Mbimbiliya yatushika ngwayo: “Ou eji kulinganga mwaya muchima waKalunga mwatwamanga haya myaka yosena.” (WaYowano 1, 2:17) Kalunga ali nakusaka ulinge vyuma muka?

•   Linangule hali Kalunga naMwanenyi Yesu. Yesu alombele kuli Kalunga ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” (Yowano 17:3) Uno vyuma muka vyasakiwa numba ‘mutu atachikize’ Kalunga naYesu? Tunahase kuvatachikiza kachi nge natulinangula Mbimbiliya nakuzachisa vyuma natulinangula mukuyoya chetu. * Mbimbiliya yasolola vishinganyeka vyaTengi yetu, Yehova Kalunga uze apwa Mwenyakuyoya. (Vilinga 17:24, 25) Mbimbiliya yahanjika nawa hali Mwanenyi Yesu uze anangwilenga “mazu akuyoya chahaya myaka yosena.”—Yowano 6:67-69.

•   Fwelela mundando yakusokola yaYesu. Yesu ejile hano hamavu mangana “azachile vatu milimo nakuhana mwono wenyi kupwa ndando yakusokola.” (Mateu 20:28) Wana wandando yakusokola yaYesu walingisa vatu vakapwe nakuyoya chahaya myaka yosena muPalachise hano hamavu. * (Samu 37:29) Yesu ambile ngwenyi: “Mwomwo Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Tachikiza nawa ngwove katwatela kukumina hakutachikiza kaha Yesuko. Oloze twatela ‘kumufwelela,’ nakukavangiza vyuma vize anangwilenga nakuyoya kweseka mwaya muchima waIse.—Mateu 7:21; WaYakova 2:17.

•   Tunga usepa wakukola naKalunga. Kalunga asaka tupandame kuli ikiye nakupwa masepa jenyi. (WaYakova 2:23; 4:8) Kalunga apwa wahaya myaka yosena kulumbununa nge keshi kukafwako. Kaha asaka namasepa jenyi vayoyenga haya myaka yosena. Mbimbiliya yatulweza vyuma asaka Yehova kuli vaze veji kumutondatondanga ngwayo: “Livwisenunga kuwaha kuyoya haya myaka yosena.”—Samu 22:26.

 Vishinganyeka vyakuhenga: Vatu kaveshi kukalivwisa kuwaha kuyoya haya myaka yosenako.

 Muchano: Kuyoya chahaya myaka chapwa wana wakufuma kuli Kalunga, uze atuzanga kaha nawa uze asaka tupwenga vakuwahilila. (WaYakova 1:17; WaYowano 1, 4:8) Shikaho atachikiza ngwenyi, hakusaka tupwenga vakuwahilila twatela kuzata milimo yize nayitusuulwisa. (Muka-kwambulula 3:12) Kalunga ashika vatu vaze navakatwama hano hamavu haya myaka yosena ngwenyi, navakapwanga vakuwahilila kaha nawa navakazata milimo yize nayikavanganyalisa nakunganyalisa nawa vatu vaze vazanga.—Isaya 65:22, 23.

 Kaha nawa vaze navakatwama hano hamavu haya myaka yosena, navakatwalaho lika kulinangula vyuma vyavihya hali Tengi yavo nahamilimo yenyi yakukomwesa. Kalunga atengele vatu mangana vayoyenga haya myaka yosena nakumutachikiza, numba tuhu “kaveshi kukatachikiza milimo yize Kalunga wamuchano natenge kufuma kukuputuka swi nakusongoko.” (Muka-kwambulula 3:10, 11) Shikaho vatu vaze navakayoya haya myaka yosena, navakalivwisanga kuwaha kulinangula vyuma vyavihya.