Vyuma Muka Natulinangula kuMapwevo Vavuluka muMbimbiliya

PUTUKA KWIMBISA

Vyuma Yakumbulula Mbimbiliya

Mbimbimliya yavuluka mapwevo vavavulu vaze vanahase kutuhana chakutalilaho chamwaza. (Wavaka-Loma 15:4; WaChimoteu 2, 3:16, 17) Chihande chino chinahanjika hamapwevo vamwe vaze vasoneka muMbimbiliya. Kaha vavavulu vatuhana chakutalilaho chamwaza chize twatela kulondezeza, oloze vamwe chiku.—Wavaka-Kolinde 1, 10:11; WavaHepeleu 6:12.

Avingayile

Avingayile apwile mutu wangachilihi? Apwile pwevo lyaNavale, lunga uze apwile naluheto kaha nawa wamuchima waukalu. Chipwe ngocho, Avingayile apwile pwevo wamangana, wakulinyisa, wamwaza kaha nawa apwile navilinga vize vyevwishilenga Yehova kuwaha.—Samwele 1, 25:3.

Vyuma muka alingile? Avingayile alingile vyuma mukuzangama mangana ahonese ukalu. Ikiye nalunga lyenyi Navale vatwaminenga kungalila kuze aswamine Ndavichi uze ejile nakupwa mwangana wavaIsalele. Omu Ndavichi navatu jenyi vapwile kungalila kana, vakingile utanga wamikoko jaNavale kuveji. Oloze omu Ndavichi atumine vatu vayenga nakutonda vyakulya kuli Navale, ikiye akanyine kuvahana vyakulya. Ngocho Ndavichi asulakanyine chikuma, kaha akatukile navatu jenyi mangana vayenga nakujiha Navale navatu vakuzuvo yenyi vosena.—Samwele 1, 25:10-12, 22.

Omu Avingayile evwile vyuma alingile lunga lyenyi, alongesele vyuma washiwashi. Ahanyine vangamba jenyi vyakulya mangana vatwalile Ndavichi navatu jenyi, kaha naikiye ayile navo hamwe. (Samwele 1, 25:14-19, 24-31) Omu Ndavichi amwene wana atumine Avingayile, namuchima wakulinyisa apwile nawo, nakwivwa nawa mazu ahanjikile, amwene ngwenyi Kalunga ikiye amuzachishile mangana amukanyise kulinga mulonga wakumwanga manyinga. (Samwele 1, 25:32, 33) Mukuhita chalwola, Navale afwile, kaha Avingayile apwile jino pwevo lyaNdavichi.—Samwele 1, 25:37-41.

Vyuma muka natulinangula kuli Avingayile? Numba tuhu Avingayile apwile wamwaza chikuma, kaha nawa waluheto, oloze kalimwene kupwa wamulemu chikumako. Hakusaka kuneha kuunda, alisuwile kuya nakulikonekela hamulonga uze alingile lunga lyenyi. Ahonesele vikokojola mujila yakuunda, yakuzangama, kaha nawa omikile.

▸ Nge muli nakusaka mijimbu yayivulu kutalisa kuli Avingayile, kaha talenu chihande chakwamba ngwavo “Alingile Mwakuzangama.”

Ndevola

Ndevola apwile mutu wangachilihi? Apwile kapolofweto wapwevo uze Yehova Kalunga kavaIsalele azachishilenga hakulweza vatu jenyi vyuma vize asakilenga ngwenyi valinge. Kalunga amuzachishilenga nawa mangana akafwe vaIsalele vatwame mukuunda.—Vaka-kuyula 4:4, 5.

Vyuma muka alingile? Kapolofweto wapwevo Ndevola omikile nakukundwiza vaka-kulemesa Kalunga. Ndevola alwezele Mbalake atwaminyine maswalale javaIsalele hakuya nakulwa navaka-kole javo vaKanane. (Vaka-kuyula 4:6, 7) Omu Mbalake alwezele Ndevola ngwenyi ayenga nenyi hamwe, Ndevola kevwile womako, oloze alisuwile nakuya nenyi hamwe.—Vaka-kuyula 4:8, 9.

Omu Kalunga akafwile vaIsalele vafungulule vaka-kole javo, Ndevola embile mwaso uze wapwile nakuhanjika havyuma alingile ikiye naMbalake. Mumwaso kana vavulukamo nawa vyuma alingile Yayele pwevo wakuhamuka hakufungulula vaKanane.—Vaka-kuyula kapetulu 5.

Vyuma muka natulinangula kuli Ndevola? Ndevola apwile wakulisuula kaha nawa wakumika. Akolezezele vakwavo valinge vyuma vyakwoloka kumeso aKalunga. Kahomu valingilenga ngocho, avasangejekelenga.

▸ Nge muli nakusaka mijimbu yayivulu kutalisa kuli Ndevola, kaha talenu chihande chakwamba ngwavo “Ngwapwile Ngunevo YavaIsalele.”

