Lwola lumwe, Kalunga etavishilenga vatu kumbata luhali. (Kuputuka 4:19; 16:1-4; 29:18-29) Oloze Kalunga kajinyine ngwenyi vatu vambatenga luhaliko, mwomwo atengelele Alama pwevo umwe kaha.

 Kalunga etavishile Yesu Kulishitu ashindakanye cheka havyuma ajinyine kutalisa kukumbata pwevo umwe kaha. (Yowano 8:28) Omu vamuhulishile vyaulo, akumbulwile ngwenyi: “Ou avatangile kufuma vene kumaputukilo avatengele lunga napwevo nakwamba ngwenyi: ‘Shikaho lunga mwakaseza ise nanaye nakukalipanjika napwevo lyenyi, kaha ava vavali navakapwanga mujimba umweko’ nyi?”—Mateu 19:4, 5.

 Kambaji kaYesu umwe, vamuhwiminyinyine kuli Kalunga asoneke ngwenyi: “Lunga hilunga apwenga napwevo lyenyi, kaha nawa pwevo hipwevo apwenga nalunga lyenyi.” (Wavaka-Kolinde 1, 7:2) Mbimbiliya yamba nawa ngwayo, kala lunga wakumbata wamuchikungulwilo chavaka-Kulishitu uze nawa vahana milimo yakuzata muchikungulwilo, atela kupwa “[hi]lunga ambata pwevo umwe kaha.”—WaChimoteu 1, 3:2, 12.