Liyavolo navandemone veji kuhungumwisanga chikuma vatu. Ngocho Mbimbiliya yahanjika ngwayo: “Kaye kosena katwama mumavoko ayauze wakuhuka.” (WaYowano 1, 5:19) Mbimbiliya yahanjika hajijila jize Satana eji kuhungumwishilangamo vatu.

•   Kwonga. Mbimbiliya yakolezeza vaka-Kulishitu ‘vemanyinenga tufuta twaLiyavolo.’ (Wavaka-Efwesu 6:11) Jila yimwe eji kwongelangamo vatu shina kuvalingisa vafwelele ngwavo, vandemone jenyi vapwa vangamba jaKalunga.—Wavaka-Kolinde 2, 11:13-15.

•   Kupanda. Liyavolo eji kuhungumwisanga vatu kuzachisa vaka-kutahisa vashipilitu, navaka-kulweza vyuma vyakulutwe, navaka-kutaha ngombo, navaka-kuzachisa vatanganyika. (Lushimbi lwamuchivali 18:10-12) Kaha nawa eji kuzachisanga vitumbo, nakulalika vatu, navishinganyeka vize vyeji kulingisanga vatu vafwelele ngwavo vandemone vanahase kuvatwaminyina.—Luka 11:24-26.

•   Kwitava chamakuli. Mauka akwitava eji kunangulanga vyuma vyamakuli, vize vyeji kuhungumwisanga vatu nakuvalingisa valikange kuli Kalunga. (Wavaka-Kolinde 1, 10:20) Mbimbiliya yavuluka vyuma kanevi vyamakuli ngwayo: “Kukunangula chavandemone.”—WaChimoteu 1, 4:1.

•   Kupwa navandemone. Mbimbiliya yahanjika havatu vaze vatwaminyinenga kuvashipilitu vavapi. Shimbu jimwe, vatu vaze vapwilenga navandemone vavalingishile kupwa tupuputa, chipwe tumama chipwe kulivulumuna vavene.—Mateu 12:22; Mako 5:2-5.

Mwakuhonesela tufuta twaLiyavolo

 Kamwatela kwivwa woma vandemoneko, mwomwo Mbimbiliya yasolola hatoma nge munahase chikupu kwimanyina Liyavolo nakole:

•   Fwilenu kutachikiza jijila eji kuzachisanga Liyavolo mangana ‘mutachikize tufuta twenyi.’—Wavaka-Kolinde 2, 2:11.

•   Linangulenu Mbimbiliya nakufwila kuzachisa vyuma muli nakulinangula. Kukavangiza jindongi jamuMbimbiliya nachimikafwa mulihenda kutufuta eji kuzachisanga Liyavolo.—Wavaka-Efwesu 6:11-18.

•   Mbilenu vyuma vyosena vize vyapandama kuvandemone. (Vilinga 19:19) Vyuma kana mwaliweza myaso, namikanda najivindiyo, vize vyeji kukundwizanga kupanda.