Eyo, Mbimbiliya yahanjika hatoma ngwayo Kalunga kwatwama. Yatukolezeza tufwelele muli Kalunga, keshi mwomwo yakwitavila kaha vyuma yanangula liukako, oloze mwomwo ‘yauhashi wakushinganyeka’ ‘namangana’ vatuhana. (Wavaka-Loma 12:1; WaYowano 1, 5:20, kwinyikila chamwishi) Achishinganyekenu havishina vinakavangizaho vize vyazama haMbimbiliya:

•   Vyuma vyakuyoya vize vyatwama mwilu nahamavu vyasolola nge kwatwama Tengi. Mbimbiliya yamba ngwayo: “Mwomwo zuvo hizuvo vayitunga kuli mutu, oloze uze atengele vyuma vyosena ikiye Kalunga.” (WavaHepeleu 3:4) Numba tuhu mazu kana asoloka nge amashi, oloze navatu vakutanga chikuma kavevwishisa mazu kanako. *

•   Etu vatu twatwama nauhashi wakwivwishisa nakutachikiza ovyo tweji kuyoyelanga. Shimbu jimwe tunahase kupwa navyuma vyosena vyasakiwa mukuyoya chetu, oloze tweji kupwanga vakuwahilila kachi nge tunatachikiza ovyo tweji kuyoyelanga. Mbimbiliya yavuluka ngwayo, tunahase kulinga ngocho hakusaka “vyuma vyakushipilitu” kulumbununa muchima wakufwila kutachikiza Kalunga nakumulemesa. (Mateu 5:3; Kusoloka 4:11) Echi kufwila vyuma vyakushipilitu kachatulingisa kaha tutachikize ngwetu Kalunga kwatwamako, oloze cheji kutukafwanga tutachikize nawa ngwetu Tengi apwa wazangi, kaha asaka tufwile vyuma vyakushipilitu.—Mateu 4:4.

•   Numba tuhu upolofweto wamuMbimbiliya vausonekele kunyima, oloze wateselemo kweseka namuze vaupolofwetele. Kwoloka chaupolofweto kana chasolola hatoma nge wafumine kumutu uze atwama nangolo jakulipwila.—WaPetulu 2, 1:21.

•   Vaka-kusoneka Mbimbiliya vapwile nachinyingi chasayasi chize kavapwile nacho vatu vekako. Chakutalilaho, kushikulu vatu vavavulu vafwelelele ngwavo, mavu atwama hatunyama vakufwana nge njamba, nachombo, nangombe. Oloze Mbimbiliya yahanjika ngwayo Kalunga ahaka “mavu . . . halengelenge.” (Yopa 26:7) Chochimwe nawa Mbimbiliya yahanjika mwakwoloka ngwayo mavu apwa ‘litengulula.’ (Isaya 40:22) Vatu vavavulu vafwelela ngwavo awa mazu amuchano vasoneka muMbimbiliya afuma kuli Kalunga.

•   Mbimbiliya yakumbulula vihula vyavikalu , vize vinahase kulingisa mutu ahone kufwelela muli Kalunga kachi nge katachikijile muvakumbulwila vihula kanako. Chakutalilaho, kachi nge Kalunga apwa wazangi kaha nawa wangolo, mwomwo ika kuyanda navyuma vyavipi vinalisalila mukaye? Mwomwo ika kwitava chachivulu chili nakuhungumwisa vatu?—WaChituse 1:16.