Eyo, Liyavolo kwatwama chikupu. Ikiye “muka-kuyula kano kaye.” Apwa mutu wakushipilitu uze ahungumukile nakulikanga kuli Kalunga. (Yowano 14:30; Wavaka-Efwesu 6:11, 12) Mbimbiliya yavuluka majina ano valuka Liyavolo mwomwo yavilinga vyenyi:

•   Satana, kulumbununa “Muka-kulikanga.”—Yopa 1:6.

•   Liyavolo, kulumbununa “Muka-lusongi.”—Kusoloka 12:9.

•   Linoka, kulumbununa “Muka-kwonga.”—Wavaka-Kolinde 2, 11:3.

•   Muka-kweseka.—Mateu 4:3.

•   Muka-makuli.—Yowano 8:44.

Satana kapwa vilinga vyavipiko

 Vatu vamwe vashinganyeka ngwavo Satana Liyavolo apwa kaha vilinga vyavipi vize vyatwama mumichima yetu. Oloze muMbimbiliya mwatwama mujimbu uze wasolola nge Kalunga apwile nakushimutwila naSatana. Hakuwana nge Kalunga apwa wakukupuka, ngocho keshi kuhasa kupwa navishinganyeka vyavipi mumuchima wenyiko. (Lushimbi lyamuchivali 32:4; Yopa 2:1-6) Kaha nawa Satana esekele Yesu uze katwama nashiliko. (Mateu 4:8-10; Yowano 1, 3:5) Shikaho Mbimbiliya yasolola nge Liyavolo apwa mutu wakushipilitu, keshi nge vilinga vyavipi kahako.

 Katwatela kulikomokela hakuwana nge vatu vavavulu kavafwelela ngwavo Liyavolo katwamakoko. Mwomwo ika? Mwomwo Mbimbiliya yamba ngwayo Satana eji kuzachisanga jijila jakutangisa mangana ahungumwise vatu. (Wavaka-Tesolonyika 2, 2:9, 10) Kafuta kakanene eji kuzachisanga shina kuleleveka vatu vahone kutachikiza ngwavo kwatwama.—Wavaka-Kolinde 2, 4:4.

  Makuli: Lusifa lyapwa lijina likwavo lyaLiyavolo.

 Muchano: Lizu lyachiHepeleu lize valumuna mujiMbimbiliya jimwe ngwavo “Lusifa” lyalumbununa “ove litota.” (Isaya 14:12) Kweseka naupolofweto wahali Isaya 14, eli lizu “Lusifa” lyatalisa kuchisaka chavamyangana vaMbavilone vaze Kalunga azangamishile mwomwo yakulivwimba chavo. (Isaya 14:4, 13-20) Vulukiso yakwamba ngwavo “ove litota” vayizachishile hakuhenda vamyangana vaMbavilone omu vanongesele chisaka chavo.

  Makuli: Satana apwa “chambamilonga” waKalunga.

 Muchano: Liyavolo apwa muka-kole waKalunga, kapwa ngamba yaKalungako. Satana Liyavolo eji kwimanyinanga nakole vatu vaze veji kuzachilanga Kalunga, nakuvahana milonga.—WaPetulu 1, 5:8; Kusoloka 12:10.