Luka uze asonekele mikanda yimwe yamuMbimbiliya ahanjikile vyuma vimwe kutalisa kumujimbu wakuyoya chaYesu ngwenyi: “Ngunahehwojola kanawa mwaya vyuma vyosena kufuma kuze vyaputukilile.”—Luka 1:3.

 Vatu vamwe vahanjika hamujimbu wakuyoya chaYesu uze vasonekele mumikanda yaMujimbu Wamwaza ngwavo, vyuma vasonekele kuli Mateu, naMako, naLuka, naYowano, vavisonekele mulikulukaji lyamyaka lyamuchiwana.

 Chipwe ngocho, chihanda chamukanda waMujimbu Wamwaza asonekele Yowano, vachiwanyine muEjipitu mulikulukaji lyamyaka lyakusokesa 20. Veji kuchivulukanga jino ngwavo, chihanda chamateve chaRyland’s 457, kaha vachilamina muJohn Rylands Library, muManchester, muEngland. Chihanda kana chatwama namijimbu yatwama mumukanda waYowano 18:31-33, 37, 38 uze watwama mujiMbimbiliya jamakumbi ano.

 Echi hichihanda chimwe chamanyusikilipiti chaVisoneka VyachiHelase vyaVaka-Kulishitu chize chinashimbula chikuma. Vaka-kulinangula vavavulu vafwelela ngwavo, vachisonekele kafwe mu 125 C.E., omu mwahichile kafwe myaka yayindende kufuma haze vasonekelele Visoneka vivene. Kaha mazu vasonekele muchihanda kana alitombwele namazu amujimanyusikilipiti jize vasonekele mumyaka yakavangijileho.