Chiku, pulaneti yaMavu kaveshi kukayinongesa, chipwe kuyocha nakakahya, chipwe kuyishishisako. Mbimbiliya yanangula ngwayo Kalunga atengele mavu apwengangako haya myaka yosena.

•   “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

•   “[Kalunga] azamisa mavu havihela vyawo. Kaveshi kukawaswenyesako haya myaka namyaka.”—Samu 104:5.

•   “Mavu nawapwangako haya myaka yosena.”—Muka-kwambulula 1:4.

•   “Ou atengele mavu, ou awazamishile, . . . kawatengele chawanako, oloze awatengele ngwenyi hatwamenga vatu.”—Isaya 45:18.

 Vatu vali nakwenyeka yino pulaneti yamavu hakulwa jijita nakupihisa meya napeho nalwenyeka lweka. Chipwe ngocho, Kalunga keshi kuvechelela vayenyeke yosenako. Oloze ‘mwakenyeka vaze vali nakwenyeka mavu.’ (Kusoloka 11:18) Mwakalinga ngachilihi ngocho?

 Kalunga mwakafumisako jifulumende javatu jize jinahono kukinga mavu, nakuhakako Wangana wamwilu wakukupuka. (Ndanyele 2:44; Mateu 6:9, 10) Mwanenyi Yesu Kulishitu ikiye apwa mwangana waWangana kana. (Isaya 9:6, 7) Omu Yesu apwile hano hamavu, alingile vyuma vyakukomwesa vize vyasolola nge akwechi ngolo havyuma vyakutenga. (Mako 4:35-41) Yesu hakupwa Mwangana waWangana waKalunga, mwakayula kanawa ano mavu navyuma vyosena vyatwamaho. Mwakalingisa vyosena hano hamavu vikapwe cheka vyavihya ngana muze vyapwile mumilemba yaEtene.—Mateu 19:28; Luka 23:43.

 Chiku, kayanangula ngochoko. Vatu vafwelela ngwavo ano mavu navakawocha nakakahya mwomwo yakuhona kutachikiza ulumbunwiso wachisoneka chaWaPetulu 2, 3:7 chize chamba ngwacho: “Melu namavu awa aliko oholili vawalama vakawanongese nakakahya.” Achitalenu vishina vino vivali vyatukafwa tutachikize mwalumbunukila echi chisoneka:

1.   Mbimbiliya yazachisa lizu “melu,” “mavu,” “nakakahya” kulumbununa vyuma vyavivulu. Chakutalilaho, hali Samu 97:1 vasonekaho ngwavo: “Yehova napu Mwangana. Mavu awahilile.” Hano lizu “mavu” lyalumbununa vatu vatwamaho.

2.   Jivesi jeka jamumukanda kanou WaPetulu wamuchivali kapetulu 3 jasolola ulumbunwiso wamelu, namavu, nakakahya vavulukamo. Vesi 5 na 6 yahanjika haLivaji lyapwileko mumakumbi aNowa. Halivaji kana, kaye vakanongesele, oloze yino pulaneti yamavu kayafumineko. Eyo, lize Livaji lyanongesele “mavu” kulumbununa vatu vakuhuka vaukenya vaze vapwileko. (Kuputuka 6:11) Kaha nawa lyanongesele “melu,” kulumbununa vatu vaze vayulilenga vatu vakwavo hano hamavu. Ngocho vatu vakuhuka vavanongesele, oloze kavanongesele yino pulaneti yamavuko. Nowa natanga yenyi vayovokele omu vanongesele kaye, kaha vatwaminenga lika hano hamavu omu lyakumine Livaji.—Kuputuka 8:15-18.

 Ngana muze Livaji lyanongesele vatu vakuhuka, “nakakahya” kachifwanyisa vavuluka hali WaPetulu 2, 3:7 nakakanongesa vatu vakuhuka vatwama hano hakaye, keshi kunongesa pulaneti yaMavuko. Katulunga atushika ngwenyi nakukapwa “melu amahya namavu amahya” muze “namukapwanga kwoloka.” (WaPetulu 2, 3:13) “Mavu amahya” kulumbununa chitungilo chachihya chavatu, navakachiyula “[ku]melu amahya” kulumbununa kuchiyulo chachihya chaWangana waKalunga. Muchiyulo chaWangana kanou, hamavu hosena nahakapwa palachise yakuunda.—Kusoloka 21:1-4.