Mumauka akwitava amwe, Mikayele vamuvuluka ngwavo “Saint Michael” [Mikayele Muka-kujila] kaha lyapwa lijina lize valukile Yesu shimbu kanda achize hano hamavu nomu alingile hanakinduluka lyehi mwilu. * Omu afwile Mose, ou vene Mikayele ikiye alipulile jipami naSatana hamujimba waMose kaha nawa akafwile kangelo uze apwile nakutwala mujimbu waKalunga kuli kapolofweto Ndanyele. (Ndanyele 10:13, 21; WaYuta 9) Mikayele hakuhakwila chiyulo chaKalunga nakulwa navaka-kole jaKalunga, eji kuzatanga kweseka nomu lyalumbunukila lijina lyenyi lyakwamba ngwavo, “Iya Apwa Nge Kalunga?—Ndanyele 12:1; Kusoloka 12:7.

 Achishinganyekenu ovyo vyalingisa chipwenga chakutamo kwamba ngwetu Yesu ikiye Mikayele uze kangelo wakulitulaho.

•   Mikayele ikiye “kangelo wakulitulaho.” (WaYuta 9) Vulukiso yakwamba ngwavo “kangelo wakulitulaho,” yalumbununa “mukulwane wavangelo” kaheyi vulukiso kana yasoloka kaha mujivesi jivali muMbimbiliya. Kaha mujivesi josena jivali, eyi vulukiso yatalisa kaha kuli kangelo umwe kulumbununa nge ikiye kaha akwechi eyi vulukiso kana. Vesi yimwe yamba ngwayo, Mwata Yesu uze vasangula lyehi “mwakafuma mwilu namutambi wangolo, nalizu lyakangelo wakulitulaho.” (Wavaka-Tesolonyika 1, 4:16 ) Yesu atwama “nalizu lyakangelo wakulitulaho” mwomwo ikiye Mikayele, uze kangelo wakulitulaho.

•   Mikayele apwa kapitau kalizavu lyavangelo vaka-kwasa jita. “Mikayele navangelo jenyi valwile jita nayauze chazangombe,’ ikiye Satana. (Kusoloka 12:7) Mikayele atwama nawata waunene havatu vakushipilitu vosena mwilu, kaha vamuvuluka ngwavo “uze apwa mwata wamulemu,” kaha nawa ngwavo “mwata wamunene.” (Ndanyele 10:13, 21; 12:1) Mutu walijina lya David E. Aune uze alinangula chikuma vyaTesetamende Yayihya ahanjikile ngwenyi, eji jivulukiso jasolola nge Mikayele apwa “kapitau kaliyongomena lyavangelo lyalinene.”

   Mbimbiliya yazachisa lijina likwavo limwe kaha kutalisa kuli mutu uze akwechi wata haliyongomena lyavangelo. Lijina kana lyatalisa “[ku]lwola lwakusolola Mwata Yesu kufuma mwilu hamwe navangelo jenyi vangolo mumilangi yakakahya, hakuzangamisa [vaka-kuhuka]” (Wavaka-Tesolonyika 2, 1:7, 8; Mateu 16:27) Yesu “ayile mwilu, kaha vangelo, navaka-mawata, navaka-ngolo vavalingishile valiluule kuli ikiye.” (WaPetulu 1, 3:21, 22) Shikaho, kacheshi kupwa chakutamo kwamba ngwetu Kalunga atongola vatu vavali, Yesu naMikayele, kupwa tupitau vaze navemanyina kole mayongomena avangelo vakujila mwiluko. Oloze chakutamo kukukulula ngwetu majina osena avali, Yesu naMikayele atalisa kuli mutu umwe kaha.

•   Mikayele ‘mwakakatuka’ ‘halwola lwavihuli’ luze kanda lusolokengaho lyehi. (Ndanyele 12:1) Lizu lyakuvuluka ngwavo ‘kukatuka’ lize vazachisa mumukanga waNdanyele, kakavulu lyatalikisa kumwangana uze ali nakusaka kulinga chuma chimwe chachinene. (Ndanyele 11:2-4, 21) Ngocho, Yesu Kulishitu apwa ikiye “Lizu lyaKalunga” kaha mwakalinga chuma chachinene hakupwa ikiye “Mwangana wavamyangana” uze mwakeza nakunongesa vaka-kole jaKalunga vosena, oloze mwakakinga vatu jaKalunga. (Kusoloka 19:11-16) Mwakalinga ngocho “halwola luze nakukapwa luyando lwalunene, luze kanda lusolokengaho lyehi kufuma kukuputuka chakaye palanga nakulelo lino.”