Uno Upolofweto Wahanjika Hali Meshiya Wasolola Nge Yesu Apwile Meshiya Tahi?

PUTUKA KWIMBISA

Vyuma yakumbulula Mbimbiliya

Eyo. Omu apwile hano hamavu, Yesu ateselemo upolofweto wauvulu wavuluka “Twamina Meshiya,” uze apwa “Mulwilo wakaye.” (Ndanyele 9:25; WaYowano 1, 4:14) Kaha nawa hanyima yakufwa chenyi, Yesu atwalileho lika kutesamo upolofweto wahanjika hali Meshiya.—Samu 110:1; Vilinga 2:34-36.

Uno lizu “Meshiya” lyalumbununa ika?

Lizu lyachiHepeleu vavuluka ngwavo Ma·shiʹach (Meshiya) nalizu lyakulifwanako lyachiHelase vavuluka ngwavo Khri·stos (Kulishitu) alumbununa ngwavo “Ou Vawavisa.” Shikaho mazu “Yesu Kulishitu” alumbununa ngwavo “Yesu Ou Vawavisa,” chipwe ngwavo “Yesu uze apwa Meshiya.”

Kushikulu, kachi nge vanasakula mutu mangana azate milimo yimwe yakulipwila, kaha vamuwavishilenga hakumuhingunwina maji hamutwe wenyi. (VyavaLevi 8:12; Samwele 1, 16:13) Kalunga atongwele Yesu kupwa Meshiya, chihela chize chatwama nawata. (Vilinga 2:36) Kalunga kawavishile Yesu namajiko, oloze amuwavishile nashipilitu yajila.—Mateu 3:16.

Uno vatu vavavulu vanahase kutesamo upolofweto wahanjika hali Meshiya tahi?

Nduma. Omu tweji kukekesanga upolofweto wamuMbimbiliya uze watesamo lyehi, tweji kuwananga nge upolofweto kana wahanjika hali Meshiya chipwe Kulishitu umwe kaha. Mbimbiliya yahanjika ngwayo, “vaKulishitu vamakuli navapolofweto vamakuli navakeza, kaha navakalinga vinjikizo vyavinene navyuma vyakukomwesa mangana nge chinahase, vakahungumwise navaze vene vasakula.”—Mateu 24:24.

Kutala Meshiya mwakasoloka kulutwe tahi?

Nduma. Mbimbiliya yahanjikilile chimweza ngwayo Meshiya mwakafuma kutanga yaMwangana Ndavichi uze apwile Mwangana wavaIsalele. (Samu 89:3, 4) Mikanda yize vasonekele jitanga javaYuleya kuheta nakuli Ndavichi yajimbala, kaha pamo yajimbalile omu vaLoma vafungulwile Yelusalema mu 70 C.E. * Kufuma vene halwola kana, chapwa chachikalu vatu kutachikiza numba nge vafuma kutanga yamwangana Ndavichi. Chipwe ngocho, mikanda kana kuyapwile halwola luze Yesu apwile hano hamavu, ngocho navaka-kole jenyi vatachikijile ngwavo afumine kutanga yaNdavichi.—Mateu 22:41-46.

Upolofweto wahanjika hali Meshiya ungahi watwama muMbimbiliya?

Katweshi kuhasa kulava upolofweto wahanjika hali Meshiya wosenako. Chakutalilaho, jila yakulavilamo upolofweto kana yinahase kupwa yakulihandununa, numba tuhu upolofweto umwe unahanjika hatoma. Mazu atwama hali Isaya 53:2-7 avuluka vishina vimwe vyaupolofweto wahanjika hali Meshiya. Vatu vamwe vanahase kuhanjika ngwavo hajivesi kana hatwama upolofweto umwe kaha, oloze veka vanahase kwamba ngwavo hatwama upolofweto wauvulu.