Ndelila

Ndelila apwile mutu wangachilihi? Apwile pwevo uze vazangile chikuma kuli muka-kuyula wavaIsalele Samasone.—Vaka-kuyula 16:4, 5.

Vyuma muka alingile? Etavilile jimbongo vamuhanyine kuli vilolo javaFwilishite, mangana asopolole Samasone uze vapwile nakuzachisa kuli Kalunga hakuyovola vaIsalele vaze vakwachile undungo kuli vaFwilishite. VaFwilishite kavahashile kumufungululako mwomwo yangolo jakukomwesa jize apwile najo. (Vaka-kuyula 13:5) Ngocho vaze vilolo vayile kuli Ndelila mangana avakafwe.

VaFwilishite vahanyine Ndelila majika kanwa mangana avalweze okwo kwapwile nakufuma ngolo jaSamasone. Ndelila atambwile jize jimbongo vamuhanyine, kaha hanyima yakumushinjila mapapa kakavulu, Samasone amulwezele jino okwo kwapwile ngolo jenyi. (Vaka-kuyula 16:15-17) Kufumaho, Ndelila alwezele vaFwilishite okwo kwapwile ngolo jaSamasone, ngocho vamukwachile namuhaka mukamenga.—Vaka-kuyula 16:18-21.

Vyuma muka natulinangula kuli Ndelila? Ndelila apwa chakutalilaho chakutuhuhumuna. Mwomwo yakupwa namuchima walushiushiu, Ndelila alyongele, nakuhona kupwa wakushishika kuli ngamba yaYehova Kalunga.

Eseta

Eseta apwile mutu wangachilihi? Apwile kaYuleya uze vasakwile kuli Mwangana wakuPeleja Ahaswelu kupwa lisano.

Vyuma muka alingile? Lisano Eseta azachishile ngolo jenyi mangana akafwe vatu jaKalunga vahone kuvajiha. Atachikijile ngwenyi vanahakeko lushimbi lwakwamba ngwavo, vanatongola likumbi lyakujiha vaYuleya vosena vamuWangana wavaPeleja. Lushimbi kana lwafumine kuli Hamane, uze apwile ngambela yamwangana. (Eseta 3:13-15; 4:1, 5) Eseta vamukafwile kuli musonyenyi Molotekai, kaha ahakile kuyoya chenyi muponde hakuya nakwambulula mujimbu kana kuli lunga lyenyi Mwangana Ahaswelu. (Eseta 4:10-16; 7:1-10) Ahaswelu etavishile Eseta naMolotekai mangana vahakeko lushimbi lukwavo lwakwitavisa vaYuleya valikinge vavene. Ngocho vaYuleya vafungulwile vaka-kole javo.—Eseta 8:5-11; 9:16, 17.

Vyuma muka natulinangula kuli Eseta? Lisano Eseta atusela chakutalilaho chamwaza chakupwa vakumika, nakulinyisa nakulikehesa. (Samu 31:24; Wavaka-Fwilipi 2:3) Chamokomoko nakuwaha chenyi nachihela apwile nacho, oloze etavilile vamukafwe. Eseta ahanjikile kuli lunga lyenyi mujila yakuzangama, yakalemesa kaha nawa apwile wakumika. Halwola luze vaYuleya vapwile muponde, Eseta omikile nakulijimbula naikiye kupwa kaYuleya.

▸ Nge muli nakusaka mijimbu yayivulu kutalisa kuli Eseta, kaha talenu chihande chakwamba ngwavo “Akingile Vatu jaKalunga” nachakwamba ngwavo “Apwile Wamangana, Wakuhamuka Kaha Nawa Wakulisuula.”

Eve

Eve apwile mutu wangachilihi? Apwile pwevo watete kutenga kaha nawa pwevo watete uze vavuluka muMbimbiliya.

Vyuma muka alingile? Eve kononokele kulushimbi luze avahanyine Kalungako. Eve naikiye apwile wakukupuka ngana muze apwile lunga lyenyi Alama. Kaha vavatengele nalisesa lyakulisakwila vyakulinga nauhashi wakupwa navilinga vize atwama navyo Kalunga vyakufwana nge zangi namangana. (Kuputuka 1:27) Eve atachikijile ngwenyi, Kalunga alwezele Alama ngwenyi kavatelelele kulya kumutondo umwe wamumilemba uze avakanyishileko kuchina navafwa. Oloze Satana ongele Eve nakumulingisa afwelele ngwenyi kaveshi kufwako. Amulingishile afwelele nawa ngwenyi, navayoya kanawa kachi nge navalikanga kuli Kalunga. Ngocho alile kumuhako kana, kufumaho ahanyineko nalunga lyenyi, kaha naikiye alile.—Kuputuka 3:1-6; WaChimoteu 1, 2:14.

