Nduma, kwitava chosena kachapandamisa vatu kuli Kalungako. MuMbimbiliya vavulukamo kwitava chize kachevwishilenga Kalunga kuwahako. Kwitava kana chatwama muvihanda vivali.

Chihanda 1: Kulemesa tulunga vamakuli

 Mbimbiliya yahanjika ngwayo kwitava kana chapwa ‘chamokomoko’ kaha nawa ‘chaufwefwelekete.’ (Yelemiya 10:3-5; 16:19, 20) Yehova * Kalunga ahanyine lushimbi vaIsalele vakushikulu ngwenyi: “Kanda namukapwa natulunga vekako shina ami kaha.” (Kulovoka 20:3, 23; 23:24) “Yehova akwachilile vaIsalele matoto” omu valemeselenga tulunga veka.—Kulava 25:3; VyavaLevi 20:2; Vaka-kuyula 2:13, 14.

 Namakumbi ano, Kalunga eji kukwachilanga matoto “vaze vavuluka ngwavo tulunga.” (Wavaka-Kolinde 1, 8:5, 6; Wavaka-Ngalesha 4:8) Ahana lushimbi vosena vaze navasaka kumulemesa valitwamine kulikata navatu vaze vatwama mukwitava chamakuli ngwenyi: “Fumenu muli vakiko, lihandununenuko.” (Wavaka-Kolinde 2, 6:14-17) Kachi nge kwitava chosena cheji kupandamisanga vatu kuli Kalunga, kaha mwomwo ika Kalunga ahanyina lushimbi kana?

Chihanda 2: Kulemesa Kalunga wamuchano mujila yize ketavilako

 Lwola lumwe vaIsalele valemeselenga Kalunga hakuzachisa jijila jize vazachishilenga vatu hakulemesa tulunga vamakuli, oloze Yehova avakanyishile kufutulula kulemesa chamuchano nechi chamakuli. (Kulovoka 32:8; Lushimbi lwamuchivali 12:2-4) Kaha nawa Yesu ahungile vatwamina vamukwitava vaze vapwileko mumakumbi enyi mwomwo yajila valemeselelengamo Kalunga. Ava vatwamina kana valyongelenga nge vaka-kwitava vamuchano, oloze valeunwinenga “vyuma vyavilemu kuJishimbi, vikiko vene chiyulo chakwoloka nakutetela nakushishika.”—Mateu 23:23.

 Namakumbi ano nawa, kwitava chize cheji kunangula muchano chikiko kaha cheji kupandamisanga vatu kuli Kalunga. Ou muchano veji kunangulanga watwama muMbimbiliya. (Yowano 4:24; 17:17; WaChimoteu 2, 3:16, 17) Kwitava chize cheji kunangula vyuma vyalimbalaka naMbimbiliya cheji kusosololanga vatu kuli Kalunga. Kunangula chachivulu chafuma kuvatu vaze valemeselenga tulunga vamakuli, numba tuhu vatu vamwe vashinganyeka ngwavo chafuma muMbimbiliya. Kunangula kana shina chaTulunga Vatatu, nakunangula chakwamba ngwavo mwono kawafwako, nachakwamba ngwavo Kalunga eji kuyekelesanga vatu mukakahya. Kwitava chize cheji kukundwizanga kunangula kana chapwa ‘chamokomoko,’ mwomwo cheji kunangulanga vishinganyeka vyavatu keshi jishimbi jaKalungako.—Mako 7:7, 8.

 Kalunga ahunga kwitava chamakuli. (WaChituse 1:16) Kwitava chatela kulingisa vatu vapwenga navilinga vyamwaza numba jino vapandame kuli Kalunga, keshi kuyangako kahako. Chakutalilaho, Mbimbiliya yamba ngwayo: “Kachi nge mutu nalimono ngwenyi apwa muka-kulemesa Kalunga, oloze keshi kukasa lilimi lyenyiko, kaha ali nakutangisa muchima wenyi, kaha nawa kulemesa chenyi chinapu chaufwefwelekete. Kulemesa chitoma chakuhona kujiluluka kumeso aKalunga Setu shina echi: Kulamanga kanawa vanginga navatuliwe muluyando lwavo, nakulilama chakuzeneka lipenga lyakufuma kukaye.”—WaYakova 1:26, 27.