Upolofweto wahanjika hali Meshiya uze ateselemo Yesu

Upolofweto	Watwama hali	Omwo Wateselemo
Muka-tanga yaApalahama	Kuputuka 22:17, 18	Mateu 1:1
Wamuchisaka chaIsaka mwanaApalahama	Kuputuka 17:19	Mateu 1:2
Asemukilile kumuyachi waYuta	Kuputuka 49:10	Mateu 1:1, 3
Afumine kuchisaka chaMwangana Ndavichi	Isaya 9:7	Mateu 1:1
Asemukile kuli pwevo uze kanda achilisavaleho nalunga	Isaya 7:14	Mateu 1:18, 22, 23
Asemukilile muMbetelema	Mika 5:2	Mateu 2:1, 5, 6
Vamuvulukilenga ngwavo Emanwele *	Isaya 7:14	Mateu 1:21-23
Asemukilile kutanga yakuhutwa	Isaya 53:2	Luka 2:7
Vana vavandende vavajihile omu alingile hanasemuka lyehi	Yelemiya 31:15	Mateu 2:16-18
Vamusanyikile afume muEjipitu	Hozeya 11:1	Mateu 2:13-15
Vamuvulukilenga ngwavo muka-Nazaleta *	Isaya 11:1	Mateu 2:23
Kalunga atumine muluwa shimbu kanda ikiye	Malaki 3:1	Mateu 11:7-10
Vamuwavishile kupwa Meshiya mu 29 C.E. *	Ndanyele 9:25	Mateu 3:13-17
Kalunga amuvulukile ngwenyi Mwanenyi	Samu 2:7	Vilinga 13:33, 34
Apwile natwima hazuvo yaKalunga	Samu 69:9	Yowano 2:13-17
Avilikilenga mujimbu wamwaza	Isaya 61:1	Luka 4:16-21
Kwambulwila muNgalileya chalingishile vatu vatachikize muchano	Isaya 9:1, 2	Mateu 4:13-16
Alingilenga vyuma vyakukomwesa ngana mwaMose	Lushimbi lwamuchivali 18:15	Vilinga 2:22
Ahanjikile mazu aKalunga ngana muze alingilenga Mose	Lushimbi lwamuchivali 18:18, 19	Yowano 12:49
Okile vatu vavavulu	Isaya 53:4	Mateu 8:16, 17
Kasakile vatu vatachikize vyuma alingilengako	Isaya 42:2	Mateu 12:17, 19
Atetelele vatu vaze vapwile muukalu	Isaya 42:3	Mateu 12:9-20; Mako 6:34
Alingilenga vyuma kweseka nachiyulo chaKalunga	Isaya 42:1, 4	Mateu 12:17-20
Muka-kulweza Mangana Wakukomwesa	Isaya 9:6, 7	Yowano 6:68
Avilikilenga lijina lyaYehova	Samu 22:22	Yowano 17:6
Ahanjikilenga kuzachisa vifwanyisa	Samu 78:2	Mateu 13:34, 35
Apwile Twamina	Ndanyele 9:25	Mateu 23:10
Vatu vavavulu kavamufweleleleko	Isaya 53:1	Yowano 12:37, 38
Lilolwa lyakuhukanyisa	Isaya 8:14, 15	Mateu 21:42-44
Vamukanyine kuvatu	Samu 118:22, 23	Vilinga 4:10, 11
Vamuhungile chakuzeneka mulonga	Samu 69:4	Yowano 15:24, 25
Mwengila muYelusalema nachendo chavaka-kulisamba	Zekaliya 9:9	Mateu 21:4-9
Vamwalishile kuli vanyike	Samu 8:2	Mateu 21:15, 16
Ejile mulijina lyaYehova	Samu 118:26	Yowano 12:12, 13
Vamusolwele kumutu uze afwelelele chikuma	Samu 41:9	Yowano 13:18
Vamusolwele najimbongo japalata 30 *	Zekaliya 11:12, 13	Mateu 26:14-16; 27:3-10
Masepa jenyi vamusezele	Zekaliya 13:7	Mateu 26:31, 56
Vatu vahanyine unjiho wamakuli hali ikiye	Samu 35:11	Mateu 26:59-61
Kakumbulwile vatu vamuvangijikilileko	Isaya 53:7	Mateu 27:12-14
Vamufwijilile maleji	Isaya 50:6	Mateu 26:67; 27:27, 30
Vamuvetele mumutwe	Mika 5:1	Mako 15:19
Vamuvetele vikote	Isaya 50:6	Yowano 19:1
Kakanyishile vaze vamuveteleko	Isaya 50:6	Yowano 18:22, 23
Vatwamina vafulumende vamutwamine punga vamujihe	Samu 2:2	Luka 23:10-12
Vamupapalilile hachitondo kumavoko nakumahinji	Samu 22:16	Mateu 27:35; John 20:25
Vatu vazachishile tutachikijilo hakulipangila uvwalo wenyi	Samu 22:18	Yowano 19:23, 24
Vamulavilile kumwe navaka-shili	Isaya 53:12	Mateu 27:38
Vamuhungile nakumutukana	Samu 22:7, 8	Mateu 27:39-43
Ayanjililile vaka-shili	Isaya 53:5, 6	WaPetulu 1, 2:23-25
Chapwile nge Kalunga namuseze	Samu 22:1	Mako 15:34
Vamuhanyine vinangele vyakufutula nanyangwa anwenga	Samu 69:21	Mateu 27:34
Evwile lipwila omu apwile kwakamwihi nakufwa	Samu 22:15	Yowano 19:28, 29
Asezele shipilitu yenyi mumavoko aKalunga	Samu 31:5	Luka 23:46
Ahanyine kuyoya chenyi	Isaya 53:12	Mako 15:37
Ahanyine ndando yakusokola mangana afumiseko shili	Isaya 53:12	Mateu 20:28
Vifuwa vyenyi kavavihokweleko	Samu 34:20	Yowano 19:31-33, 36
Vamutuvile	Zekaliya 12:10	Yowano 19:33-35, 37
Vamufunjile navaka-luheto	Isaya 53:9	Mateu 27:57-60
Vamusangwile kuvafu	Samu 16:10	Vilinga 2:29-31
Kushishisa muka-kumusolola	Samu 109:8	Vilinga 1:15-20
Atwama kulivoko lyaKalunga lyachilyo	Samu 110:1	Vilinga 2:34-36