Vyuma muka natulinangula kuli Eve? Vyuma alingile Eve vyatunangula nge chapwa chaponde kushinganyekanga havyuma vyakuhenga. Chikupu vene, Eve alikangile kuli Kalunga mwomwo afwililile kupwa naulemu uze kawapwile wenyiko.—Kuputuka 3:6; WaYowano 1, 2:16.

Hana

Hana apwile mutu wangachilihi? Apwile pwevo lyaElekana, kaha nawa naye yaSamwele, kapolofweto uze ayile fuma muIsalele.—Samwele 1, 1:1, 2, 4-7.

Vyuma muka alingile? Hana kapwile namwanako, ngocho alombelenga kuli Kalunga mangana amuvendejeke. Lunga lyaHana ambachile mapwevo vavali. Pwevo lyenyi mukwavo Penyina apwile navana, oloze Hana apwile mumba halwola lwalusuku. Numba tuhu Penyina atolekelenga Hana, oloze Hana alombelenga kuli Kalunga mangana amuvendejeke. Ashikile Kalunga ngwenyi, kachi nge mwamuhana mwana walunga, kaha uze mwana mwakamuhana akamuzachilenga hatavanaku, mbalaka yize vanungwilenga yize vazachishilenga vaIsalele hakulemesa Kalunga.—Samwele 1, 1:11.

Kalunga akukumbulwile kulomba chaHana, ngocho Hana asemene namwana walunga Samwele. Hana alamine lushiko lwenyi, kaha atwalile Samwele akazachile hatavanaku omu apwile kanyike wamundende. (Samwele 1, 1:27, 28) Kaha mwaka himwaka amutongelelenga uvwalo wakuzeneka mavoko nakumutwalilawo. Kutwala muze, Kalunga akiswile Hana hakumuhana vana vatanu, malunga vatatu namapwevo vavali.—Samwele 1, 2:18-21.

Vyuma muka natulinangula kuli Hana? Kulomba chakafwile Hana omike muukalu uze apwile nakuhitamo. Kulomba chenyi chize chatwama hali Samwele 1, 2:1-10, chasolola nge afwelele chikuma Kalunga.

▸ Nge muli nakusaka mijimbu yayivulu kutalisa kuli Hana, kaha talenu chihande chakwamba ngwavo, “Alombele naMuchima Wenyi Wosena Kuli Kalunga.”
▸ Nge muli nakusaka mijimbu yayivulu kutalisa kuli ovyo Kalunga etavishilile vatu jenyi vakushikulu kumbata luhali, kaha talenu chihande chamuChingeleshi chakwamba ngwavo “Does God Approve of Polygamy?”

Yayele

Yayele apwile mutu wangachilihi? Apwile pwevo lyaHevele, lunga uze kapwile kaIsaleleko. Yayele apwile wakumika hakukundwiza vatu jaKalunga.

Vyuma muka alingile? Yayele alingile vyuma mujila yamangana omu Shisela mukulwane wamaswalale wavaka-Kanane ejile muchilombo chenyi. Halwola kana Shisela navatu jenyi vavafungulwile kuli vaIsalele, ngocho apwile nakutonda chihela chakuswama. Yayele amulwezele aswame mumbalaka yenyi nakunoka. Kahomu Shisela asavalile, Yayele amujihile.—Vaka-kuyula 4:17-21.

Vyuma alingile Yayele vyateselemo upolofweto waNdevola wakwamba ngwavo: “Yehova mwakahana Shisela mumavoko apwevo.” (Vaka-kuyula 4:9) Shikaho Yayele vamuvuluka ngwavo, apwile “wakukisula hali mapwevo vaze vatwama mujimbalaka.”—Vaka-kuyula 5:24.

Vyuma muka natulinangula kuli Yayele? Yayele alingile vyuma mukuzangama kaha nawa apwile wakumika. Chuma alingile vyasolola omu Kalunga eji kulingilangamo vyuma mangana atesemo upolofweto umwe.

Yezevele

Yezevele apwile mutu wangachilihi? Apwile pwevo lyaAhave Mwangana wavaIsalele. Kapwile kaIsaleleko kaha nawa kalemeselanga Yehovako. Oloze alameselenga Mbale kalunga kavaKanane.

Vyuma muka alingile? Lisano Yezevele apwile chilyanyi, kaha nawa wamupi muchima. Alemeselenga Mbale nakukundwiza vilinga vyaujila. Kaha nawa asakile kukanyisa vatu valitwamine kulemesa Kalunga wamuchano Yehova.—Vamyangana 1, 18:4, 13; 19:1-3.

Hakusaka mangana alingile vyuma asakilenga, Yezevele alyongelenga nakujiha vatu. (Vamyangana 1, 21:8-16) Ngana muze ahanjikile Kalunga, Yezevele afwile mujila yayipi, kaha kavamufunjileko.—Vamyangana 1, 21:23; Vamyangana 2, 9:10, 32-37.

Vyuma muka natulinangula kuli Yezevele? Yezevele alingilenga vyuma vyavipi. Apwile navilinga vyavipi nakulinga kala vyuma mangana alinganyalise ivene. Kaha lijina lyenyi lyemanyinako vilinga vyakwivwisa sonyi, muka-ujila, kaha nawa muka-kulinga kala mweshomwo nasake.

