VaIsalele vakushikulu vavalwezele vahanenga vyakusokesa mumakumi kufuma kuvyuma vapwilenga navyo mwaka himwaka, mangana vakundwize kulemesa chamuchano. Kalunga avalwezele ngwenyi: “Kujimbuto jenu namukaha mumande enu mwaka himwaka kahanenuko vyakusokesa mumakumi.”—Lushimbi lwamuchivali 14:22.

 Lushimbi lwakuhana vyakusokesa mumakumi lwapwile hajishimbi jize Kalunga ahanyine vaIsalele. Vaka-Kulishitu kavakavangiza Jishimbi vahanyine Moseko, ngocho kavahana vyakusokesa mumakumiko. (Wavaka-Kolose 2:13, 14) Oloze kala muka-Kulishitu atela kuhana wana wajimbongo “nge omwo najinyi mumuchima wenyi, keshi nge nakunyengetelako, chipwe nakulishinjilako, mwomwo Kalunga azanga muka-kuhana nakuwahilila.”—Wavaka-Kolinde 2, 9:7.

•  Vyuma Yahanjika “Tesetamende Yamwaka” Kutalisa kuKuhana Vyakusokesa muLikumi

•  Vyuma Yahanjika “Tesetamende Yayihya” Kutalisa kuKuhana Vyakusokesa muLikumi

 Kuhana vyakusokesa mumakumi vachivuluka chikuma muchihanda chaMbimbiliya vavuluka ngwavo Tesetamende Yamwaka. Jivesi jajivulu jatalisa kulwola luze vaIsalele vakavangijilenga Jishimbi jize vavahanyine kuli Kalunga. Oloze jivesi jajindende jatalisa kulwola luze shimbu kanda Kalunga ahane vaIsalele jishimbi kana.

Shimbu Kanda Jishimbi vahanyine Mose

 Apalama (Apalahama) ikiye apwile mutu watete vavuluka muMbimbiliya uze ahanyine vyakusokesa mumakumi. (Kuputuka 14:18-20; WavaHepeleu 7:4) Chasoloka nge Apalama ahanyine mwangana wakuSalema uze apwile nawa kapilishitu vyakusokesa mumakumi kamwe kaha. MuMbimbiliya kamwatwama unjiho wakusolola nge Apalahama chipwe vana venyi vahanyine cheka vyakusokesa mumakumiko.

 Yakova muzukulu lyaApalahama ikiye mutu wamuchivali vavuluka muMbimbiliya uze ahanyine vyakusokesa mumakumi. Ashikile Kalunga ngwenyi nge mwamukisula, kaha mwamuhana “vyuma vyakusokesa mumakumi” kufuma kuvyuma vize mwamuhana. (Kuputuka 28:20-22) Vatu vamwe vaze valinangula chikuma Mbimbiliya vahanjika ngwavo chasoloka nge Yakova ahanyine wana wakulumba wavimuna kupwa vyakusokesa mumakumi. Numba tuhu Yakova ateselemo lushiko lwenyi, oloze kashinjililile tanga yenyi yihane vyakusokesa mumakumiko.

Kukavangiza Jishimbi vahanyine Mose

 VaIsalele vakushikulu vavahanyine lushimbi lwakuhana vyakusokesa mumakumi mangana vakundwize kulemesa chaKalunga.

•   Hakuwana nge vapilishitu navaLevi kavapwile namusuka wakulimahoko, ngocho vyakusokesa mumakumi vyavakafwilenga vazate lwola lwosena mulimo wakukafwa vatu valemesenga Kalunga. (Kulava 18:20, 21) Kaha vaLevi vaze kavapwile vapilishituko vahanyinenga vapilishitu “chimbwa chimwe chakusokesa muvimbwa 10” kufuma kuvyakusokesa mumakumi vize vavahanyinenga vatu.—Kulava 18:26-29.

•   Mbimbiliya yasolola ngwayo vyakusokesa mumakumi vize vatu vahanyinenga kamuchivali mumwaka vyakafwilenga vaLevi navaze kavapwile vaLeviko. (Lushimbi lwamuchivali 14:22, 23) Shikaho, jitanga javaIsalele jazachishilenga evi vyakusokesa mumakumi haviwanyino vyakulipwila, kaha lwola lumwe vavizachishilenga hakukafwa vaka-kuhutwa vapwenga navyakulikafwa navyo.—Lushimbi lwamuchivali 14:28, 29; 26:12.

