Vyuma Muka Yahanjika Mbimbiliya Kutalisa Kuli Maliya?
Vyuma yakumbulula Mbimbiliya
Mbimbiliya yamba ngwayo Maliya uze apwile naye yaYesu, apwile nakutokwa chachinene chakusema Yesu shimbu kanda achilisavaleho lyehi nalunga. Mbimbiliya yahanjikile chimweza echi chuma chakukomwesa mumukanda waIsaya. Kaha nawa Mikanda yaMujimbu Wamwaza waMateu naLuka yahanjika omu chakukomwesa kana chateselemo.
Isaya apolofwetele vyakusemuka chaMeshiya ngwenyi: “Mwanapwevo mwakemita lijimo, kaha mwakasema mwana walunga.” (Isaya 7:14) Mateu uze vahwiminyine asoneke mukanda waMujimbu Wamwaza waMateu, azachishile mazu aze apolofwetele Isaya akwamba ngwavo Maliya mwakasema Yesu. Hanyima yakusoneka ngwenyi Maliya emichile mujila yakukomwesa, Mateu asonekele nawa ngwenyi: “Vyuma vyosenevi vyasolokele mangana vitesemo mazu ahanjikile Yehova kuhichila muli kapolofweto kenyi ngwenyi: ‘Mwanapwevo uze kanda achilisavaleho lyehi nalunga * mwakemita lijimo, kaha mwakasema mwana walunga. Ou mwana navakamuluka lijina ngwavo Emanwele,’ kulumbununa, ‘Kalunga Ali Nayetu.’”—Mateu 1:22, 23.
Luka uze asonekele mukanda waMujimbu Wamwaza waLuka, asonekele omu Maliya emichile mujila yakukomwesa. Asonekele ngwenyi Kalunga atumine kangelo Ngavalyele ahanjike, “kuli mwanapwevo uze kanda achilisavaleho lyehi nalunga, uze vahuhwile kuli Yosefwe, lunga wakutanga yaNdavichi. Lijina lyayauze mwanapwevo ikiye Maliya.” (Luka 1:26, 27) Maliya asolwele hatoma ngwenyi apwile mwanapwevo uze kanda alisavaleho lyehi nalunga. Omu Maliya vamulwezele ngwavo mwapwa naye yaYesu uze mwakapwa Meshiya, ahulishile uze kangelo ngwenyi: “Uno nachipwa ngachilihi ngocho, hakuwana nge ami kanda nguchilisavaleho lyehi nalunga?”—Luka 1:34.
Uno mwanapwevo uze kanda achilisavaleho lyehi nalunga nahase kusema tahi?
Maliya emichile lijimo mwomwo yashipilitu yajila, yize yapwa ngolo jaKalunga. (Mateu 1:18) Maliya vamulwezele ngwavo: “Shipilitu yajila nayiza hali ove, kaha ngolo jayou Wakulitulaho Chikuma najitwama hali ove. Shikaho ou mwakasemuka navakamuvuluka ngwavo, wajila, MwanaKalunga.” * (Luka 1:35) Kalunga anungulwile kuyoya chaYesu mujimo lyaMaliya mujila yakukomwesa nakumulingisa mangana emite lijimo.
Uno mwanapwevo uze kanda achilisavaleho lyehi nalunga nahase kusema ngachilihi mwana?
Kalunga azachishile mwanapwevo uze kanda achilisavaleho lyehi nalunga aseme Yesu, uze apwile mutu wakukupuka mangana asokele vatu kushili nakukufwa. (Yowano 3:16; WavaHepeleu 10:5) Kalunga anungulwile kuyoya chaYesu mujimo lyaMaliya. Kufumaho Shipilitu yajila yaKalunga yakingile mwana uze apwile mujimo kuchina kutambula shili.—Luka 1:35.
Chikupu vene, Yesu apwile wakukupuka ngana muze apwile Alama shimbu kanda alinge shili. Mbimbiliya yahanjika kutalisa kuli Yesu ngwayo: “Ikiye kalingile shiliko.” (WaPetulu 1, 2:22) Hakuwana nge Yesu apwile wakukupuka, ngocho alisuwile kuhana ndando yakusokola mangana asokole vatu kushili nakukufwa.—Wavaka-Kolinde 1, 15:21, 22; WaChimoteu 1, 2:5, 6.
Uno Maliya kalisavalile nalunga mukuyoya chenyi chosenako tahi?