Leya

Leya apwile mutu wangachilihi? Apwile pwevo lyaYakova watete. Kaha songo yenyi Lakele apwile muhalika wenyi.—Kuputuka 29:20-29.

Vyuma muka alingile? Leya asemene naYakova vana vamalunga 6. (Lute 4:11) Yakova asakile kumbata Lakele keshi Leyako, oloze isewenu Lavane amuhanyine Leya muchishishisa chakumuhana Lakele. Omu Yakova atachikijile ngwenyi vanamuhane Leya, ayile kuli Lavane. Kaha Lavane amulwezele ngwenyi, chapwile chakuhenga kuvangila kuhangisa kanyike shimbu kanda mukulwane. Shikaho omu mwahichile chalumingo chimwe, Yakova ambachile Lakele.—Kuputuka 29:26-28.

Yakova azangile chikuma Lakele kuhambakana Leya. (Kuputuka 29:30) Echi chalingishile Leya aputuke nakulipecha nasongo yenyi mangana Yakova amuzange. Ngocho Kalunga amwene vyuma apwile nakuhitamo Leya, kaha amukiswile nakumuhana vana 7. Vamalunga 6 nawapwevo umwe.—Kuputuka 29:31.

Vyuma muka natulinangula kuli Leya? Leya apendaminyine hali Kalunga, kaha kechelelele ukalu wamutanga umuhonese kuzachila Kalungako. (Kuputuka 29:32-35; 30:20) Mujimbu wakuyoya chenyi wasolola hatoma nge kumbata luhali chapwa chachipi, chuma chize Kalunga etavishile lwola lumwe. Kalunga asaka lunga ambate pwevo umwe chipwe pwevo kusomboka kuli lunga umwe.—Mateu 19:4-6.

▸ Nge muli nakusaka mijimbu yayivulu kutalisa kuli Leya, kaha talenu chihande chakwamba ngwavo, “Vasongo Namutu Vakuhomba Vaze ‘Vatungile Zuvo yaIsalele.’”
▸ Nge muli nakusaka mijimbu yayivulu kutalisa kuli ovyo Kalunga etavishilile lwola lumwe vatu kumbata luhali, kaha talenu chihande chamuChingeleshi chakwamba ngwavo “Does God Approve of Polygamy?”

Malita

Malita apwile mutu wangachilihi? Malita apwile ndumbu yaLazalu naMaliya, kaha nawa vosena vatatu vatwaminenga muMbetane kwakamwihi naYelusalema.

Vyuma muka alingile? Malita apwile sepa lyaYesu. Kaha nawa “Yesu azangile Malita nandumbwenyi, naLazalu.” (Yowano 11:5.) Malita apwile pwevo wamuchima wazumbu. Omu Yesu ayile kuzuvo yavo, Maliya asakwileho kutwama nakwivwilila kuvyuma apwile nakuhanjika Yesu, oloze Malita apwile nakuzangajala milimo yakukanda. Omu ayayavalile kuli Yesu ngwenyi songo yenyi Maliya namwechelela azate ukawenyi milimo, Yesu amuhuhumwine nakwolola vishinganyeka apwile navyo.—Luka 10:38-42.

Kahomu Lazalu avijile, Malita nandumbwenyi Maliya vatumine mazu kuli Yesu mangana ezenga nakuka ndumbwavo. (Yowano 11:3, 21) Oloze Lazalu afwile. Vyuma ahanjikile Malita kuli Yesu vyasolwele nge afwelelele mazu amuMbimbiliya aze ahanjika hakusanguka nakufwelela ngwenyi Yesu akwechi ngolo jakusangula ndumbwenyi.—Yowano 11:20-27.

Vyuma muka natulinangula kuli Malita? Malita apwile namuchima wazumbu. Kaha nawa etavililile vyuma vamuhuhumwine. Kaha nawa apwile wakukasunuka kuhanjika omu evwilenga nalufwelelo lwenyi.

▸ Nge muli nakusaka mijimbu yayivulu kutalisa kuli Malita, kaha talenu chihande chakwamba ngwavo “Ngunetava.”

Maliya (naye yaYesu)

Maliya apwile mutu wangachilihi? Apwile mwanapwevo wakaYuleya, uze apwile kanda alisavaleho nalunga omu asemene Yesu, uze nawa emichile mwana Kalunga mujila yakukomwesa.

