Mbimbiliya kayavuluka hatoma vyatunyama kanako. Oloze yavuluka ngwayo Kalunga ‘atengele vyuma vyosena,’ shikaho tunahase kukukulula ngwetu nava tunyama vamwe vavanene vamukalungalwiji vavatengele kuli Kalunga. * (Kusoloka 4:11) Numba tuhu Mbimbiliya kayavuluka muyachi watunyama kanavako, oloze yavuluka tunyama vamwe vaze vanahase kupwa hamukana watunyama kana.

•   “Tunyama vavanene vamukalungalwiji.”—Kuputuka 1:21.

•   “Vaka-kuhalala hamavu vosena.”—Kuputuka 1:25.

•   “Tunyama vamuchipapa.”—Kuputuka 1:25.

Uno tunyama vamwe vavanene vamukalungalwiji vafumine kutunyama veka tahi?

 Ava tunyama vamwe vavanene kavalijilile vaveneko, chipwe ngocho, vavavuluka kaha chindende muvyuma vyakuvumbwojola. Echi chalitombola namujimbu wamuMbimbiliya uze wahanjika ngwawo Kalunga atengele tunyama vosena. Chakutalilaho, mukanda waSamu 146:6 wavuluka Kalunga kupwa “[ikiye] atengele melu namavu, nakalungalwiji navyuma vyosena vyatwamamo.”

Uno ava tunyama vamwe vavanene vamukalungalwiji vapwileko lwola muka?

 Mbimbiliya yavuluka ngwayo tunyama vamukalungalwiji navahatunda vavatengele halikumbi lyamuchitanu nalyamuchitanu nalimwe chipwe ngwetu lwola lwakutenga vyuma. * (Kuputuka 1:20-25, 31) Shikaho Mbimbiliya yasolola nge ava tunyama vamwe vavanene vamukalungwalwiji kuvapwile hatando yayisuku.

Uno Mbehemote naLevyatane vapwile tunyama vamwe vavanene vamukalungalwiji tahi?

 Nduma. Numba tuhu ava tunyama vavuluka mumukanda waYopa kavahasa kuvalumbununa kanawa omwo vasolokako, oloze Mbehemote vamulumbununa kupwa nguvu, kaha Levyatane vamulumbununa kupwa ngandu. Ulumbunwiso kanou walitombola naulumbunwiso wamuVisoneka. (Yopa 40:15-23; 41:1, 14-17, 31) Shikaho vulukiso yakwamba ngwavo “Mbehemote naLevyatane” kayalumbununa nge vapwile tunyama vamwe vavanene vamukalungalwijiko. Kalunga alwezele Yopa akekese tunyama kana, kaha nawa twatachikiza ngwetu Yopa ayoyelele halwola luze tunyama vamwe vavanene vamukalungalwiji vapwile hivauchiko.—Yopa 40:16; 41:8.

Vyuma muka vyasolokele kuli ava tunyama vamwe vavanene vamukalungalwiji?

 Mbimbiliya kayahanjika hakulelangana chavava tunyamako. Chipwe ngocho, Mbimbiliya yahanjika ngwayo, vyuma vyosena vavitengele ‘mwomwo mukiko mwayile muchima waKalunga,’ ngocho Kalunga achimwene kupwa chakutamo kutenga tunyama vamwe vavanene vamukalungalwiji. (Kusoloka 4:11) Jino omu Kalunga amwene ngwenyi vyuma avatengelelele vinatesamo lyehi, ngocho alingishile tunyama kana valelangane.