Veya Veji Kuyanga Mwilu?
Vyuma Yakumbulula Mbimbiliya
Kalunga asakula nambala yavaka-Kulishitu vakushishika vaze veji kusangukanga nakuya nakuyoyela mwilu. (WaPetulu 1, 1:3, 4) Kaha nge vanavasakula lyehi, veji kutwalangaho lika kupwa vakushishika nakupwa nawa navilinga vyamwaza mangana vatenga kutambula uswana wamwilu.—Wavaka-Efwesu 5:5; Wavaka-Fwilipi 3:12-14.
Vyuma muka navakalinga vaze veji kuyanga mwilu?
Vatu kana navakayula hamwe naYesu mwavamyangana navapilishitu hamyaka 1000. (Kusoloka 5:9, 10; 20:6) Navakapwa “melu amahya” chipwe fulumende yamwilu yize nayikayula “mavu amahya” chipwe chitungilo chavatu chachihya. Ava vaka-kuyula navakazachila hamwe naYesu hakukalingisa vatu vakapwe cheka vakukupuka ngana muze Kalunga ajinyine hakavanga.—Isaya 65:17; WaPetulu 2, 3:13.
Vatu vangahi navakasanguka nakuya mwilu?
Mbimbiliya yasolola ngwayo, vatu 144,000 vakiko navakasanguka nakuya mwilu. (Kusoloka 7:4) Chakumwenesa chize chatwama hali Kusoloka 14:1-3, chasolola nge kaposetolo Yowano amwene “Mwanamukoko nemana haPili yaZeyone, apwile navatu 144,000.” Ou “Mwanamukoko” vavuluka muchakumwenesa kana, emanyinako Yesu uze asangukile. (Yowano 1:29; WaPetulu 1, 1:19) Kaha “Pili yaZeyone” yemanyinako chihela chachinene chize atwama nacho Yesu navaze 144,000 vaze navakayula hamwe naikiye mwilu.—Samu 2:6; WavaHepeleu 12:22.
Vatu “vaze vasanyika, vaze vasakula” kukayula hamwe naKulishitu muWangana, vavavuluka ngwavo vapwa “utanga wamikoko waundende.” (Kusoloka 17:14; Luka 12:32) Echi chasolola nge vapwa vavandende chikuma hakuvesekesa kukuvula chamikoko veka.—Yowano 10:16.
Vishinganyeka vyakuhenga kutalisa kuchihande chavatu vaze veji kuyanga mwilu
Vishinganyeka vyakuhenga: Vatu vosena vavilinga vyamwaza navakaya mwilu.
Muchano: Kalunga afwelelesa vatu vavilinga vyamwaza kuyoya chahaya myaka yosena hano hamavu.—Samu 37:11, 29, 34.
Yesu ambile ngwenyi: “Kakweshi mutu umwe aya lyehi mwiluko.” (Yowano 3:13) Mazu kana asolola nge vatu vaze vafwile shimbu kanda ikiye afwenga vakufwana nge Apalahama, naMose, naYopa, naNdavichi kavayile mwiluko. (Vilinga 2:29, 34) Oloze vatwama nalutalililo lwakukasanguka nakuyoyela hano hamavu.—Yopa 14:13-15.
Kusanguka nakuya nakuyoyela mwilu vachivuluka ngwavo “kusanguka chatete.” (Kusoloka 20:6) Echi chasolola nge nakukapwa kusanguka chikwavo. Kusanguka kana nachikapwila hano hamavu.
Mbimbiliya yanangula ngwayo, omu Wangana waKalunga naukaputuka kuyula, “kufwa kacheshi kukapwako chekako.” (Kusoloka 21:3, 4) Elu lushiko kana lwapwa lwahano hamavu mwomwo mwilu kamwatwama kufwako.
Vishinganyeka vyakuhenga: Mutu himutu eji kulisakwilanga ivene kuyoyela mwilu chipwe hano hamavu.
