Uno Vangelo Vapwa Veya?
Vyuma yakumbulula Mbimbiliya
Vangelo vapwa vatu vaze vatwama nangolo chikuma kuhambakana vatu vahano hamavu. (WaPetulu 2, 2:11) Vangelo vatwama mwilu muze katweshi kuhasa kumonako. (Vamyangana 1, 8:27; Yowano 6:38) Vavavuluka nawa ngwavo vashipilitu.—Vamyangana 1, 22:21; Samu 18:10.
Uno vangelo vafuma kulihi?
Kalunga atengele vangelo kuhichila muli Yesu uze vavuluka muMbimbiliya ngwavo, “twatwa kuvyuma vyakutenga vyosena.” Hakulumbununa omu Kalunga azachishile Yesu hakutenga vyuma, Mbimbiliya yamba ngwayo: “Muli [Yesu] mukiko vatengelele vyuma vyeka vyosena vyamwilu navyahamavu, vyuma vamona navize vahona kumona,” kuhakilako vene navangelo. (Wavaka-Kolose 1:13-17) Vangelo kavambata mapwevo chipwe kusemako. (Mako 12:25) Oloze ava “vana vaKalunga wamuchano” valingile vakutenga umwe umwe.—Yopa 1:6.
Vangelo vavatengele lyehi shimbu kanda vatenge mavu. Omu Kalunga atengele mavu, vangelo “vaputukile kulikuwa nakusakwilila jikushi.”—Yopa 38:4-7.
Uno kwatwama vangelo vangahi?
Mbimbiliya kayatulweza kuvula chavangeloko, oloze yasolola nge vapwa vavavulu chikuma. Chakutalilaho, muchakumwenesa vamwenesele Yowano amwene mayongomena namayongomena avangelo.—Kusoloka 5:11, kwinyikila chamwishi.
Uno kangelo hikangelo atwama nalijina navilinga vyakulihandununa tahi?
Eyo. Mbimbiliya yavuluka majina avangelo vavali, Mikayele naNgavalyele. (Ndanyele 12:1; Luka 1:26) * Vangelo vamwe vetavilile ngwavo vatwama namajina, oloze kavawajimbwileko.—Kuputuka 32:29; Vaka-kuyula 13:17, 18.
Vangelo vatwama navilinga vyakulihandununa. Kaha vanahase kushimutwila umwe namukwavo. (Wavaka-Kolinde 1, 13:1) Vatwama nauhashi wakushinganyeka, kaha nawa veji kutunganga myaso yakwalisa Kalunga. (Luka 2:13, 14) Vatwama nawa nauhashi wakusakula vyuma vyakwoloka nevi vyakuhenga, ngana muze chapwile kuli vangelo vamwe vaze vakundwijile Satana Liyavolo hakulikanga kuli Kalunga.—Mateu 25:41; WaPetulu 2, 2:4.
Uno vangelo vatwama navihela vyakulisezaseza tahi?
Eyo. Mikayele kangelo wakulitulaho ikiye kangelo atwama nangolo chikuma nawata havangelo vosena. (WaYuta 9; Kusoloka 12:7) Vaselafwe vatwama nachihela chachinene chikuma, kaha veji kuzachilanga kulitanda lyaYehova. (Isaya 6:2, 6) Vakeluve vakiko vakava hali Vaselafwe kupwa nachihela chachinene, kaha veji kuzatanga milimo yakulipwila. Chakutalilaho, vakeluve vakiko valamine kuchikolo chakulitepa lyaEtene omu Yehova ahangilemo Alama naEve.—Kuputuka 3:23, 24.
Kutala vangelo veji kukafwanga vatu tahi?
Eyo, Kalunga eji kuzachisanga vangelo jenyi vakushishika hakukafwa vatu makumbi ano.
Kalunga eji kuzachisanga Vangelo hakutwaminyina vatu jenyi vambulule mujimbu wamwaza waWangana. (Kusoloka 14:6, 7) Kulinga ngocho cheji kunganyalisanga vatu vaze vanakwambulula navaze navevwilila kumujimbu wamwaza.—Vilinga 8:26, 27.
Vangelo veji kukinganga chikungulwilo chavaka-Kulishitu mangana vahone kuchipihisa kuli vaka-kuhuka.—Mateu 13:49.
Vangelo veji kulamanga nakukinga vatu vaze vashishika kuli Kalunga.—Samu 34:7; 91:10, 11; WavaHepeleu 1:7, 14.
