Lushimbi lwakwamba ngwavo “liso naliso ndwa” lwapwile haJishimbi jaKalunga jize Mose ahanyine vaIsalele kushikulu, kaha naYesu avulukile lushimbi kana muChihande chenyi chahaPili. (Mateu 5:38; Kulovoka 21:24, 25; Lushimbi lwamuchivali 19:21) Lushimbi kana lwalumbunwine nge, mutu uze navulumuna mulonga vatela kumuzangamisa kweseka namulonga navulumuna. *

 Lushimbi kana lwahanjikile havyuma vyavipi vize mutu mwalinga kuli mukwavo chakusakula kumuchima. Jishimbi vahanyine Mose jahanjikile hali mutu uze avulumwine mulonga chakusakula kumuchima ngwajo: “Valinge chifuwa nachifuwa ndwa, liso naliso ndwa, lizo nalizo ndwa. Mweshomwo nalingi mukwavo naikiye vamulingemo.”—VyavaLevi 24:20.

•  WMwomwo ika vahakilileko lushimbi ‘lwaliso naliso ndwa’?

•  Uno vaka-Kulishitu vatela kukavangiza lushimbi ‘lwaliso naliso ndwa’ tahi?

•  Vyuma vyakuhenga vashinganyeka vatu halushimbi ‘lwaliso naliso ndwa’

•  Yesu mwolola vishinganyeka vyakuhenga

 Lushimbi ‘lwaliso naliso ndwa’ kalwahanyine vatu lisesa lyakulinga sambanjingako. Oloze lwakafwilenga vaka-kuyula vatongwele, vazangamise mujila yakwoloka vatu vaze vavulumwinenga milonga, keshi kuvazangamisa chikumako kaha nawa keshi kuvechelelako.

 Elu lushimbi valuhakilileko nawa kukanyisa mutu ahone kulemeka vakwavo mukuchisakula kumuchima chipwe kushinganyeka kulemeka vakwavo. Lushimbi lwambile ngwalwo: “Vosena vaze navakachivwa [vaze vamwenengako omu vazangamishile vaka-milonga] navakevwa woma, kaha kaveshi kukalinga cheka chuma chachipi chakufwana ngana mukachi kenuko.”—Lushimbi lwamuchivali 19:20.

 Nduma, vaka-Kulishitu kavatela kukavangiza lushimbi kanako. Lwapwile haJishimbi vahanyine Mose jize vafumishileko mwomwo yakufwa chaYesu.—Wavaka-Loma 10:4.

 Chipwe ngocho, elu lushimbi lwatukafwa tutachikize vishinganyeka vyaKalunga. Chakutalilaho, lwasolola nge Kalunga asaka chiyulo. (Samu 89:14) Lwasolola nawa nge Kalunga asaka vaze navavulumuna milonga vavazangamisenga “mujila yakutamo.”—Yelemiya 30:11.

 Vishinganyeka vyakuhenga: Lushimbi ‘lwaliso naliso ndwa’ lwalingishile vatu vatwaleho lika kulilinga sambanjinga.

 Muchano: Jishimbi vahanyine Mose jambile ngwajo: “Kanda mukalinga sambanjinga chipwe kulamina koko vana vavatu jenuko.” (VyavaLevi 19:18) Muchishishisa chakukundwiza vatu valingenga sambanjinga, elu Lushimbi lwakafwile vatu vafwelele muli Kalunga navaka-kuyula vaze atongwele Kalunga volole vyuma vinahenge.—Lushimbi lwamuchivali 32:35.