Kalunga asaka ngwenyi mumutachikize kupwa mutu nahenyi, nakupandama kuli ikiye, nakumuzanga, nakumuzachila namuchima wenu wosena. (Mateu 22:37, 38; WaYakova 4:8) Munahase kulinangula vyuma ajina Kalunga hakulinangula mijimbu yakuyoya chaYesu navyuma alingilenga. (Yowano 7:16, 17) Yesu kalwezelenga kaha vatu valinge mwaya muchima waKalungako, oloze naikiye alingilengamo. Chakutalilaho Yesu ambile ngwenyi, chuma chapwile chachilemu mukuyoya chenyi shina ‘kulinga mwaya muchima wayauze amutumine, keshi nge mwaya muchima wenyiko.’—Yowano 6:38.

Uno ngwasakiwa chinjikizo chakulipwila mangana ngutachikize vyuma ajina Kalunga hali yami tahi?

 Nduma, mwomwo muMbimbiliya mwatwama mujimbu wakufuma kuli Kalunga wakukafwa vatu. Mujimbu kana weji kukafwanga mutu himutu apwenga “wakulizanga lyehi mwosena kuzata milimo yamwaza yosena.” (WaChimoteu 2, 3:16, 17) Kalunga asaka muzachisenga Mbimbiliya “nauhashi wenu wakushinganyeka” mangana mulinangule kulinga mwaya muchima wenyi.—Wavaka-Loma 12:1, 2; Wavaka-Efwesu 5:17.

Kutala ngunahase kulinga mwaya muchima waKalunga tahi?

 Eyo, mwomwo Mbimbiliya yamba ngwayo: “Jishimbi [jaKalunga] kajapwa nge hichiteliko.” (WaYowano 1, 5:3) Echi kacheshi nakulumbununa nge kwononoka jishimbi jaKalunga chapwa chachashi lwola lwosenako. Chipwe ngocho, namunganyala chikuma hakwononoka jishimbi jenyi. Yesu ambile ngwenyi: “Vawahilila shina vaze veji kwivwililanga mazu aKalunga nakuwalamanga.”—Luka 11:28.