Uno Lumbapachiso Lwapwa Luka?
Vyuma Yakumbulula Mbimbiliya
Lumbapachiso lwapwa kujimika mutu mumeya nakumufumisamo. * Kaha echi chikiko chalingishile Yesu vamumbapachise mukalwiji mwomwo mwapwile meya akutamo. (Mateu 3:13, 16) Chochimwe nawa, lunga wakaEchopa naikiye alombele vamumbapachise omu ahetele “kuze kwapwile meya.”—Vilinga 8:36-40.
Uno lumbapachiso lwalumbununa ika?
MuMbimbiliya, lumbapachiso valufwanyisa kukufunda mufu. (Wavaka-Loma 6:4; Wavaka-Kolose 2:12) Kumbapachisa mutu mumeya chalumbununa nge mutu nafu kuchiyoyelo chenyi chamwaka nakupwa jino nachiyoyelo chachihya hakupwa muka-Kulishitu wakulihana kuli Kalunga. Lumbapachiso navyuma vyosena atela kulinga mutu mangana atengamo kumumbapachisa vavihakako kuli Kalunga, mangana vikafwe mutu apwenga nachivezu chitoma hakufwelela mundando yakusokola yaYesu Kulishitu. (WaPetulu 1, 3:21) Shikaho, Yesu anangwile tumbaji twenyi ngwenyi, vatela kuvambapachisa.—Mateu 28:19, 20.
Uno kumbapachisa mutu mumeya cheji kufumisanga shili yenyi tahi?
Nduma. Mwomwo Mbimbiliya yatunangula ngwayo, shili yetu yinahase kufuma kuhichila kaha mumanyinga aYesu. (Wavaka-Loma 5:8, 9; WaYowano 1, 1:7) Kachi nge mutu ali nakusaka kulivwisa kuwaha vyuma vyamwaza vize vyeji kwizanga mwomwo yandando yaYesu, kaha atela kufwelela muli Yesu, nakwalumunako vilinga vyenyi mangana akavangizenga vyuma vize anangwile Yesu, nakumumbapachisa.—Vilinga 2:38; 3:19.
Uno Mbimbiliya yetavisa kumbapachisa kemba tahi?
Nduma, kayetavisako. Nahamwe hauchi vasoneka muMbimbiliya ngwavo kemba vatela kumumbapachisa. Mujichachi jimwe veji kumbapachisanga kemba hakumusapwila meya mumutwe nakumuluka jino lijina. Lumbapachiso lwapwa lwavatu vanakolo lyehi vaze navahasa kwivwishisa nakwitavila “mujimbu wamwaza waWangana waKalunga.” (Vilinga 8:12) Shikaho mutu atela kwivwilila Mazu aKalunga, nakuwetavila, nakupihilila nakwalumuka. Kaha vyuma kanevi, kemba keshi kuhasa kuvilingako.—Vilinga 2:22, 38, 41.
Kaha nawa, Mbimbiliya yasolola nge Kalunga amona vana vavaka-Kulishitu kupwa vajila kaha nawa vatoma, mwomwo yakushishika chavisemi javo. (Wavaka-Kolinde 1, 7:14) Jino nge chapwa chakwoloka kumbapachisa vakemba, kaha mwomwo ika navapwila vajila kumeso aKalunga mwomwo yavisemi javo? *
Vishinganyeka vyakuhenga kutalisa kulumbapachiso lwaVaka-Kulishitu
Vishinganyeka vyakuhenga: Kusapwila mutu meya chipwe kumumwangilawo hijila yimwe yakumumbapachishilamo muchishishisa chakumujimika mumeya.
Muchano: Lumbapachiso lwosena luze vasoneka muMbimbiliya lwasolola hatoma nge vatu vavajimikilenga mumeya. Chakutalilaho omu Fwilipu ambapachishile lunga wakaEchopa, “vashikumukile mumeya” kaha amujimikile. Kufumaho “vafumine mumeya.”—Vilinga 8:36-39. *
Vishinganyeka vyakuhenga: Mbimbiliya yahanjika ngwayo navakemba vavambapachishile hakumbapachisa zuvo yosena. Chakutalilaho yahanjika kutalisa kuli muka-kulama kuzuvo yaufunge uze atwaminenga munganda yaFwilipi ngwayo: “Ikiye navaze vakuzuvo yenyi vosena vavambapachishile.”—Vilinga 16:31-34.
Muchano: Mujimbu wamuka-kulama kuzuvo yaufunge uze wahanjika halumbapachiso wasolola hatoma nge vatu vakuzuvo yenyi vaze vambapachishile vevwishishile kanawa, “mazu aYehova” ngocho vosena ‘vawahililile chikuma.’ (Vilinga 16:32, 34) Echi chikiko chatulingisa tukukulule ngwetu, kachi nge muze muzuvo yauze muka-kulama kuzuvo yaufunge mwapwile kemba kaha kavamumbapachishileko mwomwo kemba keshi kuhasa kwivwishisa mazu aYehovako.
Vishinganyeka vyakuhenga: Yesu anangwile ngwenyi vakemba vatela kuvambapachisa hakwamba ngwenyi Wangana waKalunga wapwa wavana vavandende.—Mateu 19:13-15; Mako 10:13-16.
Muchano: Yesu hakuhanjika mazu kana kapwile nakuhanjika halumbapachisoko. Oloze apwile nakulumbununa ngwenyi, vatu vaze navakatamo kwingila muWangana waKalunga vatela kupwa navilinga vyamwaza vize vatwama navyo vanyike. Vilinga kana shina kuvova, namuchima wakusaka kulinangula.—Mateu 18:4; Luka 18:16, 17.
^ Lizu lyachiHelase lize valumuna ngwavo lumbapachiso lyafuma kulizu lize lyalumbununa ngwavo “kujimika.” Talenu mukanda waTheological Dictionary of the New Testament, Volume I, lifwo 529..
^ Mukanda waThe International Standard Bible Encyclopedia wamba ngwawo, “nahamwe hauchi vasoneka muTesetamende Yayihya ngwavo vakemba vatela kuvambapachisa.” Wamba nawa ngwawo, kunangula kanechi chakumbapachisa vakemba chafuma kuvishinganyeka vyakuhenga vyakwamba ngwavo lumbapachiso lweji kufumisanga shili.—Volume 1, mafwo 416-417.
^ Mumukanda waNew Catholic Encyclopedia hamutwe wakwamba ngwavo “Lumbapachiso (muMbimbiliya)” vasonekaho ngwavo: “Chamuchano vene vaka-Kulishitu vakulivanga vambapachishilenga vatu hakuvajimika mumeya.”—Volume 2, lifwo 59.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Kwitava Chosena Cheji Kupandamisanga Vatu Kuli Kalunga Tahi?
Vishina vivali vize vavuluka muMbimbiliya vyakumbulula chihula kana.
ESSENTIAL BIBLE TEACHINGS
Uno Kalunga Etavila Kwitava Chosena Tahi?
Vatu vavavulu vafwelela ngwavo unahase kuya kukala liuka lyakwitava lize muzanga ove yivene.