Vyuma muka alingile? Maliya alingilenga mwaya muchima waKalunga. Omu kangelo ejile nakumulweza ngwenyi mwemita nakusema mwana uze mwakapwa Meshiya, halwola kana hivanamuhuhu lyehi. (Luka 1:26-33) Maliya etavilile mullimo vamuhanyine, kaha asemene Yesu. Kufumaho, Maliya alisavalile jino nalunga lyenyi Yosefwe nakusema vana vamalunga vawana navamapwevo vavali. (Mateu 13:55, 56) Numba tuhu azachile mulimo waulemu, oloze kasakilenga vatu vamwalise nakumuvumbika chikuma omu azachilenga mulimo wakwambulula halwola Yesu apwile hano hamavu chipwe kumwalisa omu apwile muchikungulwilo chavaka-Kulishitu vamulikulikaji lyamyaka lyakulivangako.

Vyuma muka natulinangula kuli Maliya? Maliya apwile pwevo wakushishika uze alisuwile kuzata mulimo waulemu chikuma. Kaha nawa atachikijile chikuma visoneka. Lwola lumwe Maliya azachishile visoneka mapapa 20 hakuhanjika mazu aze atwama hali Luka 1:46-55.

▸ Nge muli nakusaka mijimbu yayivulu kutalisa kuli Maliya, kaha talenu chihande chamuChingeleshi chakwamba ngwavo “What Mary’s Example Can Teach Us.”

Maliya (ndumbu yaMalita naLazalu)

Maliya apwile mutu wangachilihi? Maliya nandumbwenyi Lazalu naMalita vapwile masepa jaYesu.

Vyuma muka alingile? Kakavulu Maliya amwenenga Yesu kupwa MwanaKalunga. Afwelele ngwenyi nge Yesu kwapwile kachi ndumbwenyi Lazalu kafwileko, kaha nawa omu vasangwile ndumbwenyi nayikiye kwapwile. Ndumbwenyi Malita amutenukilile omu apwile nakwivwilila kuli Yesu muchishishisa chakumufwako kuzata milimo yakukanda. Oloze Yesu asangejekele Maliya hakuhaka vyuma vyakushipilitu kulutwe.—Luka 10:38-42.

Lwola lumwe, Maliya asolwele muchima wazumbu hakuhingunwina “maji alivumba lyamwaza andando yayinene chikuma” kumahinji Yesu. (Mateu 26:6, 7) Vatu vamwe vamwambile ngwavo apwile mutu walwenyeka. Oloze Yesu amuhakwililile nakwamba ngwenyi: “Kweshokwo navakambulwila ou mujimbu wamwaza [waWangana waKalunga] mukaye kosena, chuma nalingi ou pwevo nachikiko navakachivulukanga mangana vakamwanukilengaho.”—Mateu 24:14; 26:8-13.

Vyuma muka natulinangula kuli Maliya? Maliya apwile nalufwelelo lwakukola. Amwenenga kulemesa Kalunga kupwa chachilemu kuhambakana kala vyuma mukuyoya chenyi. Kaha nawa avumbikilenga Yesu, hakulisuula kuzachisa chuma chize chapwile chandando yayinene.

Maliya Mangatala

Maliya Mangatala apwile mutu wangachilihi? Apwile kambaji kaYesu wakushishika.

Vyuma muka alingile? Maliya Mangatala apwile hamukana wamapwevo vaze vatambukilenga hamwe naYesu kaha nawa apwile kambaji kenyi. Azachishilenga vikumba vyenyi hakuzakama vakwavo. (Luka 8:1-3) Atwalileho lika kukavangiza Yesu swi nomu akumishile kuzata mulimo wenyi hano hamavu. Kaha nawa alikachile naYesu palanga nomu vamujihile. Apwile nakutokwa chakupwa havatu vatete vamwene Yesu omu asangukile.—Yowano 20:11-18.

Vyuma muka natulinangula kuli Maliya Mangatala? Maliya Mangatala akundwijilenga mulimo wakwambulula waYesu nakutwalaho lika kupwa kambaji wakushishika.

Milyame

Milyame apwile mutu wangachilihi? Apwile ndumbu yaMose naAlone. Kaha nawa ikiye apwile kapolofweto wapwevo watete vavuluka muMbimbiliya.

Vyuma muka alingile? Hakuwana nge apwile kapolofweto, ngocho apwile namulimo wakulweza vatu mazu akufuma kuli Kalunga. Alivwishilenga kuwaha kuzata milimo yayilemu chikuma muIsalele, kahomu Kalunga anongesele vaEjipitu haKalungalwiji Uchila, embililile hamwe namalunga vavaIsalele mwaso wakufungulula.—Kulovoka 15:1, 20, 21.

Kutwala muze, Milyame naAlone vahanjikile mwamupi hali Mose. Muchima wakulivwimba ukiko wavalingishile valinge ngocho. Kalunga “apwile nakwivwilila” vyuma vapwile nakuhanjika, kaha ahuhumwine Milyame naAlone. (Kulava 12:1-9) Kalunga azakangamishile Milyame namusongo wambumba, mwomwo azachishile hanjikiso yayipi. Mose alembelele Kalunga amukonekele, ngocho Kalunga okile Milyame. Vamwitavishile cheka kupwa muchilombo chavaIsalele hanyima yakumuhandula kuvakwavo hamakumbi 7.—Kulava 12:10-15.

