MuMbimbiliya lizu valumuna ngwavo “mwono” lyafuma kulizu lyachiHepeleu ngwavo neʹphesh nalizu lyachiHelase ngwavo psy·kheʹ. Eli lizu lyachiHepeleu lyalumbununa “chuma chakuyoya chize cheji kuhwimanga,” kaha lizu lyachiHelase lyalumbununa “mutu wakuyoya.” * Shikaho lizu mwono lyalumbununa chuma chakuyoya chize chinakuhwima, keshi nge chuma chize chatwama mumujimba chize cheji kulovokangamo nge mujimba unafuko. Tutalenu omu Mbimbiliya yasolola nge mwono wamutu wapwa mutu ivene:

•   Omu Yehova Kalunga atengele mutu watete, Alama, Mbimbiliya yamba ngwayo “mutu apwile mwono wakuyoya.” (Kuputuka 2:7, Luvale Bible 1970) Alama kavamuhanyine mwonoko, oloze apwile jino mwono wakuyoya, kulumbununa nge apwile mutu wakuyoya.

•   Mbimbiliya yahanjika ngwayo mwono weji kuzatanga, weji kwivwanga chipepa chavyakulya, weji kulyanga vyakulya, weji kukavangizanga jishimbi, nakukwata mujimba wamufu. (VyavaLevi 5:2; 7:20; 23:30; Lushimbi lwamuchivali 12:20; Wavaka-Loma 13:1) Mutu ivene ikiye eji kulinganga vyumevi vanalave.

Uno mwono kawafwako tahi?

 Chiku, mwono weji kufwanga. Jivesi jajivulu muMbimbiliya jasolola nge mwono weji kufwanga. Tutalenu vyakutalilaho vino:

•   “Mwonou nauvulumuna ukiko naukafwa.”—Ezekele 18:4, 20, Luvale Bible 1970

•   Kushikulu muIsalele, vatu vavahanyine lushimbi ngwavo nge mutu navulumuna mulonga waunene, mwono wenyi vatelelele ‘kuutetako.’ (Kulovoka 12:15, 19; VyavaLevi 7:20, 21, 27; 19:8, Luvale Bible 1970) Kulumbununa nge mutu kana vatelelele ‘kumujiha.’—Kulovoka 31:14, Luvale Bible 1970.

•   Jivesi jimwe muMbimbiliya jazachisa mazu “mwono wakufwa” kulumbununa chivimbi. (VyavaLevi 21:11, kwinyikila chamwishi; Kulava 6:6, kwinyikila chamwishi) Numba tuhu jiMbmbiliya jajivulu jazachisa mazu “mujimba wakufwa,” chipwe “mutu wakufwa” mujivesi kana, oloze muchiHepeleu vazachisa lizu neʹphesh kulumbununa “mwono.”

Lizu “mwono” linahase kulumbununa nawa “kuyoya”

 Mbimbiliya yazachisa nawa lizu “mwono” kulumbununa “kuyoya.” Chakutalilaho, hali Yopa 33:22 vazachisa lizu lyachiHepeleu “mwono” (neʹphesh) kulumbununa “kuyoya.” Kaha nawa Mbimbiliya yasolola nge mwono wamutu chipwe kuyoya chamutu, chinahase kupwa muponde chipwe kufwa.—Kulovoka 4:19; Vaka-kuyula 9:17; Wavaka-Fwilipi 2:30.

 Kuzachisa lizu “mwono” mujila kaneyi chatukafwa tutachikize kanawa ulumbunwiso wajivesi jize jahanjika ngwajo mwono ‘unafumumo’ chipwe ‘kulovokamo.’ (Kuputuka 35:18; Luvale Bible 1970) Hanjikiso yakwamba ngwavo mwono ‘unafumumo’ yalumbununa nge kuyoya chamutu chinakumu. JiMbimbiliya jimwe jalumuna awa mazu ahali Kuputuka 35:18 ngwavo “alitwaminyine kuhwima.”—Mbimbiliya yaGood News Translation; naMbimbiliya yaNew Jerusalem Bible.

Okwo kwafuma kunangula chakwamba ngwavo mwono kawafwako

 Mauka avaka-Kulishitu amavulu afwelela ngwawo mwono kawafwako. Kunangula kana kachafuma muMbimbiliyako, oloze chafuma kuli vaHelase vakushikulu vaze valinangwile mangana autu. Mukanda waEncyclopædia Britannica wamba ngwawo: ‘Jivesi jamuMbimbiliya jize jahanjika halizu mwono, jalumbununa nge mwono wapwa chuma chakuhwima. Kajasolola nge hatwama chihandwa hamwono namujimbako. Shikaho kunangula chavaka-Kulishitu chakwamba ngwavo mwono walihandununa namujimba chafuma kuli vaHelase vakushikulu.”

 Kalunga eji kwivwanga kupihya nge vatu navafutula kunangula chenyi nakunangula chamangana autu, kunangula chakufwana nge mwono kawafwako. Shikaho Mbimbiliya yatuhuhumuna ngwayo: “Zangamenu kuchina nakupwa mutu umwe mwamitwala muundungo namangana autu, nakutangisa chamokomoko nge omu mwaya visemwa vyavatu.”—Wavaka-Kolose 2:8.