Mbimbiliya yakanyisa kulya manyinga. Shikaho katwatela kwitavila kutuhaka manyinga chipwe kuzachisa tuvihanda twatundende tuze twatunga manyinga kuhichila muvyakulyako. Talenu visoneka vino vinakavangizaho:

•   Kuputuka 9:4. Omu lyakumine Livaji, Kalunga etavishile Nowa natanga yenyi kulya nyama, oloze avakanyishile kulya manyinga ayo. Kalunga alwezele Nowa ngwenyi: “Kamwatela kulya nyama namwono wayo hamweko, akiko manyinga ayo.” Elu lushimbi lwakwata nakuvatu vosena mwomwo vafuma kuli Nowa.

•   VyavaLevi 17:14. “Kanda namulya manyinga achuma chakuyoyako, mwomwo mwono wachuma chakuyoya akiko manyinga. Weshowo mwawalya vamujihe.” Kalunga amona mwono chipwe kuyoya vize vyapwa manyinga kupwa vyenyi. Numba tuhu lushimbi kana valuhanyi kaha vaIsalele, oloze lwasolola omu Kalunga ahunga kulya manyinga.

•   Vilinga 15:20. ‘Lihendenunga . . . kumanyinga.’ Kalunga ahana vaka-Kulishitu lushimbi luze ahanyine Nowa. Mijimbu yakushikulu yasolola nge vaka-Kulishitu vakulivanga kavalilenga manyinga chipwe kwitavila kuvoka kuzachisa manyinga mujila yekako.

Mwomwo ika Kalunga atulwezela tulihende kumanyinga?

 Kwatwama unjiho wakutamo uze wasolola nge kutuhaka manyinga cheji kunehanga ukalu kumujimba wetu. Chuma chachilemu chalingisa Kalunga atulweze ngwenyi twatela kulihenda kumanyinga, shina mwomwo awamona kupwa ajila.—VyavaLevi 17:11; Wavaka-Kolose 1:20.