Mbimbiliya yasolola nge Milyame etavilile kumuhuhumuna. Hanyima yamyaka yayivulu, Kalunga ahanjikile hamulimo amuhanyine omu alwezele vaIsalele ngwenyi: “Ngwamihanyine Mose, naAlone, naMilyame vamitetekele.”—Mika 6:4.

Vyuma muka natulinangula kuli Milyame? Mujimbu wakuyoya chaMilyame wasolola nge Kalunga eji kwivwililanga vyuma veji kuhanjikanga vaka-kumulemesa. Tunamono nawa nge hakusaka twivwise Kalunga kuwaha katwatela kupwa namuchima wakulivwimba nalwiso vize vinahase kutulingisa tupihise majina avakwetuko.

Lakele

Lakele apwile mutu wangachilihi? Apwile mwana Lavane, kaha nawa pwevo lyaYakova uze azangile chikuma.

Vyuma muka alingile? Lakele asombokele kuli Yakova, kaha asemene nenyi vana vavali vamalunga vaze vapwile mitwe yajitanga yamiyachi 12 yavaIsalele. Lakele aliwanyine nalunga lyenyi omu apwile nakufunga mikoko jaise halishima. (Kuputuka 29:9, 10) Apwile “wamwaza chikuma mujimba nachihanga” kuhambakana yayenyi Leya.—Kuputuka 29:17.

Yakova azangile chikuma Lakele, ngocho etavile kuzata myaka 7 mangana amumbate. (Kuputuka 29:18) Lavane ongele Yakova mangana ambate Leya. Kufumaho jino amwitavishile ambate nawa Lakele.—Kuputuka 29:25-27.

Yakova azangile chikuma Lakele navana venyi vavali vaze asemene nenyi kuhambakana muze azangile Leya navana venyi. (Kuputuka 37:3; 44:20, 27-29) Echi chalingishile vaputuke kulizungisa nayayenyi.—Kuputuka 29:30; 30:1, 15.

Vyuma muka natulinangula kuli Lakele? Lakele omikile muukalu wamutanga, kaha twalileho lika nakufwelela ngwenyi Kalunga mwevwilila kukulomba chenyi. (Kuputuka 30:22-24) Mujimbu wenyi wasolola nge kumbata luhali cheji kunehanga ukalu mutanga. Kaha nawa mujimbu waLakele wasolola nge chapwile chakutamo Kalunga kuhakako lushimbi lwakwamba nge lunga atela kumbata pwevo umwe kaha.—Mateu 19:4-6.

▸ Nge muli nakusaka mijimbu yayivulu kutalisa kuli Lakele, kaha talenu chihande chakwamba ngwavo “Vasongo Namutu Vakuhomba Vaze ‘Vatungile Zuvo yaIsalele’”
▸ Nge muli nakusaka mijimbu yayivulu kutalisa kuli ovyo Kalunga etavishilile lwola lumwe vatu kumbata luhali, kaha talenu chihande chamuChingeleshi chakwamba ngwavo “Does God Approve of Polygamy?”

Lahave

Lahave apwile mutu wangachilihi? Apwile pwevo muka-ujila uze atwaminenga munganda yaKanane muYeliko, uze ejile nakupwa muka-kulemesa Yehova Kalunga.

Vyuma muka alingile? Lahave aswekele vaIsalele vavali vaze vayile nakusondwesa lifuchi. Alingile ngocho mwomwo evwile mijimbu yahanjikile omwo Yehova Kalunga ayowele vatu jenyi kufuma muEjipitu, nomwo nawa avayowele kuli vaAmole.

Lahave akafwile vaze vandoji nakuvalweza ngwenyi kanda vakamujihako hamwe natanga yenyiko omu vaIsalele navakanongesa Yeliko. Vaze vandoji vetavilile, kaha vamulwezele vyuma atelele kulinga. Vamulwezele ngwavo katelelele kulweza vatu ovyo vanakatukilako, kaha ikiye navatanga jenyi vatelelele kutwama muzuvo, kaha nawa atelelele kukasa mukole uchila munjanena mangana vakatachikijileho zuvo yenyi. Lahave akavangijile jindongi vamuhanyine, kaha ikiye navatanga jenyi vayovokele omu vaIsalele vafungulwile Yeliko.

Kutwala muze, Lahave asombokele kuli kaIsalele umwe uze ejile nakupwa kakuluka yaMwangana Ndavichi naYesu Kalishitu.—Yoshuwa 2:1-24; 6:25; Mateu 1:5, 6, 16.

Vyuma muka natulinangula kuli Lahave? Mbimbiliya yavuluka Lahave kupwa chakutalilaho chamwaza. (WavaHepeleu 11:30, 31; WaYakova 2:25) Mujimbu wenyi wasolola nge Kalunga eji kukonekelanga, kaha katala vatu kumesoko, kaha nawa eji kukisulanga vaze veji kumufwelelanga chamokomoko nachisemwa chavo.

