Eyo. Vandemone vapwa “vangelo vaze valingile shili,” chipwe vatu vakushipilitu vaze valikangile kuli Kalunga. (WaPetulu 2, 2:4) Kangelo watete uze ejile nakupwa ndemone shina Satana Liyavolo uze vavuluka muMbimbiliya ngwavo “muka-kuyula vandemone.”—Mateu 12:24, 26.

Kulikanga chapwile mumakumbi aNowa

 Mbimbiliya yahanjika hali vangelo vaze valikangile shimbu kanda Livaji lyamumakumbi aNowa ngwayo: “Vana vaKalunga wamuchano vamwene jino vana vavatu vamapwevo ngwavo, vanawahe. Shikaho vaputukile kumbata mapwevo vosena vaze vasakwile vavene.” (Kuputuka 6:2) Vaze vangelo vakuhuka, “vasezele kuze vatwaminenga,” mwilu nakuvwala mijimba yavatu mangana valisavale namapwevo.—WaYuta 6.

 Omu lyejile Livaji, vaze vangelo vakulikanga vasezele mijimba yavo yautu nakukinduluka mwilu. Chipwe ngocho, Kalunga avahangile mutanga yenyi. Avatambwile nawa ngolo vapwile najo jakulyalumuna cheka kupwa vatu.—Wavaka-Efwesu 6:11, 12.