Kalinwomu vangelo vayovole vatu hakuzungila hamwe naYesu Kulishitu hakufumisako kuhuka chosena.—Wavaka-Tesolonyika 2, 1:6-8.
Uno mutu himutu atwama nakangelo eji kumukinganga tahi?
Numba tuhu vangelo veji kukafwanga vangamba jaKalunga kushipilitu, oloze echi kachalumbununa nge Kalunga eji kutumanga kangelo akinge muka-Kulishitu himuka-Kulishituko. * (Mateu 18:10) Vangelo kavakinga vangamba jaKalunga kuvyeseko chipwe kuukalu wosenako. Mbimbiliya yasolola hatoma ngwayo Kalunga eji ‘kuselanga ulovokelo’ mutu hakumuhana mangana nangolo jakumika muukalu.—Wavaka-Kolinde 1, 10:12, 13; WaYakova 1:2-5.
Vishinganyeka vyakuhenga hali vangelo
Vishinganyeka vyakuhenga: Vangelo vosena vapwa vamwaza.
Muchano: Mbimbiliya yahanjika hamazavu “avashipilitu vakuhuka” navangelo “vaze valingile shili.” (Wavaka-Efwesu 6:12; WaPetulu 2, 2:4) Ava vangelo vakuhuka vapwa vandemone vaze vakundwijile Satana hakulikanga kuli Kalunga.
Vishinganyeka vyakuhenga: Vangelo kavafwako.
Muchano: Vangelo vakuhuka kuhakilako vene naSatana Liyavolo navakavanongesa.—WaYuta 6.
Vishinganyeka vyakuhenga: Vatu veji kupwanga vangelo nge vanafu.
Muchano: Vangelo vavatenga kuli Kalunga mujila yakulipwila, shikaho kavapwa vatu vaze veji kusangulangako. (Wavaka-Kolose 1:16) Kalunga eji kuhananga mijimba yakuzeneka kufwa kupwa wana kuli vatu vaze veji kusangulanga nakuya nakuyoyela mwilu. (Wavaka-Kolinde 1, 15:53, 54) Vatu kana navakapwa nachihela chachinene chikuma kuhambakana vangelo.—Wavaka-Kolinde 1, 6:3.
Vishinganyeka vyakuhenga: Vangelo vavatengele mangana vazachilenga vatu.
Muchano: Vangelo veji kwononokanga jishimbi jaKalunga keshi jayetu vatuko. (Samu 103:20, 21) Yesu atachikijile ngwenyi atelelele kulomba Kalunga amukafwe keshi kulomba kuli vangeloko.—Mateu 26:53.
Vishinganyeka vyakuhenga: Tunahase kulomba kuli vangelo vatukafwe.
Muchano: Kulomba kuli Kalunga chapwa hijila yimwe yakumulemeselamo, ngocho Yehova Kalunga kaha ikiye atamo kuchitambula. (Kusoloka 19:10) Shikaho twatela kulomba kaha kuli Kalunga kuhichila muli Yesu.—Yowano 14:6.
^ Lizu lyachiHepeleu lize valumuna mujiMbimbiliya jimwe ngwavo “Lusifa” lyalumbununa “ove litota.” Kweseka naupolofweto wahali Isaya 14, eli lizu “Lusifa” lyatalisa kuchisaka chavamyangana vaMbavilone vaze Kalunga azangamishile mwomwo yakulivwimba chavo. (Isaya 14:4, 13-20) Vulukiso yakwamba ngwavo “ove litota” vayizachishile hakuhenda vamyangana vaMbavilone omu vanongesele chisaka chavo.
^ Vatu vamwe vashinganyeka ngwavo mujimbu waPetulu wakumulovola mukamenga wasolola nge apwile nakangelo wakumukinga. (Vilinga 12:6-16) Oloze tumbaji hakuhanjika ngwavo “kangelo [kaPetulu],” chasoloka nge vashinganyekele ngwavo kangelo uze emanyinyineko Petulu ikiye ejile kuli vakiko, keshi Petulu iveneko.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Iya Apwa Mikayele Uze Kangelo Wakulitulaho?
Atwama nalijina likwavo, pamo likiko mwatachikiza chikuma.
KAPOSHI KAKUTALILA
Uno Mwatwama naKangelo Uze Eji Kumikinganga Tahi?
Kutala mwatela kukukulula ngwenu kangelo chipwe vangelo vanahase kumikafwa tahi?
KUKUMBULULA VIHULA VYAKUPANDAMA KUMBIMBILIYA
Uno Vandemone Kuvatwama Tahi?
Uno vandemone vapwa veya? Uno vafuma kulihi?