▸ Nge muli nakusaka mijimbu yayivulu kutalisa kuli Lahave, kaha talenu chihande chakwamba ngwavo “Vamuvulukilile Kwoloka haVilinga Vyenyi”

Laveka

Laveka apwile mutu wangachilihi? Apwile pwevo lyaIsaka kaha nawa naye yaYakova naEsau.

Vyuma muka alingile? Laveka alingilenga mwaya muchima waKalunga numba tuhu kulinga ngocho chamukaluhwililenga. Lwola lumwe omu apwile nakuswita meya halishima, kwejile lunga umwe uze alombele meya akunwa. Hahaze vene Laveka amuhanyine meya akunwa nakulisuula nawa kuswichila vangamela jauze lunga meya. (Kuputuka 24:15-20) Lunga kana apwile ngamba yaApalahama, uze ayile nakutondela Isaka mwana Apalahama pwevo. (Kuputuka 24:2-4) Kaha nawa alombele Kalunga amukisule. Omu uze lunga amwene kukilikita nachisambo asolwele Laveka, atachikijile jino ngwenyi Kalunga akumbulwile kulomba chenyi, hakumukafwa amone ngwenyi, ou ikiye pwevo atelelele kumbata Isaka.—Kuputuka 24:10-14, 21, 27.

Omu Laveka atachikijile ovyo akatukilile uze ngamba yaApalahama, etavililile kuya nenyi hamwe mangana akapwe pwevo lyaIsaka. (Kuputuka 24:57-59) Nakushimbula chiku Laveka asemene vapasa vamalunga. Kalunga amulwezelele chimweza ngwenyi, mwanenyi wamukulwane Esau mwakazachilanga mwanenyi wakanyike Yakova. (Kuputuka 25:23) Shikaho omu Isaka asakile kukisula mwanenyi watwatwa Esau, Laveka alingile vyuma vimwe mangana Isaka akisule Yakova kweseka navyuma vize ajinyine chaKalunga.—Kuputuka 27:1-17.

Vyuma muka natulinangula kuli Laveka? Laveka apwile wakulikehesa, nyamalikita kaha nawa wachisambo. Vilinga kana vyamulingishile apwenga pwevo wamwenemwene, chisemi wamwaza kaha nawa muka-kulemesa Kalunga wamuchano.

▸ Nge muli nakusaka mijimbu yayivulu kutalisa kuli Laveka, kaha talenu chihande chakwamba ngwavo “E Mwane Nanguya.”

Lute

Lute apwile mutu wangachilihi? Apwile kaMowave uze asezele tulunga twenyi nalifuchi lyenyi nakuya nakupwa muka-kulemesa Yehova mulifuchi lyaIsalele.

Vyuma muka alingile? Lute asolwelele nayawenu Nowemi zangi yamwenemwene. Nowemi nalunga lyenyi navana vavo vamalunga vavali, vayile nakutwama kuMowave mwomwo yazala yapwile mulifuchi lyaIsalele. Kaha nakushimbula chiku vana venyi vambachile mapwevo vavaMowave, Lute naOlopa.

Omu chakumine changa Nowemi ashinganyekele kukinduluka muIsalele. Lute naOlopa valisuwile kuya hamwe naikiye. Oloze Nowemi avalwezele vakinduluke kuli vausoko wavo. Kaha Olopa etavilile kukinduluka. (Lute 1:1-6, 15) Oloze Lute alipanjikile kuli nayewenu. Amuzangile chikuma, kaha asakile kulemesa Yehova, Kalunga kaNowemi.—Lute 1:16, 17; 2:11.

Lute apwile napuho yakupwa nyamalikita kaha nayakupwa wakulinyisa muMbetelema muze mwapwile mwimbo lyaNowemi. Kaha pichi umwe walijina lyaMbowaze evwililile uselewa Lute kaha amuhanyinenga kulya mangana akalye naNowemi. (Lute 2:5-7, 20) Kutwala muze Lute asombokele kuli Mbowaze, kaha apwile kakuluka yaMwangana Ndavichi naYesu Kulishitu.—Mateu 1:5, 6, 16.

Vyuma muka natulinangula kuli Lute? Hakuwana nge Lute azangile chikuma Nowemi naYehova, ngocho alisuwile kuseza vausoko wenyi nalifuchi lyenyi. Apwile nyamalikita, wakulisuula, wakushishika numba tuhu amwenenga ukalu wakulisezaseza.

▸ Nge muli nakusaka mijimbu yayivulu kutalisa kuli Lute, kaha talenu chihande chakwamba ngwavo “Kuze Nauya Nanguyako” nachakwamba ngwavo “Pwevo Wakushishika.”

Sala

Sala apwile mutu wangachilihi? Apwile pwevo lyaApalahama kaha nawa naye yaIsaka.

