Luyando lwalunene nalukaneha ukalu waunene chikuma uze kanda vachimonengaho lyehi vatu. Kweseka naupolofweto wamuMbimbiliya, elu luyando lwalunene nalukapwako “hamakumbi akukuminyina.” (WaChimoteu 2, 3:1; Ndanyele 12:4) Nalukapwa “luyando, luze kanda lusolokengaho lyehi kufuma haze Kalunga aputukile kutanga vyuma palanga nakulwola vene luze, kaha kulutwe nawa kalweshi kukasoloka chekako.”—Mako 13:19; Ndanyele 12:1; Mateu 24:21, 22.

Vyuma navikasoloka haluyando lwalunene

•   Kunongesa kwitava chamakuli. Kwitava chamakuli navakachinongesa mulwola lwalundende kaha. (Kusoloka 17:1, 5; 18:9, 10, 21) Viyulo vyamapolitiki vize vyemanyinako liuka lyaUnited Nations navikatesamo mwaya muchima waKalunga hakunongesa kwitava kana.—Kusoloka 17:3, 15-18. *

•   Kufumbukila kwitava chamuchano. Mafuchi aze nawakalifutula aze vavuluka muchakumwenesa chaEzekele ngwavo, “Ngonge wakulifuchi lyaMangonge,” nawakafwila kunongesa vatu vaze vatwama mukwitava chamuchano. Oloze Yehova mwakakinga vaka-kumulemesa mangana vakahone kuvanongesa.—Ezekele 38:1, 2, 9-12, 18-23.

•   Kusopesa vaze vatwama hamavu vosena. Yesu mwakasopesa vatu vosena, “kaha mwakahandununa mutu kuli mukwavo, nganomu kafunga eji kuhandununanga mikoko kuli vapembe.” (Mateu 25:31-33) Kusopesa chenyi nachikapendamina hajila mutu himutu akundwijililemo ‘vandumbwenyi’ vaze mwakayula navo mwilu.—Mateu 25:34-46.

•   Kukungulula vaka-kuyula muWangana. Kachi nge vatu vakushishika vaze vasakula mangana vakayule hamwe naKulishitu vanafu, veji kuvasangulanga nakuya nakuyoyela mwilu.—Mateu 24:31; Wavaka-Kolinde 1, 15:50-53; Wavaka-Tesolonyika 1, 4:15-17.

•   Alamangetone. Yapwa “jita yahalikumbi lyalinene lyaKalunga Wangolo Josena,” yize vavuluka nawa ngwavo “likumbi lyaYehova.” (Kusoloka 16:14, 16; Isaya 13:9; WaPetulu 2, 3:12) Vatu vaze navakasopesa kuli Kulishitu kupwa vaka-kole, navakavanongesa. (Zefwanyiya 1:18; Wavaka-Tesolonyika 2, 1:6-10) Mukunongesa kana mwaliweza nakunongesa mauka amapolitiki amukaye kosena aze Mbimbiliya yafwanyisa kuchisuma wamitwe 7.—Kusoloka 19:19-21.

Vyuma navikasoloka hanyima yaluyando lwalunene

•   Satana navandemone navakavakasa. Kangelo wangolo mwakambila Satana navandemone jenyi “muwina wakuzeneka kukuma,” muze navakapwa kwijiva nge vanafu. (Kusoloka 20:1-3) Omu Satana navakamumbila muwina wakuzeneka kukuma muze mwapwa nge mukamenga, keshi kukapwa nangolo jakuhungumwisa cheka vatuko.—Kusoloka 20:7.

•   Kuputuka chaMyaka Likombakaji. Wangana waKalunga naukaputuka kuyula hamyaka 1,000, uze naukaneha kutokwa chachinene kuvatu. (Kusoloka 5:9, 10; 20:4, 6) Kaha “liyongomena lyalinene” lyavatu vaze kaveshi kukahasa kulavako “[navakafuma] muluyando lwalunene,” kaha navakamona omu Wangana naukaputuka kuyula haMyaka Likombakaji.—Kusoloka 7:9, 14; Samu 37:9-11.