbiliya yamba ngwayo: “Nge mutu ali mucheseko, kanda amba ngwenyi: ‘Vali nakungweseka kuli Kalungako.’ Mwomwo Kalunga kaveshi kumweseka navyuma vyavipiko, kaha ikiye nawa keshi kweseka mutu naumweko.” (WaYakova 1:13) Kala mutu nahase kuyanda, kuhakilako vene navatu vaze Kalunga eji kwivwilanga kuwaha.