Vyuma muka alingile? Sala etavilile kuseza chiyoyelo chauhando munganda yaluheto yaUle, mwomwo afwelelele jishiko jize Kalunga ashikile lunga lyenyi Apalahama. Kalunga alwezele Apalahama afume munganda yaUle nakuya nakutwama mulifuchi lyaKanane. Kaha Kalunga amushikile kukakumulingisa kupwa muyachi waunene. (Kuputuka 12:1-5) Halwola kana, Sala apwile namyaka yakusemuka 60. Kufuma vene halwola kana Sala nalunga lyenyi vatwaminenga nakunugwojokanga mujimbalaka.

Numba tuhu chiyoyelo chakunugwojoka chapwilenga chaponde kuli Sala, oloze akundwijilenga Apalahama hakukavangiza jishimbi jaKalunga. (Kuputuka 12:10, 15) Sala ahombelenga mwomwo yakuhona kupwa namwana halwola lwalusuku. Oloze Kalunga ashikile kukakisula vaka-tanga yaApalahama. (Kuputuka 12:7; 13:15; 15:18; 16:1, 2, 15) Kutwala muze Kalunga ashikile Sala ngwenyi mwakapwa namwana kuli Apalahama. Kaha akwachile kungoji omu ahambakanyine hamyaka yakusema vana. Halwola kana apwile namyaka yakusemuka 90, kaha lunga lyenyi apwile namyaka 100. (Kuputuka 17:17; 21:2-5) Kaha uze mwana vamulukile ngwavo ikiye Isaka.

Vyuma muka natulinangula kuli Sala? Chakutalilaho chaSala, cheji kutukafwanga tufwelele jishiko jaYehova, numba tuhu lwola lumwe chinahase kupwa chachikalu kujifwelela. (WavaHepeleu 11:11) Kaha nawa chakutalilaho chenyi chakupwa pwevo lyamutu, cheji kutunangulanga ovyo chapwila chachilemu vatu muulo kulivumbikanga umwe namukwavo.—WaPetulu 1, 3:5, 6.

▸ Nge muli nakusaka mijimbu yayivulu kutalisa kuli Lute, kaha talenu chihande chakwamba ngwavo “Ove Wapwa Upwevo Wamwaza” nachakwamba ngwavo “Kalunga Amuvulukile Ngwenyi ‘Mwangana.’”

Mwanapwevo wakuShulame

Mwanapwevo wakuShulame apwile mutu wangachilihi? Apwile wamwaza kaha nawa vamuvuluka chikuma mumukanda wamuMbimbiliya vavuluka ngwavo Mwaso waSolomone. Mbimbiliya kayavuluka lijina lyenyi.

Vyuma muka alingile? Mwanapwevo wakuShulame apwile wakushishika kuli kafunga, lunga uze azangile chikuma. (Mwaso waSolomone 2:16) Chipwe ngocho, kuwaha chenyi kumujimba nakuchihanga vyakunywile Mwangana Solomone nakumulingisa amuzange chikuma. (Mwaso waSolomone 7:6) Numba tuhu vakwavo vamushinjilile asakule Solomone, ou mwanapwevo akanyine. Ikiye azangile chikuma uze kafunga kaha nawa apwile wakushishika kuli ikiye.—Mwaso waSolomone 3:5; 7:10; 8:6.

Vyuma muka natulinangula kuli mwanapwevo wakuShulame? Ou mwanapwevo kalimwenenga kupwa wamulemuko numba tuhu apwile wamwaza kaha nawa vamufwililile. Kechelelele vatu, chipwe luheto, chipwe ulemu vimuhonese kuzanga uze kafungako. Oloze apwile namuchima wakulikanyisa nakupwa lika navilinga vitoma.

Pwevo lyaLote

Pwevo lyaLote apwile mutu wangachilihi? Mbimbiliya kayavuluka lijina lyenyiko. Oloze yamba ngwayo, apwile navana vamapwevo vavali, kaha atwaminenga hamwe natanga yenyi munganda yaSotome.—Kuputuka 19:1, 15.

Vyuma muka alingile? Alikangile kulushimbi lwaKalunga. Kalunga anongesele nganda yaSotome najinganda japwile kwakamwihi mwomwo yakuvula chavilinga vyaujila. Hakuwana nge Kalunga azangile chikuma Lote natanga yenyi vaze vapwile nakutwama muSotome, ngocho atumine vangelo vavali mangana vavalovole munganda.—Kuputuka 18:20; 19:1, 12, 13.

Vaze vangelo valwezele tanga yaLote yilovoke munganda kana nakuhona kutala kunyima kuchina navafwa. (Kuputuka 19:17) Pwevo lyaLote “atalile kunyima, kaha alumukile kaumbu kamungwa.”—Kuputuka 19:26.

Vyuma muka natulinangula kuli pwevo lyaLote? Mujimbu wenyi wasolola ponde yatwama hakuzanga chikuma luheto nakulikanga kuli Kalunga. Yesu ahanjikile muchakutalilaho chenyi ngwenyi: “Anukenu pwevo lyaLote.”—Luka 17:32.