Muchano: Kalunga ikiye eji kusakulanga vaka-Kulishitu vakushishika vaze navakatambula “fweto yakusanyika chaKalunga chamwilu,” kulumbununa lutalililo lwakuyoyela mwilu. (Wavaka-Fwilipi 3:14) Vyuma asaka mutu ivene kavyeshi kuhasa kumulingisa vamusakule kuya nakuyoyela mwiluko.—Mateu 20:20-23.
Vishinganyeka vyakuhenga: Lutalililo lwakuyoyela hano hamavu lwapwa lwamokomoko, kaha veji kuluhananga kuvatu vaze kavatamo kuya mwiluko.
Muchano: Kalunga avuluka vaze navakayoyela hano hamavu haya myaka yosena ngwenyi “vatu jami,” “vaze ngwasakula,” kaha nawa “vaze vakisula kuli Yehova.” (Isaya 65:21-23) Navakapwa nakutokwa chakutesamo vyuma ajinyine Kalunga kulingila vatu, chakupwa nakuyoya chahaya myaka yosena mupalachise hano hamavu.—Kuputuka 1:28; Samu 115:16; Isaya 45:18.
Vishinganyeka vyakuhenga: Nambala 144,000 vavuluka mumukanda waKusoloka yapwa yachifwanyisa kaha.
Muchano: Numba tuhu mumukanda waKusoloka mwatwama jinambala jajivulu vazachisa mujila yachifwanyisa, oloze mwatwama nawa jinambala jivene. Chakutalilaho, mukanda kana wahanjika “majina 12 avaposetolo jaMwanamukoko 12.” (Kusoloka 21:14) Talenu unjiho watulingisa tukukulule ngwetu twatela kumona nambala 144,000 kupwa nambala yivene keshi yachifwanyisako.
Hali Kusoloka 7:4 vamba ngwayo: “Kuvula chavaze valamikile tutachikijilo, [chipwe vaze vatongwele kuya nakuyoyela mwilu], vapwile 144,000.” Kaha jivesi jikwavo jasolola nge kwatwama nawa lizavu likwavo lize vavuluka ngwavo: “Liyongomena lyalinene lize kavahashile kulava kuli mutu numba umweko.” Vatu vaze vatwama ‘muliyongomena lyalinene’ navakiko navakavalwila kuli Kalunga. (Kusoloka 7:9, 10) Nge 144,000 yapwa nambala yachifwanyisa, kaha nawa yatalisa kulizavu lyavatu vaze kaveshi kuhasa kulavako, kaha kaheshi kupwa chihandwa hali eji jivesi jivaliko. *
Kaha nawa, vatu 144,000 vavavuluka nge “vavalanjile muli vatu kupwa mihako yatete.” (Kusoloka 14:4) Mazu akwamba ngwavo “mihako yatete” atalisa kuvatu vavandende, vaze vasakula kupwa vaka-kwimanyinako vakwavo. Atalisa nawa kuvatu vaze navakayulila hamwe naKulishitu mwilu nakuyula mayongomena avatu hano hamavu.—Kusoloka 5:10.
^ Chochimwe nawa, mutu uze alinangula chikuma Robert L. Thomas asonekele kutalisa kunambala 144,000 yize vavuluka hali Kusoloka 7:4 ngwenyi: “Nambala kana yalihandununa nakulava chatwama ha 7:9. Nge natumona nambala kana kupwa yachifwanyisa, kaha kakweshi nambala yeka mumukanda kana tunahase kumona nge hinambala yiveneko.”—Kusoloka 1–7: An Exegetical Commentary, lifwo 474.
Pamo Nauzanga Nawa
ESSENTIAL BIBLE TEACHINGS
Wangana waKalunga Chuma Muka?
Omu Yesu azachilenga mulimo wakwambulula, anangwilenga chikuma hachihande chaWangana waKalunga kuhambakana vihande vyeka. Hamyaka yayivulu, vaka-kumukavangiza vanalombonga ngwavo Wangana wizenga.
