Mbimbiliya yanangula ngwayo, mwilu namukaya kaha vatu vavandende vaze vatongola, keshi kala chuma chakutenga chatwama hano hamavuko. (Kusoloka 14:1, 3) Navakaya nakuyula mwavamyangana nakupwa tupilishitu hamwe naYesu. (Luka 22:28-30; Kusoloka 5:9, 10) Vatu vavavulu navakasangula nakukayoyela mupalachise hano hamavu.—Samu 37:11, 29.

 Nahamwe hauchi vasoneka muMbimbiliya ngwavo tuwa chipwe tunyama veka veji kuyanga mwiluko. Tunyama kaveshi kuhasa kulinga vyuma vize navivalingisa vatengamo “kukusanyika chamwilu[ko].” (WavaHepeleu 3:1) Havyuma kana haliweza kupwa nachinyingi, nalufwelelo, nakwononoka jishimbi jaKalunga. (Mateu 19:17; Yowano 3:16; 17:3) Vatu kaha vakiko vatengele nalutalililo lwakukayoya haya myaka yosena.—Kuputuka 2:16, 17; 3:22, 23.

 Vosena vaze veji kuyanga mwilu veji kuvangilanga kuvasangula nge vanafu. (Wavaka-Kolinde 1, 15:42) Mbimbiliya yavuluka vatu vamwe vaze vasangwile. (Vamyangana 1, 17:17-24; Vamyangana 2, 4:32-37; 13:20, 21; Luka 7:11-15; 8:41, 42, 49-56; Yowano 11:38-44; Vilinga 9:36-42; 20:7-12) Visoneka kanevi vyasolola nge vatu kaha vakiko vasangwile keshi tunyamako.

•  Uno tunyama vatwama namwono tahi?

•  Uno myono yinahase kufwa tahi?

•  Uno tunyama veji kulinganga shili tahi?

•  Uno chapwa chakutamo kuyanjisa tunyama tahi?

 Nduma. Mbimbiliya yamba ngwayo tunyama navatu vosena vapwa myono. (Kulava 31:28) Omu vatengele mutu watete Alama, kavamuhanyine mwonoko, oloze “apwile jino mwono.” (Kuputuka 2:7, kwinyikila chamwishi) Mwono wapwa ‘lukungu lwahamavu, nakuhwima chakuyoya.’

 Eyo, Mbimbiliya yeji kutunangulanga ngwayo mwono unahase kufwa. (VyavaLevi 21:11, kwinyikila chamwishi; Ezekele 18:20) Nge tunyama navatu vanafu veji kukindulukanga cheka kulukungu. (Muka-kwambulula 3:19, 20) Kulumbununa nge kavatwalaho lika kuyoyako. *

 Nduma. Kulinga shili chalumbununa kushinganyeka, nakwivwa, nakulinga vyuma vize vyalimbalaka najishimbi jaKalunga. Mutu hakulinga shili eji kusakulanga vyakulinga, oloze tunyama kavatwama nauhashi kanako. Kakavulu tunyama veji kulinganga vyuma chakuzeneka kushinganyeka mukuyoya chavo chosena. (WaPetulu 2, 2:12) Kaha kutwala muze veji kufwanga numba tuhu kavalinga shiliko.

 Nduma. Kalunga ahanyine vatu wata wakulama tunyama keshi wakuvayanjisako. (Kuputuka 1:28; Samu 8:6-8) Kalunga eji kuzakamanga tunyama vosena kuhakilako vene natujila vavapululu. (Yona 4:11; Mateu 10:29) Alweza vaka-kumulemesa vosena vazakamenga tunyama.—Kulovoka 23:12; Lushimbi lwamuchivali 25:4; Vishimo 12:10.