Kena uze apwile mwanaAlama naEve watwatwa ambachile songo yenyi wapwevo chipwe kausoko kenyi wapwevo kupwa pwevo lyenyi. Tunahase kukukulula ngocho, hakukekesa vyuma yahanjika Mbimbiliya kutalisa kuli Kena natanga yenyi.

Vyuma vyamuchano kutalisa kuli Kena natanga yenyi

•   Vatu vosena vafuma kuli Alama naEve. Mbimbiliya yamba ngwayo, “kumutu umwe [Kalunga] aloweleko miyachi yavatu yosena mangana ngwenyi vatwamenga hamavu hosena.” (Vilinga 17:26) Eve uze apwile pwevo lyaAlama, apwile “naye yavosena vaze navayoyanga.” (Kuputuka 3:20) Shikaho, Kena pamo ambachile songo yenyi wakusemuka nenyi kuli Alama naEve.

•   Kena nandumbwenyi Avele, vakiko vapwile vakulivanga kusemuka havana vaEve vosena. (Kuputuka 4:1, 2) Omu Kena vamuhangile mwomwo yakujiha songo yenyi, ambile ngwenyi: “Weshowo mwanguwana mwangujiha.” (Kuputuka 4:14) Uno Kena evwile woma iya? Mbimbiliya yahanjika ngwayo, Alama “asemene vana vamalunga navava vamapwevo.” (Kuputuka 5:4) Shikaho chasoloka hatoma nge ava vana vakwavo vaAlama naEve vakiko apwile nakwiva woma Kena ngwenyi navamujiha.

•   Kunyima, vatu vavavulu vambachilenga vausoko wavo. Chakutalilaho, Apalahama uze apwile mutu wakushishika, ambachile ndumbwenyi wapwevo kupwa pwevo lyenyi. (Kuputuka 20:12) Lushimbi lwatete lwakukanyisa vatu kulimbata muusoko, lwatwama muJishimbi vahanyine Mose, luze vahakileko omu mwahichile myaka yayivulu kufuma halwola ayoyelele Kena. (VyavaLevi 18:9, 12, 13) Echi chasolola nge vana vasemenenga kuvatu vaze valimbachile muusoko halwola kana, kavasemukilenga namisongo ngana muze chili makumbi anoko.

•   Mbimbiliya yahanjika mwakwolola kutalisa kumijimbu yakushikulu yize yahanjika hali Alama, naEve natanga yavo. Mijimbu yize yahanjika hakulava visaka vyaAlama, tunahase kuyiwana mumukanda waKuputuka uze vasonekele kuli Mose, namumukanda waEzela naLuka. (Kuputuka 5:3-5; Mijimbu 1, 1:1-4; Luka 3:38) Vaka-kusoneka Mbimbiliya, vasonekele mujimbu waKena mangana vasolole vyuma vyapwile nakusoloka kushikulu.—WavaHepeleu 11:4; WaYowano 1, 3:12; WaYuta 11.