Uno ‘Kuvumbika Masenu naManenu’ Chalumbununa Ika?
Vyuma yakumbulula Mbimbiliya
Lushimbi lwakwamba ngwavo “vumbikenunga masenu namanenu” valuvuluka mapapa kakavulu muMbimbiliya. (Kulovoka 20:12; Lushimbi lwamuchivali 5:16; Mateu 15:4; Wavaka-Efwesu 6:2, 3) Mulushimbi kana mwaliweza kulinga vyuma viwana vyavilemu.
Vasakwililenunga. Kachi nge namusakwililanga visemi jenu havyuma vanamilingila, kaha namusolola ngwenu mwavavumbika. Munahase nawa kusolola ngwenu mweji kuvasakwililanga hakukavangiza vyuma navamilweza. (Vishimo 7:1, 2; 23:26) Mbimbiliya yakolezeza vana vamonenga visemi kupwa “upahu” wavo, kulumbununa nge vatela kuvevwila kuwaha.—Vishimo 17:6.
Itavilenu vamitwaminyine. Munahase kuvumbika masenu namanenu chikumanyi halwola muchili muvanyike, kachi nge namutachikiza ngwenu Kalunga avahana ngolo mangana vamitwaminyine. Mukanda Wavaka-Kolose 3:20 wakolezeza vana hakwamba ngwavo: “Ononokenunga kuli visemi jenu muvyuma vyosena, mwomwo echi cheji kwivwisanga Mwata kuwaha.” Yesu naikiye ononokelenga visemi jenyi omu apwile kanyike.—Luka 2:51.
Vavumbikenunga. (VyavaLevi 19:3; WavaHepeleu 12:9) Vyuma namuhanjika namujila namuhanjikilamo vinahase kusolola numba nge mwavumbika visemi jenu chipwe chiku. Shimbu jimwe visemi vamwe veji kuhanjikanga mujila yize yinahase kulingisa vana vachiwane kupwa chachikalu kuvavumbika. Chipwe ngocho, vana vanahase kuvumbika visemi javo hakuhona kupwanga nahanjikiso yakasautu navilinga vyavipi. (Vishimo 30:17) Mbimbiliya yanangula ngwayo, kuhanjika mazu akasautu kuli chisemi walunga chipwe wapwevo wapwa himulonga waunene chikuma.—Mateu 15:4.
Vazakamenunga. Kachi nge visemi jenu vanashinakajiwa veji kusakiwanga kuvazakama hakuvahana vyuma vyakulikafwa navyo. Munahase kusolola ngwenu mwavavumbika hakuzata nangolo mangana muvahane vyuma vanakusakiwa. (WaChimoteu 1, 5:4, 8) Chakutalilaho shimbu kanda Yesu afwenga azakamine naye hakumuhana mutu wakumuzakama.—Yowano 19:25-27.
Vishinganyeka vyakuhenga kutalisa kukuvumbika visemi
Vishinganyeka vyakuhenga: Hakusaka kusolola ngwenu mwavumbika masenu namanenu, mwatela kuvechelela vamilwezenga vyakulinga muulo wenu.
Muchano: Mbimbiliya yanangula ngwayo vatu vaze vali muulo vatela kuhaka kulutwe ulo wavo kuhambakana vausoko wavo. Mukanda waKuputuka 2:24 wamba ngwawo: “Lunga mwakaseza ise nanaye nakukalipanjika napwevo lyenyi.” (Mateu 19:4, 5) Chipwe ngocho, vatu vaze valimbata vanahase kunganyala kuvyuma chipwe kujishimbi jize navavalweza kuli visemi javo chipwe vaka-ulo wavo. (Vishimo 23:22) Oloze vaze valimbata vatela kutachikiza vyuma vimwe vize vatela kwitavila kulinga vize navavalweza kuli vausoko wavo.—Mateu 19:6.
Vishinganyeka vyakuhenga: Visemi vatwama nawata wosena.
Muchano: Numba tuhu Kalunga ahana visemi wata mutanga, oloze wata kana watwama noho wakumina kawahambakana wata atwama nawo Kalungako. Chakutalilaho, omu zango yayinene yalwezele tumbaji twaYesu valikange kuli Kalunga, vaze tumbaji vambile ngwavo: “Twatela kwononoka Kalunga hakupwa ikiye muka-kuyula, kuhambakana vatu.” (Vilinga 5:27-29) Chochimwe nawa, vana veji kwononokanga visemi javo “nge omu mwaya muchima waMwata.” Kulumbununa nge veji kwononokanga vyuma vyosena veji kuvalwezanga visemi javo vize kavyalimbalaka najishimbi jaKalungako.—Wavaka-Efwesu 6:1.
Vishinganyeka vyakuhenga: Kuvumbika masenu namanenu chasakiwa kufwelela vyuma vyovimwe navize vafwelela visemi jenu.
Muchano: Mbimbiliya yatukolezeza twesekesenga vyuma vali nakutunangula mangana tumone numba nge vyamuchano. (Vilinga 17:11; WaYowano 1, 4:1) Mukuhita chalwola vatu vaze veji kulinganga chuma kana veji kusakulanga kupwa mukwitava chize chalihandununa nachavisemi javo. Mbimbiliya yavuluka vangamba jaKalunga vakushishika vavavulu vaze kavakundwijilenga kwitava chavisemi javoko. Vatu kana shina Apalahama, naLute nakaposetolo Paulu.—Yoshuwa 24:2, 14, 15; Lute 1:15, 16; Wavaka-Ngalesha 1:14-16, 22-24.
Vishinganyeka vyakuhenga: Kuvumbika masenu namanenu chasakiwa kwazana muvisemwa vyakulemesa vakakuluka.
Muchano: Mbimbiliya yamba ngwayo: “Lemesanga Yehova Kalunga kove, ikiye kaha watela kuzachilanga mulimo wajila.” (Luka 4:8) Mutu uze eji kulemesanga vakakuluka, eji kwivwisanga Kalunga kupihya. Chipwe ngocho, Mbimbiliya yanangula ngwayo, “vafu kavatachikiza chuma numba chimweko.” Kaveshi kumona kala kalemesa navavahana vatuko, kaha nawa kaveshi kuhasa kukafwa chipwe kulemeka vatu vavatonyiko.—Muka-kwambulula 9:5, 10; Isaya 8:19.
Pamo Nauzanga Nawa
TONENU
Mwakutwamina Kanawa naVaisowenu naVanokowenu
Vyuma vitatu vize vinahase kumikafwa muhonese ukalu wavaisowenu navanokowenu wingile muulo wenu.
KUKUMBULULA VIHULA VYAKUPANDAMA KUMBIMBILIYA
Vyuma Muka Yahanjika Mbimbiliya Kutalisa kuKuzakama Visemi Vatushinakaji?
Mbimbiliya yahanjika havyakutalilaho vyavatu vakushishika vaze valingilenga ngocho. Kaha nawa yahanjika hajindongi jinahase kukafwa vaze vakwechi mulimo wakulama visemi.
VYAYETU
Yenu kuKukunguluka chaVinjiho jaYehova
Wanenu okwo tweji kukungulukilanga nomu tweji kulemesanga Kalunga. Kala mutu nahase kupwako kaha nawa kaveshi kufwetesa jimbongoko.