^ Mukanda waMcClintock and Strong’s Cyclopedia wahanjika ngwavo: “Mikanda yize vasonekelemo miyachi yavaYuleya najitanga javo vayenyekele omu vanongesele Yelusalema, keshi shimbu kanda Yelusalema vayinongeseko.”

^ Lijina lyachiHepeleu lyakwamba ngwavo Emanwele lyalumbununa ngwavo “Kalunga Ali Nayetu,” kaha lyasolola mulimo atwama nawo Yesu uze apwa Meshiya. Kwiza chenyi hano hamavu namilimo azachile yasolwele nge Kalunga apwile navaka-kumulemesa.—Luka 2:27-32; 7:12-16.

^ Vulukiso yakwamba ngwavo “muka-Nazaleta” yafuma kulizu lyachiHepeleu neʹtser, lize lyalumbununa “muketengo.”

^ Kachi nge munakusaka kutachikiza vyavivulu kutalisa kumijimbu yamuMbimbiliya yakusolola nge Meshiya asolokele mu 29 C.E., kaha talenu chihande chakwamba ngwavo “Omu Upolofweto waNdanyele Wahanjikile Vyakwiza chaMeshiya.”

^ Upolofweto kana watwama mumukanda waZekaliya, oloze Mateu ambile ngwenyi mazu kana vawahanjikile “kuhichila muli kapolofweto Yelemiya.” (Mateu 27:9) Chasoloka nge mukanda waYelemiya ukiko wapwile wakulivanga hamukana waVisoneka vize vavuluka ngwavo “Mazu aVapolofweto.” (Luka 24:44) Shikaho, pamo Mateu avulukile “Yelemiya” hakuvuluka mikanda yosena yatwama hamukana kana haze hatwama namukanda waZekaliya.

Pamo Nauzanga Nawa

TONENU

Vyuma Yahanjika Mbimbiliya Hali Meshiya

Kutala mwatachikiza ngwenu Mbimbiliya yapolofwetele ngwayo Meshiya mwakafwa shimbu kanda akumise mulimo wenyi tahi?

KUKUMBULULA VIHULA VYAKUPANDAMA KUMBIMBILIYA