Mbimbiliya kayanangula ngwayo Maliya kalisavalile nalunga mukuyoya chenyi chosenako. Oloze yasolola ngwayo apwile navana veka.—Mateu 12:46; Mako 6:3; Luka 2:7; Yowano 7:5.
Mbimbiliya yanangula ngwayo Yesu apwile navasongo jenyi
Uno Maliya kapwile nashili kufuma vene halwola luze emichile tahi?
Nduma. Oloze omu mukiko ashinganyeka mauka amwe akwitava. Chakutalilaho kweseka namukanda waNew Catholic Encyclopedia, wamba ngwavo: “Kufuma vene hakwimita chenyi, Maliya uze apwile kanda achilisavaleho lyehi nalunga kapwile nashiliko. Numba tuhu vatu vosena vaswana shili . . . Oloze mwomwo YALIKOJI lyaKalunga Maliya kaswanyine shiliko.” *
Nahamwe hauchi muMbimbiliya vasoneka ngwavo Maliya kapwile nashiliko. (Samu 51:5; Wavaka-Loma 5:12) Maliya ivene asolwele hatoma ngwenyi apwile nashili omu ahanyine wana wahashili uze vahanyinenga visemi vamapwevo kweseka naJishimbi vahanyine Mose. (VyavaLevi 12:2-8; Luka 2:21-24) Mukanda waNew Catholic Encyclopedia wamba ngwawo: “Visoneka kavyanangula hatoma ngwavyo Maliya kaswanyine shiliko . . . Oloze chapwa kaha kunangula chavaka-Katolika chamujichachi.”
Uno Maliya twatela kumumona ngachilihi?
Maliya apwile pwevo walufwelelo, wakwononoka, wakulinyisa kaha nawa wakuhya kushipilitu. Chikupu vene atusela chakutalilaho chamwaza, kaha nawa atwama hamukana wavatu vakushishika vaze twatela kulondezeza.—WavaHepeleu 6:12.
Numba tuhu Maliya vamuhanyine mulimo wakulipwila chikuma wakupwa naye yaYesu, oloze Mbimbiliya kayatunangula ngwavo twatela kumulemesa chipwe kulomba kuli ikiyeko.Yesu kamwenenga naye mujila yakulipwila chipwe kulweza vaka-kumukavangiza vamumonenga mujila yakulipwilako. Maliya vamuvuluka kaha muMikanda yaMujimbu Wamwaza namumukanda waVilinga, oloze kavamuvuluka mumikanda 22 yamu Tesetamende Yayihyako.—Vilinga 1:14.
Visoneka vyasolola hatoma nge, Maliya kavamulemeselenga chipwe kumumona mujila yakulipwila kuli vaka-Kulishitu vamulikulukaji lyakulivangako. Mbimbiliya yalweza vaka-Kulishitu valemesenga kaha Kalunga.—Mateu 4:10.
^ Lizu lyachiHepeleu valumuna ngwavo “mwanapwevo,” valivuluka muupolofweto waIsaya ngwavo ʽal·mahʹ linahase kulumbununa mwanapwevo uze kanda achilisavaleho nalunga chipwe uze alisavalaho lyehi nenyi. Chipwe ngocho mumukanda uze asoneke Mateu azachishile lizu lyachiHelase vavuluka ngwavo par·theʹnos, lize lyalumbununa “mwanapwevo uze kanda achilisavaleho nalunga.”
^ Vatu vamwe vashinganyeka ngwavo hakuwana nge Yesu apwa “MwanaKalunga” ngocho Kalunga alisavalile napwevo. Chipwe ngocho, evi vishinganyeka vyakuhenga kavavivuluka muVisonekako. Oloze Mbimbiliya yavuluka Yesu kupwa “MwanaKalunga” kaha nawa “twatwa kuvyuma vyakutenga vyosena” mwomwo ikiye apwile watete kutenga, kaha nawa vamutengele kuli Kalunga ivene. (Wavaka-Kolose 1:13-15) Mbimbiliya yavuluka nawa Alama mutu watete kutenga kupwa “mwanaKalunga.” (Luka 3:38) Mwomwo Alama naikiye vamutengele kuli Kalunga ivene.
^ Second Edition, Volume 7, lifwo 331.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Maliya Apwa Naye yaKalunga Tahi?
Visoneka Vyajila navaka-Kulishitu vasolola hatomo ovyo vyalingisa vatu vafwelele kunangula kana.