Vatu vavavulu veji kuhulisanga ngwavo: Mwomwo ika tweji kuyoyelanga? Mwomwo ika twapwila hano hamavu? navihula vyeka vyakupandama kukuyoya. Mbimbiliya yasolola nge tweji kuyoyanga mangana tulikate usepa naKalunga. Achitalenu vyuma vino vyamuchano vasoneka muMbimbiliya.

•   Kalunga ikiye Tengi yetu. Mbimbiliya ngwayo: “[Kalunga] ikiye atutengele, keshi etu vaveneko.”—Samu 100:3; Kusoloka 4:11.

•   Kala chuma atenga Kalunga chikwechi mulimo achitengela, kuhakilako vene nayetu vatu.—Isaya 45:18.

•   Kalunga atutenga namuchima ‘wakusaka vyuma vyakushipilitu.’ Muchima kana ukiko weji kutulingisanga tusake kutachikiza ovyo tweji kuyoyelanga. (Mateu 5:3) Kalunga asaka tutachikize ovyo tweji kuyoyelanga mangana tusuuluke.—Samu 145:16.

•   Tweji kusakanga vyuma vyakushipilitu hakulikata usepa naKalunga. Numba tuhu vatu vamwe vashinganyeka ngwavo kaveshi kuhasa kupwa masepa jaKalungako, oloze Mbimbiliya yatukolezeza ngwayo: “Pandamenu kuli Kalunga, kaha mwapandama kuli enu.”—WaYakova 4:8; 2:23.

•   Hakusaka tupwenga tumasepa jaKalunga, twatela kukavangiza vyuma vize asaka tulingenga. Vyuma kana vavivuluka muMbimbiliya hamukanda waMuka-kwambulula 12:13, ngwavo: “Ivwenunga Kalunga woma, nakwononokanga jishimbi jenyi, mwomwo echi chikiko vatutengelele.”—Mbimbiliya yaGood News Translation.

•   Kulutwe natukalivwisa kuwaha vyuma vize Kalunga ajinyine hakavanga hakutenga vatu omu mwakafumisako kuyanda chosena, nakutuhana etu masepa jenyi tweji kumulemesanga kuyoya chahaya myaka yosena.—Samu 37:10, 11.