 Uno vaIsalele vatachikijilenga ngachilihi vyuma vyakuhana kupwa vyakusokesa mumakumi? VaIsalele vahanyinenga vyakusokesa mumakumi kufuma kuvyuma vize valiminenga mwaka himwaka. (VyavaLevi 27:30) Nge kaIsalele najinyi kuhana jimbongo muchishishisa chakuhana vimbuto, kaha ahanyinenga jimbongo jajivulu. (VyavaLevi 27:31) Vavalwezele nawa ngwavo vatela kuhana “ngombe chipwe mukoko wakusokesa 10.”—VyavaLevi 27:32.

 Hakusaka vatachikize chimuna vatela kuhana kupwa chakusokesa mumakumi, vatelele kusakula chimuna uze apwile wakusokesa 10 hakulovoka mulimba. Jishimbi jahanjikile ngwajo, kavatelele kuhana chimuna weka, chipwe kuhanyinamo jimbongoko. (VyavaLevi 27:32, 33) Chipwe ngocho, vaIsalele vavetavishile kuhananga jimbongo kachi nge vali nakuhana vyakusokesa mumakumi kamuchivali vyakuzachisa haviwanyino vyakulinga mwaka himwaka. Echi chakafwilenga vaIsalele vaze vatambukilenga tunda yayisuku chikuma hakuya kuze kwapwilililenga viwanyino kana.—Lushimbi lwamuchivali 14:25, 26.

 Lwola muka vaIsalele vahanyinenga vyakusokesa mumakumi? VaIsalele vahanyinenga vyakusokesa mumakumi mwaka himwaka. (Lushimbi lwamuchivali 14:22) Oloze mumwaka wakusokesa 7 kavahanyinenga vyuma vyakusokesa mumakumiko. Mwaka kana wapwile mwaka wasambata, chipwe ngwetu wakunoka, ngocho vaIsalele kavaliminenga kala jimbutoko. (VyavaLevi 25:4, 5) Echi chikiko chalingishile vahone kuhana vyakusokesa mumakumi. Kaha mumwaka wamuchitatu namwaka wakusokesa 6 shimbu kanda mwaka wasambata, vaIsalele vahanyinenga vyakusokesa mumakumi vyamuchivali kuli vaka-kuhutwa navaLevi.—Lushimbi lwamuchivali 14:28, 29.

 Uno vazangamishilenga ngachilihi vaze kavahanyinenga vyakusokesa mumakumiko? Mujishimbi vahanyine Mose kavasonekelemo omwo vatelele kuzangamishilamo mutu uze kahanyinenga vyakusokesa mumakumiko. VaIsalele vahanyinenga vyakusokesa mumakumi, mwomwo vatachikijile ngwavo chapwile chakutamo kulinga ngocho keshi kuchina kuvazangamisako. VaIsalele valwezelenga Yehova ngwavo vanahane vyakusokesa mumakumi nakulomba avakisule hakulinga chuma kana. (Lushimbi lwamuchivali 26:12-15) Kalunga amwenenga kuhona kuhana wana kana kupwa wiji.—Malaki 3:8, 9.

 Uno kuhana vyakusokesa mumakumi chapwile chiteli chachinene tahi? Nduma. Kalunga ashikile muyachi waIsalele ngwenyi, kachi nge navahananga vyakusokesa mumakumi kaha mwavakisula mwamunene. (Malaki 3:10) Oloze vamwenenga ukalu omu vechelenga kuhana vyakusokesa mumakumi. Kaha Kalunga echele kuvevwila uselewa, vapilishitu navaLevi nawa vechele kukafwa vatu valemesenga Kalunga mwomwo vayilenga nakulizachila milimo yavo.—Nehemiya 13:10; Malaki 3:7.

 Omu Yesu apwile hano hamavu, vangamba jaKalunga vahanyinenga lika vyakusokesa mumakumi. Oloze omu Yesu afwile lushimbi kana valufumishileko.

Omu Yesu apwile hano hamavu

 Chihanda chaMbimbiliya vavuluka ngwavo Tesetamende Yayihya, chasolola ngwacho vaIsalele vatwalileho lika kuhananga vyakusokesa mumakumi omu Yesu apwile hano hamavu. Yesu amwene ngwenyi chapwile chakutamo vatu kuhana vyakusokesa mumakumi, oloze ahuhumwine vatwamina vamukwitava vaze vahanyinenga wana kana ‘nakuleununa vyuma vyavilemu kuJishimbi, vikiko vene chiyulo chakwoloka nakutetela nakushishika.’—Mateu 23:23.

Hanyima yakufwa chaYesu

 Hanyima yakufwa chaYesu, vatu kavatelele kuhananga vyakusokesa mumakumiko. Kufwa chaYesu chafumisako jishimbi vahanyine Mose kuhakilako vene “nalushimbi lwakutambulanga vyakusokesa mumakumi.”—WavaHepeleu 7:5, 18; Wavaka-Efwesu 2:13-15; Wavaka-Kolose 2:13, 14.